ރައީސް އަބްދުﷲ ޔާމީން އަބްދުލްގައްޔޫމް އަވަހާރަކޮށްލަން 2015 ވަނަ އަހަރު ފިނިފެންމާ ލޯންޗު ގޮއްވާލައިގެން ދިން ހާދިސާ މި ސަރުކާރުން ތަހުގީގު ނުކުރާނެ ކަމަށް އެ މަނިކުފާނު ރޭ ވިދާޅުވެއްޖެ އެވެ.
ޕީޕީއެމުން ރޭ ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ ދައުލަތުން ޔާމީނާ ދެކޮޅަށް ހުރިހާ ހެއްކެއްގެ ގޮތުގައި ކުރީގެ ނައިބު ރައީސް އަހުމަދު އަދީބު ބޭނުން ކުރަމުން އަންނަ ސަބަބު ވަރަށް ސާފުކޮށް ފެންނަން އޮތް ކަމަށެވެ.
"ދައުލަތުން [ކުރީގެ ނައިބު ރައީސް] އަހުމަދު އަދީބާއެކު ހަދާފައި މި އޮތް އެގްރީމަންޓުގައި އެންމެ ބޮޑު ކަމަކަށް މި އޮންނަނީ ފިނިފެންމާ ލޯންޗު ގޮއްވާލި މައްސަލަ މި ސަރުކާރު ދެމި އޮތްހާ ހިނދަކު ތަހުގީގު ނުކުރަން ޝަރުތުކޮށްފައި،" ޔާމީން ވިދާޅުވި އެވެ.
ޔާމީން ވިދާޅުވީ ދައުލަތުން އެ މައްސަލަ ނުބަލާ ދޫކޮށްލުން އެއީ ދައުލަތަށް ލިބިގެންވާ ހައްގެއް ނޫން ކަމަށާއި އެއީ އެ ހާދިސާގައި "ގެއްލުން ލިބުނު މީހުންގެ ހައްގެއް" ކަމަށެވެ. އަދި ގާނޫނުގައި ފުލުހުން ތަހުގީގުކޮށްފައި ނޫނީ ޕީޖީން ތަހުގީގު ނުކުރެވޭ ގޮތަށް އޮންނަ އޮތުން ބަދަލު ކުރަން ޖެހޭ ކަމަށް ވިދާޅުވެ، ޔާމީން ވަނީ ސުޕްރީމް ކޯޓުން އެ ތަހުގީގު އަލުން ބަލަން ޖެހުނު ސަބަބާ ގުޅޭ ގޮތުން ސުވާލުކުރައްވާފަ އެވެ.
"ދިވެހިރާއްޖޭގައި ގާނޫނު އެޕްލައި ކުރުމުގައި ކޮންސިސްޓެންސީއެއް ނޯވޭ، އުސޫލަކަށް ވެސް ތިއަރީއަކަށް ވެސް އެޕްލިކޭޝަނަކަށް ވެސް، ހަމަ ކޯޓު ފަނޑިޔާރު ބަދަލުވީ ކުރީގައި ނިންމާފައި ހުރި ކަންތައްތައް އެއްކޮޅުން އަނެއް ކޮޅަށް ޖެހުމުގެ އިހުތިޔާރު އެބަ ލިބޭ، ދުނިޔޭގެ އެހެން ތަންތަނުގައި މިހެން ނުވޭ." ޔާމީން ވިދާޅުވި އެވެ.
ސެމްޓެމްބަރު 2015 ގައި ރައީސް ޔާމީން ހައްޖަށް ކުރެއްވި ދަތުރުފުޅަށް ފަހު، އެނބުރި ވަޑައިގަތް ދުވަހު، އެ މަނިކުފާނު އިންނެވި ލޯންޗުކޮޅުގައި އެއްޗެއް ގޮވައި ރައީސްގެ އަނބިކަނބަލުންގެ އިތުރުން ރައީސްގެ ބޮޑީގާޑަކާއި ސެކްރެޓަރީއަށް ބޮޑެތި އަނިޔާތައް ލިބުނެވެ. އެ މައްސަލައިގައި ކުރީގެ ނައިބު ރައީސް އަހުމަދު އަދީބަށް މައްޗަށް ޓެރަރިޒަމްގެ ކުށުގައި 15 އަހަރަށް ޖަލަށް ލުމަށް ހުކުމް ކުރި ނަމަވެސް އެ ހުކުމް މިހާރު ވަނީ ބާތިލް ކޮށްފަ އެވެ.
