އާންމުންނަށް ނޭނގި، ސިޔާސީ ޕާޓީތަކުގައި ރެޖިސްޓާ ކުރަމުން އަންނަ ކަމަށް ބުނެ އިދިކޮޅު ޕީޕީއެމް/ޕީއެންސީ ކޯލިޝަނުން މަޖިލީހަށް ހުށަހެޅި މައްސަލަ ބަލައި ނުގަނެ، މިއަދު ބޭރުކޮށްލައިފި އެވެ.
ވާނުވާ ނޭނގި ޕާޓީ ބަދަލުވާ މައްސަލަތައް އިތުރުވެފައިވާ ކަމަށާއި އެ ކަމުގެ ސަބަބުން އިޖުތިމާއީ އެތައް މައްސަލަތަކެއް އުފެދި، ރައްޔިތުންގެ ގިނަ ކަންބޮޑުންތައް ހުރި ކަމަށް ބުނެ، މި މައްސަލަ މަޖިލީހަށް ހުށަހަޅާފައިވަނީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ.
"ސިޔާސީ ވަކި ފިކުރެއްގައި މަސައްކަތް ކުރަން ބޭނުންވާ ފަރާތްތަކަށް އެ ހައްގު ގެއްލުމާއި، އަދި އެ ފަރާތްތަކުގެ އިމްތިޔާޒުތަކަށް އުނިކަން ލިބޭފަދަ ކަންކަން ކުރިމަތިވުމާއި ނުހައްގު މާލީ ފައިދާ އާއި ގެއްލުން ސިޔާސީ ޕާޓީތަކަށް ލިބެމުންދިއުމާއި، މަލްޓި ޕާޓީ ސިސްޓަމަށް ރައްޔިތުން ކުރާ އިތުބާރު ކުޑަވުމާއި އާންމު ރައްޔތުންނަށް ގިނަގުނަ ސިޔާސީ އަދި އިޖުތިމާއީ މައްސަލަތައް." އާދަމް ޝަރީފް ހުށަހެޅުއްވި މައްސަލައިގައި ބުނެފައިވެ އެވެ.
އާދަމް ޝަރީފް ހުށަހެޅުއްވި މައްސަލަ މަޖިލީހަށް ބަލައިގަނެ، ބަހުސް ކުރުމާމެދު ގޮތެއް ނިންމަން ނެގި ވޯޓުގައި، 17 މެމްބަރުންގެ ވޯޓާއެކު އެ މައްސަލަ ވަނީ ބޭރުކޮށްލައިފަ އެވެ. އެ މައްސަލަ ބަލައިގަތުމަށް ވޯޓު ދެއްވީ 10 މެމްބަރުންނެވެ.
މި މައްސަލަ މަޖިލީހަށް މިއަދު ހުށަހަޅާފައިވާއިރު، ސިޔާސީ ޕާޓީތަކުގެ މެމްބަރުންގެ ގޮތުގައި ދަފްތަރުކުރުމަށް ޕާޓީތަކުން ހުށަހަޅާ މީހުންގެ މައުލޫމާތު އިލެކްޝަންސް ކޮމިޝަނުން އިއްޔެ ވަނީ އާންމު ކުރަން ފަށާފަ އެވެ. މި ނިންމުމަކީ ސިޔާސީ ޕާޓީތަކުން ހުށަހަޅާ މެމްބާޝިޕް ފޯމުތަކުގެ ސައްހަކަން އިތުރަށް ކަށަވަރުކުރުމުގެ ގޮތުން އީސީން ނިންމާފައިވާ ނިންމުމެއް ކަމަށް އީސީން ބުނެ އެވެ.
