ވަސީލަތްތައް މަދު ގައުމުތަކުގެ ޓީޗަރުންނަށް ދިމާވާ ގޮންޖެހުންތައް ދެނެގަތުމުގެ ގޮތުން ވިލާ ކޮލެޖު އިސްވެ ކުރިއަށް ގެންދާ ބައިނަލްއަގްވާމީ ރިސާޗް ޕްރޮޖެކްޓުގެ ފުރަތަމަ މަސައްކަތު ބައްދަލުވުން ކާމިޔާބު ކަމާއެކު ނިންމާލައިފި އެވެ.
މި ރިސާޗު ކުރިއަށް ގެންދިޔުމުގައި އިސްކޮށް ހުންނެވީ ވިލާ ކޮލެޖުގެ އެސިސްޓަންޓް ޕްރޮފެސަރު ޑރ. އައިޝަތު ނަޝީދާ އެވެ. މިއީ ނޮވެމްބަރު 1، 2021 ގައި އިފްތިތާހު ކުރި ދިރާސާއެކެވެ.
އެގޮތުން، ދިރާސާގެ ފުރަތަމަ ބައްދަލުވުމުގައި މުސްތަގުބަލުގައި ހިންގުމަށް ރާވާ ހަރަކާތްތަކާއި، ލޭންޑްސްކޭޕް މެޕިން އިން ހޯދިފައިވާ ކަންކަމާއި ގުޅޭގޮތުން މަޝްވަރާކޮށްފައިވެ އެވެ. ޓީޗަރުން ތަމްރީނު ކުރުމުގެ ނިޒާމު ރާވައި ހިންގާގޮތާއި، ޕްރޮފެޝަނަލް ޑިވެލޮޕްމަންޓު ކުރިއަށްދާ ގޮތް ދެނެގަތުމަށް ހެދި ލޭންޑްސްކޭޕް މެޕިން ރިޕޯޓު ވެސް އިއްޔެ ވަނީ ޝާއިއުކޮށްފަ އެވެ.
"ދިރާސާގެ މައިގަނޑު ހޯދުންތަކަށް ބަލާއިރު ތިން ގައުމުގައި ވެސް ވަރަށް އެއްގޮތް ކަންކަން އެބަހުރި. ގައުމުތަކަށް ބަލާއިރު ޓީޗަރުންގެ ޑިވެލޮޕްމަންޓު [ކުރިއެރުމަށް ކުރާ ކަންކަން] އާ ގުޅޭ ދިރާސާތަކެއް ހެދިފައެއް ނުވޭ،" ނަޝީދާ ވިދާޅުވި އެވެ.
މިއީ އިންޑިއާގެ ޓާޓާ އިންސްޓިޓިއުޓް އޮފް ސޯޝަލް ސައިންސަސް އަދި ސްވީޑިޝް ކޮމިޓީ އޮފް އަފްގާނިސްތާން އާ ގުޅިގެން ވިލާ ކޮލެޖު އިސްވެ ކުރިއަށް ގެންދިޔަ ދިރާސާއެކެވެ. އަދި، ފަންޑު ކުރީ ކެނަޑާގެ އިންޓަނޭޝަނަލް ޑިވެލޮޕްމަންޓު ރިސާޗު ސެންޓަރާއި ގްލޯބަލް ޕާޓްނާޝިޕް ފޯ އެޑިއުކޭޝަން ރިސާޗް އެންޑް އިނޮވޭޝަނުންނެވެ.
އަފްގާނިސްތާނާއި ނޭޕާލް އަދި ރާއްޖޭގެ މަތީ ތައުލީމު ފޯރުކޮށްދޭ ކޮލެޖުތަކުން މި ދިރާސާގައި ބައިވެރިވެފައިވެ އެވެ. މި ގައުމުތަކުގެ ތައުލީމާއި ތަމްރީނު ފޯރުކޮށްދިނުމުގެ ދާއިރާ އަދި އެ އެ ދާއިރާގައި ހަރަކާތްތެރިވާ މުދައްރިސުންނަށް ކުރިއަށް ދިޔުމުގައި ހުރި ދަތިތަކާއި ގޮންޖެހުންތައް މި ދިރާސާއާ އެކު އެނގިގެންދާނެ އެވެ.
އެގޮތުން، ސަގާފީ ގޮތުންނާއި ގައުމުތަކުގެ ޖިއޮގްރަފީގެ ގޮތުން އަދި އެހެނިހެން ނާޒުކު މައްސަލަތަކުގެ ސަބަބުން ކުރިމަތިވާ މިންތީ މައްސަލަތަކާއި، ޝާމިލްކުރުމާ ގުޅޭ މައްސަލަތަކުގެ އިތުރުން އެހެނިހެން މައްސަލަތަކަށް ވެސް މި ދިރާސާއިން ހައްލު ހޯދަން ވަނީ އަމާޒު ހިފާފަ އެވެ.
