މިއަހަރު ހައްޖުގެ އަޅުކަން އަދާކުރުމަށް، އާންމުކޮށް ހުޅުވާލައިގެން ދޫކުރުމަށް ހަމަޖެހިފައިވާ 100 ހައްޖު ކޯޓާއަށް އެދުމުގެ ފުރުސަތު ހައްޖު ކޯޕަރޭޝަނުން އާންމުކޮށް ހުޅުވާލައިފި އެވެ.
މި އަހަރު ރާއްޖެއަށް ލިބިފައިވަނީ 453 ކޯޓާ އެވެ. އޭގެ ތެރެއިން 353 ކޯޓާ ދީފައިވަނީ ހައްޖުގެ އަޅުކަން ކުރުމަށް މައްކާއަށް ދާން ހައްޖު ކޯޕަރޭޝަނަށް ފައިސާ ދެއްކި މީހުންގެ ކިއޫ ލިސްޓު ތަރުތީބުންނެވެ. އެ ލިސްޓުގައި މިވަގުތު 3،500 އަށް ވުރެ ގިނަ މީހުން އެބަ ތިއްބެވެ.
ބާކީ 100 ކޯޓާ އާންމުކޮށް ހުޅުވާލައިގެން ދޫކުރުމަށް މިނިސްޓްރީން ހަވާލުކޮށްފައިވަނީ ހައްޖު ކޯޕަރޭޝަނާ އެވެ.
އެ ކޯޕަރޭޝަނުން މިއަދު ކުރި އިއުލާނެއްގައި ބުނީ މިކޯޓާގައި ހައްޖަށް ދާނެ ފަރާތްތައް ކަނޑައެޅުމަށް ހަމަޖެހިފައިވަނީ ކުރިމަތިލާ ފަރާތްތަކުގެ ތެރެއިން ޝަރުތު ފުރިހަމަވާ ފަރާތްތަކުގެ މެދުގައި އާންމުކޮށް ހުޅުވާލައިގެން ނެގޭ ގުރުއަތަކުން ކަމަށެވެ.
މި ގުރުއަތުގައި 100 މީހުންގެ ޖަގާއަށް ނަގާއިރު، ވެއިޓިންގެ ގޮތުގައި އިތުރު 25 މީހުން ވެސް ނަގާނެ އެވެ. އެއްވެސް ސަބަބަކާ ހުރެ ޖަގާ ލިބޭ ފަރާތަކު ހައްޖަށް ދިއުމަށް އުޒުރުވެރިވެއްޖެނަމަ ނުވަތަ ފައިސާ ނުދެއްކިއްޖެ ހާލަތެއްގައި ވެއިޓް ލިސްޓު ތަރުތީބުން ޖާގަ ދެމުން ދާނެ ކަމަށް އެ ކޯޕަރޭޝަނުން ބުނެ އެވެ.
މި 100 ކޯޓާގައި ހައްޖަށް ގެންދިއުމަށް ކަނޑައެޅިފައިވާ އަގަކީ 76,960.00ރ. އެވެ. މި ކޯޓާގައި ހައްޖަށް ދިއުމަށް ގުރުއަތުން ހޮވުނުކަން އަންގާ ތާރީހުން ފެށިގެން ގިނަވަގެން ތިން ދުވަހުގެ ތެރޭގައި ފައިސާ ދައްކަން ޖެހޭނެ އެވެ.
ހައްޖު ކޯޓާއަށް އެދެވެނީ އުމުރުން 65 އަހަރު ނުފުރޭ ދެ ޑޯޒް ޖަހާފައިވާ މީހުންނަށެވެ. އަދި މީގެ ކުރިން ހައްޖުގެ އަޅުކަން އަދާކޮށްފައިވާ މީހަކަށް ވެގެން ނުވާނެ ކަމަށް ވެސް ބުނެފައިވެ އެވެ.
ހައްޖު ކޯޓާއަށް އެދުމުގެ ފުރުސަތު ހުޅުވާލާފައިވަނީ މި މަހުގެ 30 އިން އަންނަ މަހުގެ ދެ ވަނަ ދުވަހުގެ ނިޔަލަށެވެ.
