ސަރުކާރާއި ރައީސުލްޖުމްހޫރިއްޔާ ވެވަޑައިގެންނަވާ ކޮންމެ ވައުދަކީ ފުއްދޭނެ ވައުދުތަކެއް ނޫން ކަމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެެ.
ސަރުކާރުން ހިންގަމުން އަންނަ ދެ މަޝްރޫއަކާ ގުޅޭގޮތުން ސުވާލު ކުރުމަށް މިއަދުގެ ޖަލްސާއަށް މިނިސްޓަރު އަސްލަމް ވަނީ ހާޒިރުކޮށްފަ އެވެ.
އިތުރު ސުވާލުކުރަން ހުޅުވާލި ފުރުސަތުގައި، ސަރުކާރުން ވެފައިވާ ބައެއް ވައުދުތައް ނުފުއްދި ދިގުލައިގެން ދާތީ އެ ކަމުގެ ކަންބޮޑުވުން ފާޅުކުރެއްވީ ވިލުފުށީ ދާއިރާގެ އެމްޑީޕީ މެމްބަރު ހަސަން އަފީފް އެވެ.
"މިފަދަ ވައުދުތައް ވެވަޑައިގެންނަވާއިރު ސަރުކާރުގެ ތެރޭގައި ކުރެވެނީ ކޮން ކަމެއްތޯ ނުކުރެވޭނީ ކޮން ކަމެއްތޯ މިފަދަ މަޝްވަރާއެއް ހިންގާފަތޯ ވައުދުވަނީ؟ ނޫނީ ހަމަ ވައުދެއް ވުމުގައި ބޭނުމުގައި ވައުދެއް ވަނީތޯ؟" އަފީފް ވިދާޅުވި އެވެ.
އަފީފްގެ ސުވާލަށް ޖަވާބު ދެއްވަމުން އަސްލަމް ވިދާޅުވީ ސަރުކާރަށް ގިނަ ވައުދު ވަނީ ވައުދު ފުއްދުމުގެ ނިޔަތުގައި ނަމަވެސް ވައުދުތައް ވެވިފައި ހުންނަނީ އެ ކަމެއްގެ ހުރިހާ ތަފްސީލެއް ބެލުމެއް ނެތި ކަމަށެވެ. އެކަމުގެ ސަބަބުން، ގިނަ ހުރަސްތަކެއް ވައުދު ފުއްދުމަށް ކުރިމަތިވާ ކަމަށް ވިދާޅުވި އެވެ.
"މި ޖަލްސާގައި މި ތިއްބެވި ސިޔާސީ ބޭފުޅުން، ހުރިހާ ބޭފުޅުން ވެސް ވައުދުވެވަޑައިގެންފައި ހުންނާނެ، ގިނަ ވައުދުތައް އަޅުގަނޑުމެން ފުއްދަން، ނުފުއްދޭ ވައުދުތައް ވެސް ހުރޭ، އަނެއްހެން ރައީސުލްޖުމްހޫރިއްޔާ ކަމުގައި ވިޔަސް، އަޅުގަނޑު ގަބޫލެއް ނުކުރަން ކުން ފަޔަކުން ގެ އުސޫލު ހިނގާ ކަމަކަށް،" އަސްލަމް ވިދާޅުވިއެވެ.
އަސްލަމްގެ ޖަވާބަށް ފަހު، ރިޔާސަތުގައި އިންނެވި ރައީސް މުހައްމަދު ނަޝީދު ވަނީ "ވައުދަކީ" ކޮބައިކަން މެންބަރުންނަށް ސާފުކޮށްދެއްވާފަ އެވެ.
"ވައުދު މި ބަސް ތައާރަފް ވެގެން އައީ 2008 ވަނަ އަހަރުގެ ފުރަތަމަ ރިޔާސީ އިންތިހާބުގައި، ޕްލެޖް މި ބަސް އިނގިރޭސި ބަހުން ތަރުޖަމާވެގެން ދިޔަ ބަހެއްގެ ގޮތުގައި، 2008 ވަނަ އަހަރު ހުށަހެޅުނީ ހަތަރު ވައުދު،" ނަޝީދު ވިދާޅުވި އެވެ.
އެހެން ނަމަވެސް، ފަހުން ސިޔާސީ މައިދާނުގައި "އެކިއެކި ކަންކަން އެއީ މި ބާވަތުގެ ބަރުދަނެއްގައި ވައުދުވެފައިވާ ކަންކަމުގެ ގޮތުގައި" ފާހަގަވެފައިވާ ކަމަށް ނަޝީދު ވިދާޅުވި އެވެ.
