ގައުމީ ވޮލީބޯޅަ މުބާރާތުގެ ފައިނަލުގައި މިރޭ ސްޕޯޓްސް ކްލަބް ސިޓީން ދިވެހި ސިފައިންގެ ކްލަބް ވާދަކުރާ މެޗަށް ނުކުންނައިރު، މިއީ ދެ ޓީމަށް ވެސް ހާއްސަވާނެ ކުރިމަތިލުމެކެވެ. ސިޓީން ނުކުންނާނީ ގައުމީ ތަށި ފުރަތަމަ ފަހަރަށް އުފުލާލައި، ވޮލީބޯޅަ ސީޒަން ކާމިޔާބުުކުރުމުގެ އަމާޒުގަ އެވެ. އަނެއްކޮޅުން، އެންމެ ފަހުގެ ޗެމްޕިއަން ދިވެހި ސިފައިންގެ ކްލަބުން މި ފަހަރު ތަށި އުފުލާލައި، އަންނަ އަހަރު މި މުބާރާތް މިލްކުކުރުމުގެ ފުރުސަތު ހޯދަން އޮތީ ކެތްމަދުވެފަ އެވެ.
"އަލްހަމްދުލިއްލާހި ޝުކުރު، ވަރަށް ރަނގަޅު ފައިނަލަކަށް ދެވިފައި މި އޮތީ ސިޓީގެ ތާރިހުގައި ވެސް އަލަށް ކަންނޭނގެ، ސީޒަންގެ ތިން ތަށްޓާ ދިމާލަށް މި ދެވެނީ، މިހާރު މި އޮތީ ﷲ އިރާދަކުރެއްވިއްޔާ ފައިނަލަށް ގޮސްފައި، ކުރިން ވެސް ދެއްކިހެން މި ޓީމުގެ ހިތްވަރާއި ފަންވަރު މީގެއިން މި ފެންނަނީ، އަސްލު، މުޅި ޓީމު ވެސް ޓީމެއްގެ ގޮތުގައި މި އޮތީ،" އެސޯސިއޭޝަން ކަޕްގެ ޗެމްޕިއަންކަމާއި ގައުމީ ލީގުގެ ތަށި ސިޓީ އަށް ހޯދައިދިން ކޯޗު ނަލަ ހުސެއިން ޝަރީފް ބުންޏެވެ.
ވޮލީބޯޅަ އަށް ހާއްސަ ކްލަބެއްގެ ގޮތުގައި، ސިޓީ 2009 ވަަނަ އަހަރު ވުޖޫދުވުމާ ހަމައިން ފެށިގެން ގަވާއިދުން ވޮލީބޯޅަ މުބާރާތްތަކުގައި ވާދަކުރި ނަމަވެސް ފުރަތަމަ ޑިވިޝަން ތަށްޓެއްގައި އަތްލުމުގެ ނަސީބު ލިބުނީ މި ފަހަރު އެވެ.
މި ސީޒަނުގެ އެސޯސިއޭޝަން ކަޕާއި ގައުމީ ލީގު ޗެމްޕިއަންކަން ސިޓީން ހޯދައި، ގައުމީ ފައިނަލަށް ތައްޔާރުވަމުން އަންނައިރު، މި ފަހަރުގެ ސީޒަނުގައި ސިޓީ ބަލިވީ 11 މެޗު ކުޅެގެން އެންމެ މެޗަކުންނެވެ. އެއީ އެސޯސިއޭޝަން ކަޕް ލީގު ބުރުގައި ވެމްކޯ އަތުންނެވެ. އެންމެ ފަހުން ހަ މެޗަށް ބަލާއިރު ސިޓީ އަތުން ގެއްލުނީ އެންމެ ސެޓެކެވެ.
މި ފަހަރުގެ ސީޒަނުގައި ގުޑީސް ސްޕޯޓްސް ކްލަބަށް ފުރަތަމަ ކުޅުނު އަލީ އާމިރު (ދިގު އައްޔަ)، ހުސެއިން ވިޝާމް (ބުޅިކެ) އަދި ހަސަން ނިލާމް (ޕާޓޭ) ވަނީ ގައުމީ މުބާރާތަށް ސިޓީ އަށް ބަދަލުވެފަ އެވެ. ގައުމީ މުބާރާތުގެ ފުރަތަމަ ސެމީގައި ސިޓީން ސީދާ ތިން ސެޓުން ސިފައިން ބަލިކުރި މެޗުގެ ފަހު ސެޓަށް ސިޓީން ދިގު އައްޔަ ބޭނުންކުރި އެެވެ.
ނަލަ ހުސެއިން ބުނީ އާ ކުޅުންތެރިން ޓީމާ ގުޅުނު ނަމަވެސް، ސިޓީ އޮތީ އެސޯސިއޭޝަން ކަޕާއި ގައުމީ ލީގާ އެއްގޮތަށް އެއް ޖޯޝެއްގައި ކަމަށެވެ.
"އަޅުގަނޑުމެންނަށް ލިބުނު ކުޅުންތެރިންނަކީ ވަރަށް ބޮޑު އެއްޗެއް، އެ މީހުންނަކީ ވަރަށް މޮޅެތި ކުޅުންތެރިން، އަހަރެމެންނަށް ވާނެ ގޮތެއް ބުނަން ނޭނގޭ، އިންޖަރީއެއް ވެސް ވެދާނެ، އިންޖަރީއެއް ވެއްޖިއްޔާ އެ ތިބީ އެ މީހުން، ޓީމު އިންނާނީ ޓީމެއްގެ ގޮތުގައި، އެ މީހުން ވެސް އައިސް ޓީމާ އެކު ރަނގަޅަށް އުޅޭތީ އެއީ ޓީމަށް ލިބުނު ޕްލަސް ޕޮއިންޓެކޭ ބުނާނީ،" ނަލަ ހުސެއިން ބުންޏެވެ.
ސިޓީ ޓީމުން މި ސީޒަނުގައި މިހާތަނަށް ހޯދަމުން އައި ކާމިޔާބީގައި ނަލަ ހުސެެއިން ކުޅުންތެރިންނަށް ފަހު ކްރެޑިޓް ދެނީ ކޯޗިން ސްޓާފުންނަށެވެ. ކުޅުންތެރިއެއްގެ ގޮތުގައި ޓީމުގައި ހިމަނާފައިވީ ނަމަަވެސް، ރާއްޖޭގައި އުފެދުނު އެންމެ މޮޅު ސެޓަރު، އިޝާން މުހައްމަދު (ބަޓިސް) ވެސް ސިޓީ ޓީމުގެ ކޯޗިން ސްޓާފުންނަށް އެހީތެރިވުމުގައި މުހިންމު ރޯލެއް ކުޅެ އެވެ.
"(ބަޓިސް) ވަރަށް ވަރަށް މުހިންމު ރޯލެއް އެބަ އަދާކުރޭ، އަޅުގަނޑަށް ނައްޓައިގެން ދާ ތަންކޮޅު، ވަރަށް ބޮޑަށް ވަރަށް ގާތުން ބަލަމުން ކިޔައިދެމުން، ވަރަށް ފަސޭހަ، އެއްވެސް ކަހަލަ ނުރުހުންވުމެއް އެއްވެސް ކަހަލަ މައްސަލައެއް ނެތި، ވަރަށް ރަނގަޅަށް އެ ހުރީ،" ނަލަ ހުސެއިން ބުންޏެވެ.
ގައުމީ ވޮލީބޯޅަ މުބާރާތުގެ ފައިނަލުގައި ސިފައިންނާއި ސިޓީ ކުޅޭ މެޗު ފަށާނީ މިރޭ 21:00 ގަ އެވެ.
