ސޯލް، ދެކުނު ކޮރެއާ (މޭ 21) - އުތުރު ކޮރެއާއަށް އެހީ އާއި ކޮވިޑް ވެކްސިން ފޯރުކޮށްދޭން އެމެރިކާއިން ހުށަހެޅި ނަމަވެސް "ޖަވާބެއް ނުލިބޭ" ކަމަށް ރައީސް ޖޯ ބައިޑެން ވިދާޅުވެއްޖެ އެވެ.
އުތުރު ކޮރެއާގައި މީގެ 10 ދުވަސް ކުރިން ކޮވިޑް ފެތުރެން ފެށިކަން ރަސްމީކޮށް އިއުލާނު ކުރި އެވެ. މިހާރު 2.5 މިލިއަން މީހުން "ހުން އައިސްފައިވާ" ކަމަށް އެ ގައުމުން ބުނެ އެވެ.
ބައިޑެން ރައީސް ކަމަށް ވަޑައިގެންނެވި ފަހުން އޭޝިއާއަށް ކުރައްވާ ފުރަތަމަ ދަތުރުފުޅުގައި ދެކުނު ކޮރެއާ އަށް ވަޑައިގެން ވިދާޅުވީ އެމެރިކާގެ އިތުރުން ދެކުނު ކޮރެއާއިން ވެސް އެހީ ދޭން ހުށަހެޅި ކަމަށެވެ.
"އަޅުގަނޑުމެން ހުށަހަޅައިފިން ވެކްސިން ފޯރުކޮށްދޭން. އުތުރު ކޮރެއާއަށް އެކަންޏެއް ނޫން، ޗައިނާއަށް ވެސް. އަޅުގަނޑުމެން މި ތިބީ ހަމަ މި ވަގުތު އެހީ ވާން ތައްޔާރަށް،" ސޯލްގައި އޮތް ޕްރެސް ކޮންފެރެންސެއްގައި ބައިޑެން ވިދާޅުވި އެވެ.
"އަޅުގަނޑުމެންނަކަށް ޖަވާބެއް ނުލިބޭ."
އުތުރު ކޮރެއާގެ 25 މިލިއަން މީހުންނަށް ވެކްސިން ޖަހާފައެއް ނުވެ އެވެ. އެހެން ކަމުން ހަލުވިކަމާ އެކު ފެތުރޭ އޮމިކްރޯން ވޭރިއެންޓާ އެކު ގިނަ ބަޔަކު ވަނީ ކުއްލި ގޮތަކަށް ބަލިވެފަ އެވެ.
ހޮނިހިރު ދުވަހު، އުތުރު ކޮރެއާގެ ދައުލަތުގެ މީޑިއާއިން ބުނީ 2.5 މިލިއަން މީހުން "ހުން އައިސްފައިވާ" ކަމަށާއި މިހާތަނަށް 66 މީހުން މަރުވެފައިވާ ކަމަށެވެ.
ބަލިމަޑުކަމާ ދެކޮޅަށް ފެށި ކެމްޕެއިން ވަރުގަދަކޮށްފައިވާ ކަމަށް ވެސް ދައުލަތުގެ ކޭސީއެންއޭ ނިއުސް އެޖެންސީން ބުންޏެވެ.
ކޮވިޑް ބަލިމަޑުކަން މުޅި ދުނިޔެއަށް ފެތުރުމުން، އުތުރު ކޮރެއާއިން ވަރަށް ހަރުކަށިކޮށް ބޯޑަރު ބަންދު ކުރި އެވެ. ތަޖުރިބާކާރުން ބުނީ އަވައްޓެރި ގައުމުތަކުގައި ބަލި ފެތުރޭ ނަމަ، ބޯޑަރު ބަންދު ކުރިޔަސް އުތުރު ކޮރެއާއާ ހަމައަށް ބަލި ފޯރާނެ ކަމަށެވެ.
އުތުރު ކޮރެއާގެ ލީޑަރު ކިމް ޖޮންގް އުން ވިދާޅުވެފައި ވަނީ އެ ގައުމުން އަމަލު ކުރާނީ ޗައިނާގެ މެނޭޖްމަންޓް ސްޓްރެޓެޖީ ބަލައި، އޭގެން ލިބޭ ފިލާވަޅުތަކުގެ އަލީގައި ކަމަށެވެ.
ޗައިނާގައި ގެންގުޅެނީ ޒީރޯ ކޮވިޑްގެ ސިޔާސަތެކެވެ. ބައެއް ބޮޑެތި ސިޓީތައް ލޮކްޑައުންކޮށްފައިވާ އިރު، އެއީ ދެމެހެއްޓެނިވި ސިޔާސަތެއް ނޫން ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ ބުނެފަ އެވެ.
ޗައިނާ އާއި ޑަބްލިއުއެޗްއޯގެ ކޯވެކްސް ސްކީމުން ކޮވިޑް ވެކްސިން ހަދިޔާ ކުރަން އުޅުމުން، އުތުރު ކޮރެއާއިން ކުރިން ބުނީ ބޭނުން ނުވާ ކަމަށެވެ.
