އޭއެފްސީ ކަޕްގެ ދެކުނު އޭޝިއާ ގްރޫޕްގެ ފޭވަރިޓުން ކިޔާއިރު، ގިނަ ބަޔަކު މާޒިޔާ ސްޕޯޓްސް އެންޑް ރެކްރިއޭޝަންގެ ނަން ނުގެނައި ނަމަވެސް އެ ޓީމަށް ވެސް ފުރުސަތު އެބައޮތް ކަމަށް މާޒިޔާގެ ކޯޗު ސާބިއާގެ ކޯޗު މަޔޮޑްރަގް ޖެސިކް ބުނެފި އެވެ.
އޭއެފްސީ ކަޕްގެ ދެކުނު އޭޝިއާ ގްރޫޕް ޑީގެ މެޗުތައް މި ފަހަރު ކުޅެނީ ސެންޓްރަލައިޒްކޮށް، އިންޑިއާގެ ކަލްކަތާގަ އެވެ. މަޝްހޫރު ސޯލްޓް ލޭކް ސްޓޭޑިއަމްގައި ހުރިހާ މެޗެއް ކުޅޭއިރު، މާޒިޔާގެ އިތުރުން ދެން ހިމެނެނީ، އިންޑިއާގެ ދެ ޓީމު ކަމަށްވާ އައި ލީގުގެ ޗެމްޕިއަން، ގޯކުލަމް ކެރަލާ އާއި ސުޕަ ލީގުގެ ޓީމު އޭޓީކޭ މޯހަން ބަގާން އަދި ބަންގްލަދޭޝްގެ ޗެމްޕިއަން ބަޝުންދަރާ ކިންގްސް އެވެ.
މިދިޔަ އަހަރު ސެންޓްރަލައިޒްކޮށް އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ބޭއްވީ މާލޭގަ އެވެ. އޮަގަސްޓް މަހު މެޗުތައް ކުޅުނުއިރު، މާޒިޔާ ތިން މެޗުން ވެސް ވީ ބައްޔެވެ. ފުރަތަަމަ މެޗުގައި ބަޝުންދަރާ ކިންގްސް އަތުން 2-0 އިން ބަލިވި އެވެ.
"މިދިޔަ އަހަރު ހިނގި ކަންތައްތަކަކީ ތާރީހުގައި ހުންނާނެ ކަންތައްތައް. އެއީ މާޒީ. އެ އަށް އަހަންނެއް ނުވިސްނަން. މިދިޔަ އަހަރު ތިބުނިހެން (އަމިއްލަ ގައުމުގައި ކުޅުމުގެ ޕްރެޝަރު އޮތީ ކަމަށް) ވެދާނެ، އެކަމަކު، މި ފަހަަރަކު، ކުުޅުންތެރިންނަކަށް ޕްރެޝަރެއް ނެތް. އަހަރެމެން މި އައީ އަމިއްލަ ފެންވަރު ސާބިތުކޮށްދީ ފުރުސަތު ތަކުގެ ބޭނުންހިފަން،" މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން ޖެސިކް ބުންޏެވެ.
"އަހަރެން ބޭނުމީ އަމިއްލަ ކޮންޓްރޯލް އޮތް ކަންތައްތަކުގެ ބޭނުންހިފައިގެން ރަނގަޅަށް ޕްލޭނެއް ކޮށްގެން މަސައްކަތް ކުރަން. މިއީ ފުޓްބޯޅަ، ނަތީޖާ ނެރެން މަސައްކަތް ކުރުން އޮތީ،"
އެންމެންގެ ނަޒަރުގައި ފޭވަރިޓުންނަކީ އޭޓީކޭ މޯހަން ބަގާން ނޫނީ ބަޝުންދަރާ އަށް ވުމަކީ މަައްސަލައެއް ޖެސިކަށް މައްސަލައެއް ނޫނެވެ. ކޮންމެ ކަމެއް ވެސް މާޒިޔާ އިން ވިސްނާނީ އެ ޓީމަށް ޕޮޒިޓިވް ނަޒަރަކުން ކަމަށް ޖެސިކް ވަނީ ބުނެފަ އެވެ.
"އެންމެން ވެސް ފޭވަރިޓުންގެ ގޮތުގައި މި ކިޔަނީ މި ދެ ކްލަބް (ބަޝުންދަރާ އާއި އޭޓީކޭ) އަށް. އަހަރެމެން އެބަ ގަބޫލުކުރަން ޖެހޭ މީގެ އަހަރެމެންނަށް ވެސް ފުރުސަތު އޮތްކަން. މި އައީ ރަނގަޅަށް ކުޅެ ނަތީޖާ ނެރެން. ކޮންމެ ކުޅުންތެރިއަކު 100 ޕަސެންޓް ދޭނެ. ޕޮއިންޓް ހޯދަން ކުރަން ޖެހޭ މަސައްކަތަށް ފޯކަސް ކުރާނަން. މެޗު ދާ ގޮތް ބަލާފައި، ރަނގަޅު ވަގުތަށް އިންތިޒާރުކުރުން ވެސް އެބައޮތް،" އޭޝިއާ، ޔޫރަޕް އަދި އެފްރިކާގެ ފުޓްބޯޅައިގެ ތަޖުރިބާ ލިބިފައިވާ ކޯޗު ޖެސިކް ބުންޏެވެ.
ޖެސިކް މި ފަހަރުގެ މުބާރާތަށް ތައްޔާރުވަމުން އައިއިރު، އެކަށީގެންވާ މިންވަރަށް ޓީމުތަކުގެ މައުލޫމާތު އެއްކޮށްފައިވާނެ ކަމަށް ޖެސިކް ވަނީ ބުނެފަ އެެވެ.
އޭޓީކޭ މޯހަން ބަގާން ނޫން ދެން ގްރޫޕްގައި އޮތް ތިން ކްލަބް ވެސް ވަނީ ކައިރި މުސްތަގުބަލެއްގައި ލީގު މެޗުތަކެއް ކުޅެފަ އެވެ. އެއީ އޭޓީކޭއާ އަޅާކިޔާއިރު، ދެން އޮތް ޓީމުތަކަށް އޮތް އެޑްވާންޓޭޖެއް ނޫންތޯ އެހުމުން ޖެސިކް ބުނީ ކޮންމެވެސް ވިސްނުމަކުން ބަލާއިރު، އެއީ އެޑްވާންޓޭޖެއް ކަމަށް ބުނެވިދާނެ ކަމަށެވެ. އެކަމަކު، އެއީ އޭޓީކޭ މޯހަން ބަގާން އަށް މާ ބޮޑު ގެއްލުމެއް ކުރިމަތިވާނެ ކަމެއް ނޫން ކަމަށް ޖެސިކް ގަބޫލުކުރެ އެވެ.
"އަހަރެމެންނަށް އެޑްވާންޓޭޖެއް އޮތް ކަމަށް ބެލެވިދާނެ. އެކަމަކު، އޭޓީކޭ އަށް އެނގޭނެ އެ މީހުން ކުރަން ޖެހޭ ކަންތައްތައް. އެ ވަރުގެ ކޮލިޓީ ހުންނާނެ. ދެން، (މާޒިޔާ އަށް) ތިން މެޗު ވެސް ރޭގަނޑު އޮތުމަކީ ފަސޭހައެއް ކަމަށް ގަބޫލުކުރެވޭ،" ޖެސިކް ބުންޏެވެ.
ބަޝުންދަރާ ކިންގްސްގެ ބިދޭސީ ކުޅުންތެރިންނާ މެދު ދެކެނީ ކިހިނެއްތޯ އެހުމުން ޖެސިކް ބުނީ އޭނާ އަކީ އިންޑިވިޖުއަލް ކުޅުންތެރިންނާ ބެހޭގޮތުން ވާހަކަ ދައްކާ މީހެއް ނޫން ކަމަށެވެ. އަމިއްލަ ޓީމު ވިޔަސް އިދިކޮޅު ޓީމު ވިޔަސް ދެކޭގޮތް ހާމަކުރާނީ ޖުމްލަކޮށް މުޅި ޓީމާ ބެހޭގޮތުން ކަމަށް ޖެސިކް ވަނީ ބުނެފަ އެވެ.
މިއީ މާޒިޔާ އިން އޭއެފްސީ ކަޕްގައި ކުޅޭ އަށް ވަނަ ފަހަރެވެ. ލީގު ސީޒަނަށް ބަލާއިރު، މާޒިޔާ އިން އެންމެ ރަނގަޅު ރެކޯޑަކާ އެކު ނުކުންނާނީ މި ފަހަރުގެ އޭއެފްސީ ކަޕަށެވެ. މާޒިޔާ އިން ފުރަތަމަ ޑިވިޝަނުގައި ވާދަކުރަން ފެށި ފަހުން ލީގުގެ ފުރަތަމަ 12 މެޗަށް ފަހު އެންމެ ރަނގަޅު ހިސާބެއްގައި އޮތީ މި ފަހަރު އެވެ. އެ ގޮތުން 12 މެޗު ކުޅެގެން 11 މޮޅު ހޯދިއިރު، 50 ގޯލު ޖެހި އެވެ. ބައިކޮޅަށް ވަނީ އެންމެ ތިން ގޯލެވެ. ފައިދާ ގޯލަކީ 47 އެވެ.
މާޒިޔާ އާއި ބަޝުންދަރާ ކިންގްސް ކުޅޭ މެޗު ފަށާނީ މާދަމާރޭ 20:00 ގަ އެވެ.
