އައްޑޫ ސިޓީގެ ބިން ހިއްކުމުގެ މަޝްރޫއުގެ އަމަލީ މަސައްކަތް އަންނަ ޖުލައި މަހު ފަށާނެ ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެެ.
ރައްޔިތުންގެ މަޖިލީހުގައި ވަޒީރުންނާ ސުވާލުުކުރުމުގެ ވަގުތުގައި މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ ބިން ހިއްކުމުގެ މަޝްރޫއު "ކުންފުންޏަކާ ހަވާލު ކުރިޔަސް" ކުރިއަށް ނުދާތީ އެކަމާ އައްޑޫގެ ރައްޔިތުން ކަންބޮޑުވާ ކަމަށެވެ.
"އަދި އަޅުގަނޑަކަށް ގަބޫލެއް ނުކުރެވޭ ޝެޑިއުލުން ކައްސާލައިގެން ލަސްވެފައި އޮތް ކަމަކަށް ކޮންޓްރެކްޓް ސޮއި ކުރުމަށްފަހު މިއޮތް މަރުހަލާގައި، ކޮންޓްރެކްޓް ސޮއި ކުރުމާ ހަމައަށް ވަގުތުތަކެއް ނެގި ކަމަށް އަޅުގަނޑު ވެސް ގަބޫލުކުރަން،" ޝަރީފްގެ ސުވާލަށް އިޝާރާތް ކުރައްވައި އަސްލަމް ވިދާޅުވި އެވެ.
އަސްލަމް އިތުރަށް ވިދާޅުވީ ބިން ހިއްކުމުގެ މަޝްރޫއު މޮބިލައިޒް ކުރުމުގެ ކުރިން ހުއްދަ ހޯދަން ޖެހޭ ކަންކަން ހުންނަ ކަމަށާއި މިހާރު ކުރިއަށް ދަނީ އެ ކަމުގެ މަސައްކަތް ކަމަށެވެ. އަދި ޖުލައި މަހު މަސައްކަތް ފެށޭނެ ކަމަށް ވިދާޅުވި އެވެ.
"މޮބިލައިޒް ކުރުމުގެ އެގްޒޭކްޓްލީ ކުރިން ކިހާ ވަރެއްގެ ވެއްޔެއްތޯ ކިތައް ތަނުން ވެލި ނަގަން ޖެހޭތޯ ބެލުމަށް ގްރައުންޑް ޓްރޫތިން ހަދަން ކޮންޓްރެކްޓާ ދާނެ، އެހެންވީމަ ޖުލައި މަސްތެރޭގައި އެ ކަމަށް މޮބިއުލައިޒް ކުރާނެ،" އޭނާ ވިދާޅުވި އެވެ.
މަޝްރޫއުގެ ހުލާސާ
އައްޑޫ ބިން ހިއްކުމުގެ މަޝްރޫއު ޕްލޭނިން މިނިސްޓްރީން ނެދަލޭންޑްސްގެ އޫޑް ޑްރެޖިންއާ ހަވާލުކުރީ މިދިޔަ މާޗް މަހުގެ 27ގަ އެވެ.
މި މަޝްރޫއުގެ ދަށުން އައްޑޫގެ ހަތަރު ސަރަހައްދެއްގެ ބިން ހިއްކުމުގެ މަޝްރޫއަކީ އިންޑިއަން އެގްޒިމް ބޭންކުގެ 800 މިލިއަން އެމެރިކާ ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިޔަށް ގެންދާނެ އެވެ. އަދި އައްޑޫގެ ގުދުރަތީ ތިމާވެށި ހިމާޔަތްކޮށް ރައްކާތެރިކުރުމުގެ ގޮތުން، 228 ހެކްޓަރުގެ ބިމުގެ އޭރިޔާއެއް އުފެއްދޭނެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ 'ވަން-އޮފް' މަޝްރޫއުއެއް ވެސް ވަނީ ހުށަހަޅާފަ އެވެ.
މިގޮތުން ރެޒިޑެންޝަލް، ކޮމާޝަލް، އަދި އިންޑަސްޓްރިއަލް ބޭނުންތަކަށް އައްޑޫ ސިޓީގެ ހިތަދޫ، ހުޅުދޫ/މީދޫ (38 ހެކްޓަރު، 5 ހެކްޓަރުގެ 2 ރިސޯޓް ރަށާއި ލައިގެން) އަދި މަރަދޫ/މަރަދޫފޭދޫ (75 ހެކްޓަރު) ގައި ބިން ހިއްކުމަށް ވަނީ ހަމަޖެހިފަ އެވެ.
މި މަޝްރޫއު ކުރިއަށް ގެންދިއުމަށް 6.9 މިލިއަން ކޮޑިމީޓަރުގެ ވެލި ބޭނުންވެ އެވެ. އެއީ ގާތްގަނޑަކަށް 465 ފުޓްބޯޅަ ދަނޑުގެ ތެރެއަށް ދެ މީޓަރު އުސްމިނަށް އަޅާނެހާ ވެއްޔެވެ. އަދި މިކަމަށް ބޭނުންވާ ވެލި ނަގާނީ އައްޑޫގެ އެތެރެވަރިން ދެ ސަރަހައްދަކުންނެވެ.
