އިހަވަންދިއްޕޮޅުގައި ތެޔޮ ސްޓޯރޭޖެއް އަޅަން ނިންމާފައިވާކަން އެސްޓީއޯއިން ހާމަކޮށްފި އެވެ.
އެސްޓީއޯގެ ވިޔަފާރި ފުޅާކުރުމުގެ ތެރެއިން ތެޔޮ ރައްކާ ކުރާ ސްޓޯރޭޖާއި އިންޓަނޭޝަނަލް ބަންކަރިން ކުރަން ނިންމާފައިވާ ކަން ސީއީއޯ އަދި މެނޭޖިން ޑިރެކްޓަރު ހުސެން އަމްރު އިއުލާނުކުރެއްވީ ރޭ ކޮރޮސްރޯޑްސްގައި ކުރިޔަށް ދިޔަ އަހަރީ އާންމު ޖަލްސާގަ އެވެ.
ހިއްސާދާރުންނާ މި ޕްރޮޖެކްޓުގެ ތަފުސީލުތައް ހިއްސާކުރައްވަމުން އަމްރު ވިދާޅުވީ, މި ސްޓޯރޭޖުގެ މަސައްކަތް ކުރަން ނިންމި މައިގަނޑު ސަބަބަކީ އެސްޓީއޯގެ ތެޔޮ ރައްކާކުރެވޭ ކެޕޭސިޓީ އިތުރުކުރުމެވެ.
"އަޅުގަނޑުމެންގެ ފިއުލް ޓާމިނަލް, ވަރަށް ޒަމާންވެއްޖެ އެ ރަށުގަ ހަދާފަ ހުންނަތާ. މިހާރު ރާއްޖޭގެ ރިސޯޓްތައް ވެސް ތިންގުނަ އިތުރުވެއްޖެ. ރާއްޖޭގެ ކޮންސަމްޕްޝަން ވަރަށް ބޮޑު ތަން ބޮޑުވެގެން ހިނގައްޖެ. އެހެން ނަމަވެސް އަޅުގަނޑުމެންނަކަށް ނެތް އެ ރަށް އިތުރަށް ބޮޑުކުރެވޭކަށް" އޭނާ ވިދާޅުވި އެވެ.
އެސްޓީއޯއިން މިހާރު އެއްގަމުގައި ތެޔޮ ރައްކާކުރަން ބޭނުންކުރަނީ މާލެ ކައިރިން އޮންނަ ފުނަދޫ އެވެ. އެންމެ ފަސް ހެކްޓަރުގެ މި ރަށުގައި ހުންނަ 14 ޓޭންކުގައި އެއްފަހަރާ ރައްކާކުރެވެނީ 48،000 މެޓްރިކު ޓަނުގެ ޑީސަލް އަދި 10،000 މެޓްރިކު ޓަނުގެ ޕެޓްރޯލެވެ.
މިއީ ކުރީ ސަރުކާރުން 10 މިލިއަން ޑޮލަރު (154 މިލިއަން ރުފިޔާ) ހަރަދުކޮށްގެން ތެޔޮ ރައްކާކުރާ މިންވަރު އިތުރުކުރަން ހިންގި "ފުނަދޫ އެކްސްޕެންޝަން ޕްރޮޖެކްޓު"ގެ ތެރެއިން އިތުރުކުރެވުނު ކެޕޭސިޓީ އެވެ.
އިހަވަންދިއްޕޮޅު ހޮވީ ލޮކޭޝަނަށް ބަލާފައި، އަޅާނީ ފްލޯޓިން ސްޓޯރޭޖެއް
ކުރިން ވާހަކަދެކެވުނީ ފުނަދޫގައި ހުންނަ ސްޓޯރޭޖު ތިލަފުއްޓަށް ބަދަލުކުރާ ގޮތަށެވެ.
މި ނިންމުން ބަދަލުކޮށް، އެންމެ އުތުރުން އޮންނަ އިހަވަންދިއްޕޮޅުގައި ސްޓޯރޭޖު އަޅަން ނިންމީ ލޮކޭޝަނުގެ ގޮތުން ލިބޭ ފައިދާތަކަށް ބަލާފައި ކަމަށް އަމްރު ވިދާޅުވި އެވެ.
ތެޔޮ ރައްކާކުރާ ފުނަދުއަށް ޓޭންކަރެއް ގާތްކޮށްފަ: މިހާރު ފުނަދޫގައި ރައްކާކުރެވެނީ އެއްފަހަރާ 58،000 މެޓްރިކް ޓަނުގެ ތެޔޮ. -- ފޮޓޯ: އެސްޓީއޯ
އިހަވަންދިއްޕޮޅު އޮންނަ އަށް ޑިގްރީ ޗެނަލްއަކީ އިންޑިއާ ކަނޑުން މެދުއިރުމަތީގެ ގައުމުތަކަށާއި އެފްރިކާ ބައްރަށާއި މިސްރުގެ ސުއޭޒް ކެނަލް ހުރަސްކޮށް ޔޫރަޕަށްދާ އާގު ބޯޓުފަހަރު އެންމެ ގިނައިން ދަތުރުކުރާ ސަރަހައްދެވެ.
އަމްރު ވިދާޅުވި ގޮތުން ނަމަ ދުވާލެއްގެ މައްޗަށް 300 އަށް ވުރެ ގިނަ އާގު ބޯޓުފަހަރު މި ކަނޑުއޮޅި ބޭނުންކުރެ އެވެ. އެކަމަކު މި އާގު ބޯޓުފަހަރަށް ބަންކަރިން (ތެޔޮ އެޅުން) ހިދުމަތް ދޭނެ ރަނގަޅު ތަނެއް މި ސަރަހައްދުގައި އަދި ނެތް ކަމަށް އޭނާ ވިދާޅުވި އެވެ.
އެސްޓީއޯގެ ވިސްނުމަކީ މި މަސައްކަތް ކުރަން ފްލޯޓިން ސްޓޯރޭޖެއް އެޅުމެވެ. ފްލޯޓިން ސްޓޯރޭޖަކީ ހަރަދުގެ ގޮތުން އާ ބަނދަރެއް އެޅުމަށް ވުރެ ހަރަދު ކުޑަ ކަމެކެވެ.
ފްލޯޓިން ސްޓޯރޭޖުގެ ގޮތުގައި އެންމެ އާންމުކޮށް ގެންގުޅެނީ ބޮޑެތި ތެޔޮ ޓޭންކަރުތަކެވެ. އެކަމަކު ޖަޕާނާއި ކޮރެއާ އަދި ސްކެންޑެނޭވިއާ ސަރަހައްދުގެ ގައުމުތަކުގައި ބޮޑެތި ފްލޯޓިން ޓާމިނަލްތައް އަޅައިގެން ވެސް ތެޔޮ ސްޓޯރޭޖުތައް ގާއިމުކޮށްފައިވެ އެވެ.
ޖަޕާނުގެ ނަގަސާކީގައި ހުންނަ ކަމިގޯޓޯ ފްލޯޓިން އޮއިލް ސްޓޯރޭޖް ބޭސް: 1988 ގައި ހުޅުވި މި ސްޓޯރޭޖަކީ ދުނިޔޭގެ ފުރަތަމަ ފްލޯޓިން އޮއިލް ސްޓޯރޭޖު. -- ފޮޓޯ: މިޓުސުބިޝީ މޮޓޯސް
ނަމަވެސް ޕްރޮޖެކްޓު ފަށާ ކަން އިއުލާނުކުރުމުގެ އިތުރަށް، މާ ގިނަ މައުލޫމާތުތަކެއް ނުދޭތީ މިކަމަށް ހިނގާނެ ހަރަދަކާއި ސީދާ ލޮކޭޝަނަކާއި މި ސްޓޯރޭޖު ވުޖޫދަށް އަންނާނެ ދުވަހެއް ނޭނގެ އެވެ.
