ވޮލީބޯޅަ އެސޯސިއޭޝަން ކަޕުގައި ކުލަބް އީގަލްސް އާއި ހިންމަފުށި ވިކްޓޯރިއަސް ސްޕޯޓްސް ކުލަބުން އެންމެ ފަހުން ކުޅުނު މެޗުތައް ކާމިޔާބުކޮށް ސެމި ފައިނަލްގެ އުއްމީދު ދަމަހައްޓައިފި އެވެ.
މި އަހަރުގެ އެސޯސިއޭޝަން ކަޕަށް ވަރުގަދަ އަށް ތައްޔާރުވި އީގަލްސް ފުރަތަމަ މެޗުން މޮޅުވި ނަމަވެސް ދެ ވަނަ މެޗުގައި ވަނީ ޕޮލިސް ކުލަބް އަތުން ބަލިވެފަ އެވެ. ހިންމަފުށި ވެސް ފުރަތަމަ މެޗުން މޮޅުވިއިރު، ދެ ވަނަ މެޗުގައި ވަނީ ކުލަބު ވޮލީބޯލް އަތުން ބަލިވެފަ އެވެ.
ރޭ ކުޅުނު މެޗުން އީގަލްސް މޮޅުވުމުން އެ ޓީމަށް ވަނީ ތިން މެޗުން ހަ ޕޮއިންޓް ލިބިފަ އެވެ. އެ ޓީމަށް ބާކީ އޮތީ ސިފައިންނާ ދެކޮޅަށް ކުޅޭ މެޗެވެ. ސެމީ ފައިނަލުން އެ ޓީމަށް ޖާހަ ލިބެން އޮތީ ސިފައިން އަތުން މޮޅުވެގެންނެވެ.
ހިންމަފުއްޓަށް ބަލާއިރު އެ ޓީމަށް ވެސް ތިން މެޗުން ލިބުނީ ހަ ޕޮއިންޓެވެ. ހިންމަފުއްޓަށް ބާކީ އޮތީ ޗެމްޕިއަން ކުލަބް ވެމްކޯއާ ދެކޮޅަށް ކުޅޭ މެޗެވެ. ވެމްކޯ އިން ވަނީ އެ ޓީމު މިހާތަނަށް ކުޅުނު ދެ މެޗު ފަސޭހަކަމާއިއެކު ކާމިޔާބުކޮށްފަ އެވެ.
މުބާރާތުގައި އީގަލްސްގެ ތިން ވަނަ މެޗުގައި އެ ޓީމު ނުކުތީ ހާފްލައިންލިންކޭޖާ ދެކޮޅަށެވެ. ސީދާ ތިން ސެޓުން އީގަލްސް މޮޅުވި މި މެޗުގައި ކޯޗު މުނާ މުނީރު (މުންނަ) ވަނީ ޓީމުގެ ހުރިހާ ކުޅުންތެރިންނަށް ވެސް މެޗުގެ އެކި ހިސާބުތަކުގައި ފުރުސަތު ދީފަ އެވެ. ފަހު ސެޓުގެ ބޮޑު ބައި އެ ޓީމުން ކުޅުނީ ލަންކާ ކުޅުންތެރިޔާ ދިނޭޝާ ބެންޗަށް ލައިގެންނެވެ.
މެޗުގެ ސެޓުތައް އީގަލްސް އިން ގެންދިޔައީ 25-12, 25-6 އަދި 25-13 އިންނެވެ. މެޗުގެ މޮޅު ކުޅުންތެރިޔާގެ މަގާމް ހޯދީ އީގަލްސްގެ ސެޓަރު ފާތިމަތު މަޒިއްޔާ އެވެ.
ހިންމަފުށިން ރޭ ކުޅުނު މެޗު ކާމިޔާބުކުރީ އަލްމާ ސްޕޯޓްސް ކުލަބާއި ވާދަކޮށް ސީދާ ތިން ސެޓުންނެވެ. މެޗުގެ ސެޓުތައް ހިންމަފުށިން ގެންދިޔައީ 25-17، 25-23 އަދި 25-19 އިންނެވެ. މެޗުގެ މޮޅު ކުޅުންތެރިޔަކީ ހިންމަފުށީގެ ފާތިމަތު ރަޝީދާ އެވެ.
މުބާރާތުގައި މިރޭވެސް ދެ މެޗެއް ކުޅޭނެ އެވެ. 20:15ގައި ފަށާ މެޗުގައި ވާދަކުރާނީ ކުލަބު ވޮލީބޯލް އާއި ޔޫތު ނިއުޖެނެރޭޝަނެވެ. މިރޭ ކުޅޭ ފަހު މެޗުގައި ވޮލީބޯލް ޔޫތު ނިއުޖެނެރޭޝަން ނުކުންނާނީ ދިވެހި ސިފައިންގެ ކުލަބާ ދެކޮޅަށެވެ.
