ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމުގެ ހަމަލާ ދިން މައްސަލާގައި ދައުވާ ކޮށްފައިވާ މީހުން މިއަދު މާފުށީ ޖަލުން މާލޭގެ ކްރިމިނަލް ކޯޓަށް ހާޒިރު ނުކުރެވުމުން ކަންބޮޑުވުން ފާޅުކޮށް ނަޝީދުގެ ވަކީލުން ބަޔާނެއް ނެރެފި އެވެ.
މިއަދު ހެނދުނު 9:00 އަށް ތާވަލުކުރި އަޑުއެހުން ކެންސަލްކުރީ ކުރިމިނަލް ކޯޓުން ބުނި ގޮތުގައި, ޖަލުގައި ތިބި ދައުވާ ލިބޭ މީހުން ކޯޓަށް ހާޒިރުކޮށް ނުދެވުމުންނެވެ. ކަރެކްޝަންގެ ބެލުމުގެ ދަށުގައި ތިބި އެ މީހުން ކޯޓަށް ހާޒިރުނުކުރެވުނީ, ކަނޑުގަދަވެ ދަތުރުކުރުމަށް ދަތިވުމުންކަން ވެސް ކޯޓުން ހާމަކުރި އެވެ.
މިކަމާ ގުޅިގެން ނަޝީދުގެ ކޮއްކޮ އަދި ގާނޫނީ ވަކީލު ނާޒިމް ސައްތާރުގެ ލޯ ފާމުން ނެރުނު ބަޔާނުގައި ވަނީ މޫސުން ގޯސްވާނެ ކަމަށް ލަފާ ކުރެވުނު އިރު އިއްޔެ ވެސް ދައުވާ ރައްދުވާ ފަރާތްތައް މާލެ ގެނެސް މާލެ ޖަލުގައި ބެހެއްޓުމުގެ އިންތިޒާމު ހަމަޖެއްސެން އޮތް ކަމަށެވެ.
މި ޝަރީއަތުގެ އަޑުއެހުންތައް ބާއްވާނެ ތާރީހުތައް މާ ކުރިއާލާ އަންގާފައިވާއިރު އެފަދަ އެއްވެސް ކަމެއް ކުރިއާލާ ތައްޔާރުނުވެ އަޑުއެހުމެއް ލަސްވެގެން ދިޔަ ކަމަށް ޓަކައި ކަަރެކްޝަންސް ސާވިސް ކުށްވެރި ކުރާ ކަމަށް އެ ބަޔާނުގައިވެ އެވެ.
"މި މައްސަލާގައި މުއައްސަސާތަކުން އިހުމާލުވާ ކަމުގެ ޝަކުވާތައް ކެނޑިނޭޅި ކުރަމުން ދާއިރު، އެފަދަ ޝަކުވާތައް ބެލުމެއް ނެތި، ހޯމް މިނިސްޓްރީންނާއި، މޯލްޑިވްސް ކަރެކްޝަނަލް ސާވިސް އިން، މި ކަމުގެ ހައްސާސިޔަތު ދެނެނުގަނެ ފަރުވާ ކުޑަ ކުރާތީ އެ ކަންތައް އިންތިހާއަށް ކުށްވެރިކުރަމެވެ." ބަޔާނުގައިވެ އެވެ.
ކޯޓުން ބުނި ގޮތުގައި, މިއަދު ކެންސަލްވި އަޑުއެހުން ހޮނިހިރު ދުވަހު ބޭއްވުމަށް އަންނަނީ މަސައްކަތް ކުރަމުންނެވެ.
ނަޝީދުގެ ވަކީލުންގެ ފަރާތުން ވަނީ އެ ޝަރީއަތްތައް އޮބްޒާވްކުރުމުގެ ފުރުސަތަކަށް ކޯޓުގައި އެދިފަ އެވެ. އެހެންވެ, ކްރިމިނަލް ކޯޓުގެ އިސްގާޒީ އަހުމަދު ޝަކީލް ވަނީ ނަޝީދުގެ ވަކީލުންނަށް އެ ހުއްދަ ދެއްވާފަ އެވެ.
މިދިޔަ އަހަރުގެ މެއި މަހުގެ ހަވަނަ ދުވަހު ގޮއްވާލި ބޮމާ ގުޅިގެން 10 މީހެއްގެ ޝަރީއަތް މިވަގުތު ކޯޓުގައި ކުރިއަށްދެ އެވެ. އޭގެ ތެރެއިން ސީދާ ބޮމުގެ ހަމަލާއާ ގުޅޭ ދައުވާތައް ކުރެވޭ މީހުންނާއި ޓެރަރިޒަމްގެ އެހެން ދައުވާތައް ކުރެވޭ މީހުން ހިމެނެ އެވެ.
މިއަދުގެ އަޑުއެހުން ތާވަލުކުރީ ހަމަލާއާ ގުޅޭ ދައުވާތައް އުފުލި ތަހްނީމް އަހުމަދާއި މުޖާޒު އަހުމަދާއި އިސްހާގު އާއި ފަހުމީ އަލީ އާއި އަލީ ހައިޝަމް އާއި ފަހުމީ އަލީ އާއި މުހައްމަދު ނާޒިމް އަދި އިސްހާގުގެ މައްޗަށް ޝަރީއަތް ހިންގުމަށެވެ.
ނަޝީދަށް އަމާޒުކުރި ހަމަލާއާ ގުޅިގެން އަމިއްލަ އިއުތިރާފާ އެކު މިހާތަނަށް ކުށް ސާބިތުވެފައިވަނީ އަހުމަދު އަދުހަމަށް އެކަންޏެވެ.
ނަޝީދަށް ދިން ހަމަލާގެ ޝަރީއަތް ލަސްކަމުގެ ޝަކުވާ އެމަނިކުފާނާއި އާއިލާއިން އަދި ރައްޔިތުންގެ މަޖިލީހުން ވަނީ ފާޅުކުރައްވާފަ އެވެ. ނަމަވެސް, ސަރުކާރުން ބުނެފައިވަނީ އެ ޝަރީއަތް ހިންގައި ހަމަލާގެ ފަހަތުގައި ތިބި މީހުންނަށް އަދަބު ދިނުމުގައި ސަރުކާރުގެ އަޒުމު ނުގުޑާނެ ކަމަށެވެ.
