ކޮންމެ ދުވަހަކީވެސް ކޮންމެވެސް ސިޔާސީ ޕާޓީއެއް ނުވަތަ ސިޔާސީ ޝަޚްޞިއްޔަތެއްގެ ކޮންމެވެސް މަޖާ ވާހަކައެއް އަޑުއިވޭ ދުވަހެކެވެ. ދެ ލީޑަރެއްގެ ބަހުޘެކެވެ. ޕާޓީތަކުގެ އެތެރޭގެ މައްސަލަތަކެވެ. ކޮންމެވެސް ޕޯޑިއަމެއްގައި އެކެއް އަނެކެއްގެ ޢަބުރު ނަގާލާ ދައްކާ ކޮންމެވެސް "ބޮޑު" ވާހަކައެކެވެ. ފަލަ ސުރުޚީތަކުން އެ ވާހަކަތައް ޖާގަ ހޯދާއިރު، ޙަޤީޤީ މައްސަލަތައް ވަންނަނީ "އިތުރު ޚަބަރުތަކުގެ" ބަޔަށެވެ. އޯޑިއަންސް ނުލިބޭ ބަޔަށެވެ.
ބައެއް ފަހަރު ހިތަށް އަރައެވެ. މިއީ ވެރީން ގަސްދުގައި ކުރާ ކަމެއް ބާވައެވެ؟ ހިތަށް ނާރާންވީ ސަބަބެއް ނެތެވެ. ދެހާހުގެ ކުރީ ކޮޅުގައި، ޚިދުމަތެއް ގޯސްވެފައި އޮތްނަމަ، ގޯހުން ކަމެއް ވެފައި އޮތްނަމަ، އެކަމުގެ އިލްޒާމް އަޅުވަނީ އެންމެ ސަރުކާރެއްގެ ބޮލުގައެވެ. ޒިންމާ ނަގަންޖެހެނީ އެމީހުން އެކަންޏެވެ. އެހެންނަމަވެސް އަވަސް އަވަހަށް ވެރިކަން ބަދަލުވަމުންދާ މި ޒަމާނުގައި ކޮންމެ ފޭލިވުމެއްގެވެސް ޒިންމާ ނަގާނޭ އެތައް ސަރުކާރެއް އެބައޮތެވެ. މިގޮތަށް އެކަކު އަނެކަކަށް ތުހުމަތުގެ އިނގިލި ދިއްކުރުމުގެ ތެރޭ، ޙަޤީޤީ މައްސަލަ ވަޅުޖެހިގެންދެއެވެ. ވާދަވެރިކަމުގެ މަޖާގަނޑުގައި މައްސަލައިގެ މަސްދަރު ގެއްލިގެންދެއެވެ. މިއީ ވަކި މިވެނި ޕާޓީއެއް ބެލުމެއް ނެތި، ވެރީންނަށް އެންމެ ފައިދާ ބޮޑު ގޮތް ތޯއްޗެކެވެ. ގަސްދުގައި ކުރާ ކަމެއްތޯ ސުވާލުކުރެވެނީ މި ސަބަބާ ހުރެއެވެ.
މިއީ ހަމައެކަނި އަހަރެން ދައްކާ ވާހަކައެއް ނޫނެވެ. "ޕޮލިޓެއިންމަންޓް" ތިއަރީ ބުނާގޮތުން، ޓްރާންސްމީޑިއާ ނުވަތަ މީޑިއާގެ ގިނަ މަންސަތަކުން އެއްފަހަރާ މުވާލަތާކުކުރުމުގެ މި ޒަމާނުގައި، މިއަދުގެ ސިޔާސީ މައިދާނުގައި ސިޔާސީ މަޢުލޫމާތަށްވުރެ ބޮޑު ސަމާލުކަމެއް ދެނީވެސް، އަދި ލިބެނީވެސް، ސިޔާސީ ސެލެބްރިޓީން އުފައްދައި އެ މީހުންގެ "ގޮސިޕް" އަޑުއެހުމަށާއި، ސިޔާސީ އެކި ހަރަކާތްތަކަކީ މުނިފޫހި ފިލުމުގެ މަޤްޞަދުގައި ނުވަތަ އެ "ސެލެބްރިޓީން" އިތުރަށް މަޝްހޫރުކުރަން ހިންގާ ކަންތައްތަކެއް ކަމުގައި ހެދުމަށެވެ. އަދި ޕޯސްޓް-ޓްރުތު މުވާސަލާތުގެ، ނުވަތަ، ގިނަ މަސްދަރުތަކަކުން ލިބޭ މަޢުލޫމާތުގެ ތެދު ދޮގު އަމިއްލައަށް ކަނޑައަޅައި، ތެދު މަޢުލޫމާތަކީ ތިމާ އަމިއްލައަށް އޭގެން ފަހުމުކުރާ މަޢުލޫމާތުކަން ޤަބޫލުކުރާ މި ޒަމާނުގައި، ޤައުމީ، ބައިނަލްއަޤުވާމީ އަދި އިންސާނީ ގިނަ މައްސަލަތަކެއްގެ މަޢުލޫމާތަކީ މީހުން ވާވައްދަން ބޭނުންކުރާ ހަތިޔާރެއް ކަމުގައި ސިޔާސީ ލީޑަރުން ހަދާކަމެވެ.
މާ ދުރަކަށް ދާކަށް ނުޖެހެއެވެ. މިއަދުގެ ސިޔާސީ މާހައުލަށް ބަލާލަމާ ބަހީއެވެ. އެންމެ ބާރަށް ދެކެވެނީ ރައްޔިތުންނާ ސީދާ ގުޅުންހުރި ކަންކަމުގެ ވާހަކަތޯ ނުވަތަ ސިޔާސީ ލީޑަރުން ބާރު ދެމެހެއްޓުމަށް އެކި ފެންވަރުގައި ކުރާ މަސައްކަތްތަކުގެ ވާހަކަތޯ ވިސްނާލަމާ ހިނގާށެވެ. އެއް ޕާޓީއަކުން އަނެއް ޕާޓީއަކަށް ކުރާ ތުހުމަތުތަކެވެ. ޕާޓީތަކުގެ އެތެރޭގެ ޒުވާބުތަކުގެ ވާހަކައެވެ. ކޮންމެ ޕާޓީއެއްވެސް، އެ ބައެއްގެ "ޑިމޮކުރަސީވަންތަކަން" ގަދަކޮށް ކަނޑާ ފޮންޏެވެ. ސަރުކާރާއި މަޖިލީހާއި ކައުންސިލްތަކުގެ މަސައްކަތްތަކުގެ ވާހަކަތައް ދައްކާނޭ ދުލެއް، ލިޔާނޭ ގަލަމެއް ނެތޭ ބުންޏަސް ދޮގަކަށް ނުވާނެއެވެ. އެކަހަލަ ވާހަކައެއް ދެއްކި ކަމުގައިވިޔަސް، ނޫހެއްގެ މުހިއްމު ނުވަތަ މަޤުބޫލު ބައިން އެއަށް ޖާގަ ލިބެނީ ވަރަށް މަދު ފަހަރެއްގައެވެ. މަޖިލީހުގެ މަސައްކަތްތައް އެބަ ވިލަރެސް ކުރެވޭހެއްޔެވެ؟ ކައުންސިލްތަކުގެ ޒިންމާ އަދާކުރޭތޯ އެބަ ބެލޭހެއްޔެވެ؟ ސަރުކާރުގެ ސްޓްރެޓީޖިކް އެކްޝަން ޕްލޭނުގައިވާ ލަނޑުދަނޑިތައް ހާސިލުވަމުންދާ މިންވަރު އެބަ ބެލޭހެއްޔެވެ؟ ބައިނަލްއަޤުވާމީ މައިދާނުގައި ރާއްޖެއިން އެހެން ޤައުމުތަކާއި ބައިނަލްއަޤުވާމީ ޖަމިއްޔާތަކާއެކު ވާ އެއްބަސްވުންތަކާއި ފަހުމުނާމާތަކުގެ "ފައިން ޕްރިންޓް" އަހަރެމެންނަށް އެބަ އެނގޭހެއްޔެވެ؟ ރައްޔިތުންގެ ވެރިން ރައްޔިތުންގެ ނަމުގައި ކުރާ ކަންކަން އެބަ އެނގޭ ހެއްޔެވެ؟ އެކަން އެންގުމުގެ ޒިންމާ އޮންނަ ދައުލަތުގެ ހަތަރު ވަނަ ބާރު، މީޑިއާއަށް، އެ ބާރުގެ ޒިންމާދާރުކުރުވުމުގެ މަސްއޫލިއްޔަތު އެބަ އަދާކުރެވޭހެއްޔެވެ؟
ގުދޯ ގުދޯ ގޮވެނީ ދޯއެވެ. ނުގޮވާ ވާކަށް ނެތެވެ. ގޮވައިގެންވެސް އަހަރެމެންގެ ޒިންމާ ހަނދާން ކުރަން އެބަ ޖެހެއެވެ. މީޑިއާއަކީ ސިޔާސީ ލީޑަރުންގެ ގޮނޑިކޮއްކޮއަކަށް ހަދަން ދޫކުރެވިގެން ނުވާނެއެވެ. މީޑިއާ އެކަންޏެއް ނޫނެވެ. ސިވިލް ސޮސައިޓީވެސް މެއެވެ. އުފެދުމުގެ މަޤްޞަދުގައި އިޖުތިމާޢީ ގިނަ މައްސަލަތަކަކަށް ނުވަތަ ނަޒާހަތްތެރިކަމާއި އިންސާނީ ޙައްޤުތަކަށް މަސައްކަތްކުރުން ކަރުދާހުގައި ލިޔެފައި އޮންނަ މަދަނީ ޖަމިއްޔާތައް މަދެއް ނޫނެވެ. މަދީ، އެ ޖަމިއްޔާތަކުގެ މަޤްޞަދު އޮޅުވާނުލައި އިޚުލާސްތެރިކަމާއެކު މަސައްކަތްކުރާ ޖަމިއްޔާތަކެވެ.
ދިވެހިންނަކީ ތަޢުލީމީ އާބާދީއެކެވެ. ލިޔަންކިޔަން ދަންނަ، ޓެކްނިލޮޖީއާ ބަދަހި އާބާދީއެކެވެ. މިނިވަން ޚިޔާލަށް ލޯބިކުރާ އާބާދީއެކެވެ. ޒަމާނީ ޝިޢާރުތަކަށް ލޯހުޅުވިފައިވާ އާބާދީއެކެވެ. އެހެންކަމަށް ވާ ހިނދު، ވަކި ވަކި ފަރުދުން، ޙަޤީޤީ މައްސަލަތައް މަތިން ހަނދާން ނައްތާލުމަށްފަހު ބަޔަކު ސެލެބްރިޓީ ހެދޭނޭ ޖާގަ މި ދެނީ ކީއްވެގެންހެއްޔެވެ؟ ހަމަ ގައިމުވެސް ނުދޭ ސަމާލުކަމެއް ނުލިބޭނެއެވެ. މުނިފޫހިފިލުވުމާއި ކްލަބް މެންޓާލިޓީ އާއި ސިޔާސީ މައިދާން ވަކިކުރަންވީ ދުވަސް އައުން ލަސްވެސްވެއްޖެއެވެ. ސުވާލަކީ، މިހާރު، ޕޮލިޓެނެއިންމަންޓަކީ އަހަރެމެންގެ ދިރިއުޅުމުގެ ވައްޓަފާޅިއަށް ވެފައިވާހިނދު، ސިޔާސީ މައިދާނާއި މުނިފޫހިފިލުވުން ވަކި ކުރެވޭނޭ ހިތްވަރު އަހަރެމެން ގައިގައި އެބަހުރިތޯ ކުރެވޭ ސުވާލެވެ.
