އިސްތަންބޫލް، ތުރުކީ (މޭ 27) - އިސްލާމިކް ސްޓޭޓް (އައިއެސް) ގްރޫޕްގެ އިސް މެމްބަރަކު ތުރުކީއިން ހައްޔަރުކޮށްފި އެވެ.
ބައެއް ރިޕޯޓުތައް ބުނާ ގޮތުން އިސްތަންބޫލުން ހައްޔަރު ކުރީ އައިއެސްގެ ލީޑަރު އަބޫ ހަސަން އަލް ހާޝިމީ އަލް ގުރައިޝީ އެވެ.
ނަމަވެސް ތުރުކީގެ އިސް އޮފިޝަލަކު ބުނީ އެއީ އޭނާކަން ކަށަވަރު ކުރެވޭ މައުލޫމާތު އަދި ނުލިބޭ ކަމަށެވެ. އެކަމަކު އެއީ އައިއެސްގެ ލީޑަރުންގެ ތެރޭގައި ހިމެނޭ މީހެކެވެ.
އައިއެސް ޓެރަރިސްޓް ގްރޫޕްގެ ލީޑަރަކަށް އަބޫ ހަސަން ހަމަޖެއްސީ މިދިޔަ މާޗް މަހު އެވެ. އޭގެ ކުރިން ލީޑަރަކަށް ހުރި އަބޫ އިބްރާހިމް އަލް ހާޝިމީ އަލް ގުރައިޝީ ވަނީ ސީރިއާގައި އޭނާ ދިރިއުޅޭ ގޭގައި އެމެރިކާއިން އޮޕަރޭޝަނެއް ހިންގަން ފެށުމުން، ބޮން ގޮއްވައި އަމިއްލައަށް މަރުވެފަ އެވެ.
ސީރިއާ އާއި އިރާގުގެ ބައެއް ސަރަހައްދުގައި ހިފައި، ދައުލަތެއް ގާއިމްކޮށްގެން އުޅުނު އައިއެސް ހަނގުރާމައިގެން ބަލިވީ 2017 ވަނަ އަހަރު އެވެ.
އެކަމަކު އައިއެސްގެ ސެލްތަކުން އަދިވެސް ދަނީ އެކި ގައުމުތަކުގައި ހަރަކާތްތެރިވަމުންނެވެ. އެގޮތުން ސީރިއާ، އިރާގް އަދި އަފްގާނިސްތާން ފާހަގަކުރެވެ އެވެ.
