ގއ. ވިލިނގިލީގައި މިރޭ ހިނގި ލޯންޗު އެކްސިޑެންޓުގައި އަނިޔާވި ތިން މީހުންގެ ހާލު ސީރިއަސް ކަމަށާއި އިތުރު ފަރުވާއަށް މާލެ ގެނައުމުގެ މަސައްކަތް ކުރަމުން އަންނަ ކަމަށް އެ ރަށު ހޮސްޕިޓަލުން މިރޭ ބުނެފި އެވެ.
ފަސް މީހުން ދަތުރު ކުރަމުން ދިޔަ ލޯންޗު އެ ރަށު ފަޅުތެރެއަށް ވަންނަން އުޅުމުގެ ތެރޭގައި ނެރުގައި ޖެހިގެން ހިނގި ހާދިސާގައި ދެ މީހަކު ވަނީ މަރުވެފަ އެވެ. ލޯންޗުގައި ދެން ތިބި އަނެއް ތިން މީހުންނަށް އަންނަނީ އެ ރަށު ހޮސްޕިޓަލުގައި ފަރުވާ ދެމުންނެވެ.
"ތިން މީހުންގެ ހާލު ވެސް ވަރަށް ސީރިއަސް، އެކަކަށް ފަރުވާ ދެމުން އަންނަނީ ވެންޓިލޭޓަރުގައި،" އެ ރަށު ހޮސްޕިޓަލު މެނޭޖަރު އަހުމަދު ޝަރީފް މި ނޫހަށް ވިދާޅުވި އެވެ.
އަހުމަދު ޝަރީފް ވިދާޅުވީ ފަރުވާ ދެމުން އަންނަ މީހުންގެ ބޮލަށް ވަރަށް ބޮޑަށް އަނިޔާވެފައިވާ ކަމަށާއި އެ މީހުންގެ އިތުރު ފަރުވާއަށް މާލެ ގެނައުމުގެ ކަންކަން ހަމަޖައްސަމުން އަންނަ ކަމަށެވެ. އެގޮތުން ޗާޓަރު ފްލައިޓެއްގައި ތިން މީހުން ވެސް މިރޭ މާލެ ގެންދެވޭނެ ކަމަށް އޭނާ ވިދާޅުވި އެވެ.
މި ހާދިސާގައި މަރުވެފައިވަނީ ގއ. ވިލިނގިލީ ދޫރެސް، މިސްބާހު އަބްދުލް މުހުސިން އާއި ނ. ލަންދޫ، އުރަހަ، އަހުމަދު ޝާފިއު ކަމަށް ފުލުހުން ޔަގީންކޮށް ދިނެވެ.
މި ހާދިސާއާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ވަނީ ބުނެފަ އެވެ.
