މަރުވެފައި އޮތް ބޮޑު މަހެއް ވ. އަތޮޅު އެތެރެވަރީގައި އޮޔާދާތީ ވ. އަތޮޅު ކައުންސިލުން ފުލުހުންގެ ސަމާލުކަމަށް އެކަން ގެެނެސްފި އެވެ.
މަރުވެފައި އޮތް ބޮޑު މަހެއް ކަނޑުމަތީ އޮއްވައި ފެންނަ މަންޒަރުގެ ވީޑިއޯއެއް ވ. އަތޮޅު ކައުންސިލްގެ ރައީސް ޝުޖާއު އަލީ ވަނީ ޓްވީޓާ މެދުވެރިކޮށް ހިއްސާކުރައްވައިފަ އެވެ.
"މަރުވެފައިވާ ބޮޑު މަހެއް ވ. އަތޮޅު މަޑަންގިރިއޭ ކިޔާ ފަޅު ކައިރިން ފެނިގެން ވ. އަތޮޅު ޕޮލިސް އިން ވަނީ ރިޕޯޓްކޮށްފައި،" ވީޑިއޯއާއެކު ޝުޖާއު ކުރެއްވި ޓްވީޓްގައިވެ އެވެ.
ޝުޖާއު މި ނޫހަށް ވިދާޅުވި ގޮތުގައި މި މަސް އެތެރެވަރީގައި އޮޔާދާކަން ފުލުހުން ކައުންސިލަށް ރިޕޯޓު ކުރީ މިއަދު ހެނދުނު ހަތެއް ޖަހާކަށް ހާއިރެވެ. އެއީ "ފެންނަ ފެނުމަށް" ގާތްގަނޑަކަށް 25 ފޫޓުގެ ދިގުމިނެއްގެ "ހަމްޕްބެކް ވޭލް" އެއް ކަމަށް ބެލެވޭ ކަމަށް އޭނާ ވިދާޅުވި އެވެ.
"އެ ޒާތުގެ މަހަކީ ވ. އަތޮޅު އެތެރެވަރިން އާންމުކޮށްވެސް ފެންނަ އެއްޗެއް، ވަރަށް ގިނައިން މި އަތޮޅު ހުޅިދޫ، އާރަށް، ފެލިދޫ ކައިރިން މީގެ މަސް ފެނޭ،" ޝުޖާއު ކިޔައިދެއްވި އެވެ.
މި ކަން ކަމާ ބެހޭ ހުރިހާ ވުޒާރާއަކާއި އިދާރާއަކަށް ރިޕޯޓް ކޮށްފައިވާ ކަމަށް އޭނާ ވިދާޅުވި އެވެ. އޭގެ ތެރޭގައި ފިޝަރީޒް މިނިސްޓްރީ އާއި، އެންވަޔަރަމެންޓު މިނިސްޓްރީ އާއި، އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) ހިމެނެ އެވެ.
އެ ބޮޑުމަސް އަދި ކަނޑުން ނެގުމުގެ މަސައްކަތެއް ކައުންސިލުން ނުކުރެ އެވެ. ޝުޖާއު ވިދާޅުވި ގޮތުގައި ކައުންސިލުންނާއި ފުލުހުން ވެސް އިންތިޒާރު ކުރަނީ ފިޝަރީޒް މިނިސްޓްރީގެ އިރުޝާދަށެވެ.
"އަދި އެއްވެސް އިދާރާއަކުން އިރުޝާދެއް ނުދޭ، މި ކަމުގައި އަމަލު ކުރާނެ ގޮތެއް، މި ކަމަށް ނެތް ވަކި ހާއްސަ އުސޫލެއް ވެސް،" ޝުޖާއު ވިދާޅުވި އެވެ.
"މަސް ނަގާނީތޯ، ނަގާފައި ބާއްވާނީ ކޮންތާކުތޯ، މަހާ މެދު ދެން އަމަލު ކުރާނީ ކިހިނެއްތޯ، އެކަމަށް މިނިސްޓްރީން އިރުޝާދު ދިނީމައި އަޅުގަނޑުމެން އެ ކަމަކަށް އަމަލު ކުރާނަން،"
މި ކަމުގައި ފިޝަރީޒް މިނިސްޓްރީގެ ބަހެއް ލިބޭ ގޮތެއް ނުވި އެވެ.
