މުސާރަ ނުދޭ މައްސަލައެއްގައި ފުޓްބޯޅައިގެ ހުރިހާ ހަރަކާތަކުން ސަސްޕެންޑްކޮށްފައި އޮތް، ރާއްޖޭގެ އެންމެ ސަޕޯޓަރުން ގިނަ ކްލަބް ނިއު ރޭޑިއަންޓް ސްޕޯޓްސް ކްލަބްގެ ޗެއާމަނަކަށް، އަހުމަދު ވާސިފް މިރޭ އިންތިހާބުކޮށްފި އެވެ.
ނިއު ސަޕޯޓަރުން އިސްވެ، ދާދި ފަހުން ވުޖޫދުކުރި ކްލަބް, ރޭޑިއަންޓް ސްޕޯޓްސް ކްލަބްގެ ވެސް ޗެއާމަނަކަށް އިންތިހާބުވި، ވާސިފް އަކީ އެންމެ ފަހުން އުވިދިޔަ ނިއުގެ ބޯޑު މެމްބަރެެއް ވެސް މެ އެވެ. ނިއު އަށް އަލުން ފުޓްބޯޅައިގެ ތެރެއަށް އެނބުރި އާދެވޭނީ ދަރަނިތައް ދައްކައިގެންނެވެ.
ޝީ ބިލްޑިންގައި މިރޭ ބޭއްވި އިންތިހާބުގައި ކުރިއަށްދިޔައީ ފެންނަ ނުފެންނަ ވޯޓެކެވެ. އެއީ ކޮންމެ މަގާމަކަށް ވެސް ކުރިމަތިލާފައިވަނީ އެކަށީގެންވާ އަދަދަކަށް ކަމަށް ވާތީ، ހިންގާ ގަވާއިދުގައިވާ ގޮތުގެ މަތިންނެވެ. ކޮންމެ ފަރާތެއް ވެސް ނިއު ބޯޑަށް މިރޭ އިންތިހާބުވީ ޖަލްސާގައި ބައިވެރިވި މެމްބަރުންގެ ފުރިހަަމަ އަގުލަބިއްޔަތު ލިބިގެންނެވެ.
މިރޭ ވާސިފްގެ އިތުރުން ނިއުގެ މަގާމުތަކަށް އިންތިހާބުވެފައިވަނީ، ވައިސް ޗެއާމަންގެ ދެ މަގާމަށް އިސްމާއިލް ރަޝީދު، ޒަހީނުއްދީން ސައީދު، ސެކްރެޓަރީ އަކަށް ސާއިދު އަލީ ދީދީ (މޫސާ ސާއިދު)، ހަޒާންދާރަކަށް އަހުމަދު ހުސެއިން އެވެ.
މީގެ އިތުރުން ބޯޑުގައި ދެން ތިބި ހަތަރު މެމްބަރުންގެ ގޮތުގައި އިންތިހާބުވީ މުހައްމަދު ޔޫސުފް، ލުއައްޔު އާދަމް، އާސިމް ރިޒާ އަދި މުހައްމަދު މާލިކް އެވެ.
ނިއުގެ އިސް ފަރާތްތަކާއި އަލަށް އިންތިހާބުވި ބޯޑު މެމްބަރުން ފޮޓޯ އަކަށް ހުއްޓިލައިގެން.-- ފޮޓޯ: އިމޭޖަސް.އެމްވީ/ އިސްމާއިލް ތޯރިގު
ނިއު ބޯޑުގައި މި ފަހަރު އިންތިހާބުވި ނުވަ މެމްބަރުންގެ ތެރެއިން ފަސް މެމްބަރުންނަކީ ރޭޑިއަންޓްގެ ހިންގާ ބޯޑަށް އިންތިހާބުވި މެމްބަރުންނެވެ.
ކުޅުންތެރިންނަށް މުސާރަ ނުދޭ މައްސަލައިގައި ރާއްޖޭގެ އެންމެ ސަޕޯޓަރުން ގިނަ ކްލަބް ނިއު ފުޓްބޯޅައިގެ ހަރަކާތްތަކުން ސަސްޕެންޑްކޮށްފައިވަނީ 2019 ވަނަ އަހަރު ކުރީކޮޅުގަ އެވެ. ފުރަތަމަ އެފްއޭއެމުން ނިއު ސަސްޕެންޑްކުރިއިރު، ފަހުން ދުނިޔޭގެ މައި ފުޓްބޯޅަ އިދާރާ ފީފާ އިން ވަނީ ނިއު އަށް ފިޔަވަޅު އަޅައިފަ އެވެ. އެއީ އެ ކްލަބުން ގެނެސްފައިވާ ބިދޭސީ ކުޅުންތެރިންނަށް މުސާރަ ދޭން ތަކުރާރުކޮށް ދިން ފުރުސަތުތަކުގެ ބޭނުންހިފާފައިނުވާތީ އެވެ.
ނިއުގެ ސަޕޯޓަރުން އިސްވެ، ދާދި ފަހުން ވުޖޫދުކުރި ރޭޑިއަންޓްގެ މަސައްކަތް ހުއްޓުނީ އޭއެފްސީން ރޭޑިއަންޓަކީ ނިއުގެ "ސްޕޯޓިން ސަކްސެސާ" ގޮތުގައި ކަނޑައެޅުމުންނެވެ. ސްޕޯޓިން ސަކްސެސާ އެއްގެ ގޮތުގައި ބެލޭ މިންގަނޑަކީ ދަރަންޏެއް އޮތުމުގެ ސަބަބުން ސަސްޕެންޝަނެއްގައި އޮތް ކްލަބެއްގެ މަސްލަހަތު އޮތް ފަރާތެއް ނުވަތަ ފަރާތްތަކެއް ބައިވެެރިވެގެން އެހެން ކްލަބެއް ވުޖޫދުކުރުމެވެ.
އޮންނަ އުސޫލުގެ ތެރެއިން ސްޕޯޓިން ސަކްސެސާއެއްގެ ގޮތުގައި ކުރިއަށްދެވޭނީ ކުރިން އޮތް ކްލަބްގެ ދަރަންޏާ ހަވާލުވާނަަމަ އެވެ. މިހާލަތުގައި، މީގެ މާނަ އަކީ ރޭޑިއަންޓަށް ރަސްމީ ގޮތުން އެފްއޭއެމާއި އޭއެފްސީ ތެރެއިން އެފިލިއޭޝަނެއް ލިބިގެން މެމްބަރު ކްލަބެއްގެ ގޮތުގައި ކުރިއަށް ދެވެން އޮތީ ނިއު ރޭޑިއަންޓްގެ ދަރަންޏާ ހަވާލުވެގެންނެވެ.
ވާސިފް މިރޭ ވިދާޅުވީ ރޭޑިއަންޓް ގެންނަން ނިންމީ ނިއުގެ ދަރަންޏާ ހަވާލުވެގެން އެ ވަގުތު ކުރިއަށް ދެވެން ނެތިގެން ކަމަށެވެ. އެކަމަކު، މިހާރު ހާލަތު އޮތްގޮތުން އެންމެ ރަނގަޅު ގޮތަކީ ނިއު އަލުން ކޮޅަށް ޖެހުން ކަމަށް ވާސިފް ވިދާޅުވި އެވެ.
ރޭޑިއަންޓްގެ ކަންކަމުގައި ހައްލެއް ހޯދަން އާބިޓްރޭޝަންގައި އެ މައްސަލަ ބައިނަލްއަގުވާމީ ކޯޓެއްގައި ކުރިއަށް ނުގެންދަން ނިންމި އެންމެ ބޮޑު ސަބަބަކީ "ދިވެހި ފުޓްބޯޅައިގެ ހައްގުގައި ކުރިއަށް ދިއުމުގެ ވިސްނުމުގައި" ކަމަށް ވާސިފް ވިދާޅުވި އެވެ.
"ހައިޖާނެއްގެ ތެރެއަށް ދިވެހި ފުޓްބޯޅަ ގެންދިއުމުގެ ބަދަލުގައި އަޅުގަނޑުމެން ނިންމީ އަލުން ނިއު ރޭޑިއަންޓްގެ މަސައްކަތަަައިގެން އުޅެން،" ވާސިފް ވިދާޅުވި އެވެ.
އެފްއޭއެމާއި ފީފާ އިން 2019 ވަނަ އަހަރު ނިއު ސަސްޕެންޑް ކުރުމާ އެކު އެ އަހަރު ފަހު ކޮޅުން ފެށިގެން އަލުން ފުޓްބޯޅަ އަށް ނިއު ގެންނަން ސަޕޯޓަރުންތަކެއް އިސްވެ ގިނަ މަސައްކަތްތަކެއް ކުރި ކަމަށް ވާސިފް މިރޭ ވިދާޅުވި އެވެ. އަދި އޭގެ ތެރެއިން ގިނަ ފަރާތްތަކެއް މި އަލަށް އިންތިހާބުވި ނިއުގެ ބޯޑު މެމްބަރުންގެ ތެރޭގައި ވެސް ހިމެނޭ ކަމަށާއި އެ މީހުން އިސްވެ، އަމިއްލަ ހަރަދުގައި 2020 ވަނަ އަހަރުގެ މާޗް މަސް ތެރޭގައި ނިއުގެ ޖޯޒީ ވިއްކުމުގެ ހަރަކާތެއް ވެސް ހިންގާފައިވާނެ ކަމަށް ވާސިފް ވިދާޅުވި އެވެ.
އޭގެ ފަހުން ކޮވިޑް-19 އާ ހެދި ރާއްޖޭގެ އިގްތިސާދަށް އައި ހީނަރުކަމުގެ ސަބަބުން ނިއު އަލުން ގެންނަން ކުރި މަސައްކަތް މަޑުޖެހި އަލުން މަސައްކަތް ފަށަން ބެލިއިރު، ނިއުގެ ދަރަނި އޮތީ ފަސް މިލިއަނަށް ވުރެ ވެސް މަތީގައި ކަމަށް ވާސިފް ވިދާޅުވި އެވެ.
އެހެންވެ، އޭރު ބެލެވުނީ އާ ކްލަބެއް ހަދައިގެން ކުރިއަށް ދިއުމަށް ކަމަށާއި އެހެންވެ، ރޭޑިއަންޓް އުފައްދައި މަސައްކަތް ފެށި ނަމަވެސް އޭއެފްސީގެ ނިންމުމާ އެކު ރޭޑިއަންޓްގެ ކަންކަން މަޑުޖައްސާލައި، އަލުން ނިއު ގެންނަން އަމާޒުހިފީ ކަމަށް ވާސިފް ވިދާޅުވި އެވެ.
ކްލަބް ލައިސަންސިން އާއި އެޑްމިނިސްޓްރޭޝަންގެ އިތުރުން މުސާރައިގެ މައްސަލައިގައި ސަސްޕެންޑްކޮށްފައި އޮތް ވިކްޓަރީ ސްޕޯޓްސް ކްލަބް ވެސް ވަނީ ދާދި ފަހުން އާ ބޯޑެއް އިންތިހާބުކޮށްފަ އެވެ. ވިކްޓަރީން ކްލަބްގެ ދަރަނި ހަމަޖައްސައި، މިހާރު ވަނީ ދެ ވަނަ ޑިވިޝަނަށް ޓީމެއް ވެސް އެކުލަވާލައިފަ އެެވެ.
