ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕާއި އެ ޕާޓީގެ ސަރުކާރާ ދުރުވެ ހިޔާލު ތަފާތުވުންތަކެއް އުފެދުނީ ކުރިން ހުންނެވި ޕީޖީ ލީޑަރު އަލީ އާޒިމް "ނަފްރަތު" އުފެއްދުމުން ކަމަށް ޗެއާޕާސަންގެ އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއިލް މިރޭ ވިދާޅުވެއްޖެ އެވެ.
އެމްޑީޕީގެ ޗެއާޕާސަންގެ ބަހުސްގައި ފައްޔާޒުގެ މި ވާހަކަތައް ރައްދުކުރެއްވީ މެދު ހެންވޭރު ދާއިރާގެ މެމްބަރު އަލީ އާޒިމަށެވެ. ނަމަވެސް، ބަހުސްގައި ސީދާ އާޒިމްގެ ނަން ވިދާޅެއް ނުވެ އެވެ. ބަދަލުގައި އޭނާއަށް ނިސްބަތްކުރެއްވީ "ކުރީގެ ޕީޖީ ލީޑަރުގެ" ގޮތުގަ އެވެ.
"ޕީޖީ ގްރޫޕްގެ އަސާސީ ގަވާއިދާ ހިލާފަށް، [ދައުރު] ދަންމާލާފައި އޮތް ލީޑާޝިޕްގެ ދަތިކަމެއް ކުރިމަތިވި. ހަގީގަތުގައި ސަރުކާރާއި ޕާޓީ އާއި މަޖިލީހާއި ދުރުވުމުގެ މައިގަނޑު އެއް ސަބަބު ކަމަށް އަޅުގަނޑު ދެކުނީ މީގެ ކުރީގައި ހުންނެވި ޕީޖީ ލީޑަރު ބްރިޖު ކުރަން ވާ ތަނުގައި ނަފްރަތު އުފެއްދެވީމަ،" ފައްޔާޒު ވިދާޅުވި އެވެ.
އަދި، އެގޮތަށް އާޒިމް އަމަލު ނުކުރެއްވިނަމަ އެމްޑީޕީގެ ތެރޭގައި އޮތް ހިޔާލު ތަފާތުވުންތައް ވަރަށް ބޮޑުތަނުން ކުޑަ ކުރެވުނީސް ކަމަށް އޭނާ ވިދާޅުވި އެވެ.
އެމްޑީޕީގެ ޗެއާޕާސަން ކަމަށް ފައްޔާޒު ވާދަކުރައްވަނީ އެ ޕާޓީގެ ކުރީގެ ތަރުޖަމާނު އަދި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)އާ އެވެ. އާޒިމް ތާއީދުކުރައްވަނީ އިންތިއަށެވެ.
ޗެއާޕާސަން އިންތިހާބުގެ ވާދަވެރިކަން ހޫނުވެފައިވާ ދަނޑިވަޅެއްގައި، އެމްޑީޕީ އޮތީ ދެކަފިވެފަ އެވެ. އެގޮތުން އެ ޕާޓީގެ ރައީސް މުހައްމަދު ނަޝީދަށް ތާއީދުކުރާ ފެކްޝަނަކާއި ރައީސް އިބްރާހިމް މުހައްމަދު ސޯލިހުގެ ފެކްޝަނެއް ޕާޓީގެ ތެރޭގައި ވަނީ އުފެދިފަ އެވެ.
ކުރިން ވެސް މި ވާހަކަތައް އަޑުއިވުނު ނަމަވެސް، ދެ ފެކްޝަނުގެ މެދުގައި އޮތް ވާދަވެރިކަން ހާމަކަން ބޮޑު ގޮތެއްގައި ފެންނަން ފެށީ މި އިންތިހާބާ ގުޅުވަ އެވެ. މިހާރު ފާޅުކަން ބޮޑުކޮށް ދެ ފަރާތުން ދަނީ ބަހުގެ ހަމަލާތައް ބަދަލުކުރަމުންނެވެ.
ފައްޔާޒުގެ ވާހަކަތައް ރައްދުކުރި އާޒިމް ވަނީ، މިއަދު ވެސް ފައްޔާޒަށާއި އޭނާގެ ފަހަތުގައި ތިބި އެމްޑީޕީގެ މަޖިލިސް މެމްބަރުންނަށް ފާޑުވިދާޅުވެފަ އެވެ.
އޭނާ މިއަދު ކުރެއްވި ޓްވީޓެއްގައި ވިދާޅުވީ، ފައްޔާޒް ވަކި ކުރުމަށް މިދިޔަ އަހަރު އެމްޑީޕީގެ 33 މެމްބަރުން ސޮއި ކުރެއްވި ކަމަށާއި، މިހާރު އޭނާއަށް ޕާޓީ "ހިންގާލެވޭނެ" ކަމަށް ބުނުމަކީ އޮޅުވާލުމެއް ކަމަށެވެ. އެހެން ނަމަވެސް، އެއީ ކޮން މެމްބަރުންތަކެއް ކަމެއް އޭނާ ހާމަނުކުރައްވަ އެވެ.
އިތުބާރު ނެތް ކަމުގެ މައްސަލަ ހުށަހަޅަން މަސައްކަތް ކުރި ދަނޑިވަޅަކީ، ރައީސް މުހައްމަދު ނަޝީދުގެ ސީރިއަސް ތުހުމަތުތަކެއް ފައްޔާޒަށް ރައްދުވީ ދަނޑިވަޅެކެވެ. އެފަހުން ރައީސް ނަޝީދު އާއި އެމަނިކުފާނުގެ ފަހަތުގައި ތިއްބެވި ބޭފުޅުން ދަނީ ފައްޔާޒަށް ކޮރަޕްޝަންގެ ތުހުމަތުތައް ކުރަމުންނެވެ.
މިފަހަރުގެ އިންތިހާބުގައި ފައްޔާޒާ ދެކޮޅަށް އިންތި ކެމްޕޭން ޓީމުން ބޭނުންކުރާ މައިގަނޑު ތުހުމަތަކީ ވެސް ސަރުކާރުގައި ހުންނަވައިގެން ކޮރަޕްޝަން ހިންގާ، ނުފޫޒު ފޯރުވުމެވެ.
އެކަމަކު މިރޭގެ ބަހުސްގައި ވެސް ފައްޔާޒު ވަނީ މިކަންކަމަށް ރައްދު ދެއްވާ، ސާބިތު ނުހިފޭ ވާހަކަ ނުދައްކަވަން ވިދާޅުވެފަ އެވެ. އަދި ތުހުމަތެއް އޮތްނަމަ ޕާލިމެންޓްރީ އިންކުއަރީއަކަށް ވެސް ޖަވާބުދާރީވާން ތައްޔާރަށް ހުންނެވި ފައްޔާޒު ވިދާޅުވި އެވެ.
އެމްޑީޕީގެ އެތެރޭގެ އިންތިހާބަކީ ސިޔާސީ ޕާޓީއަކުން ރާއްޖޭގައި ބާއްވާ އެންމެ ބޮޑު އެއް އިންތިހާބެވެ. އެ އިންތިހާބުގައި ވޯޓުލުމުގެ ހައްގު ލިބޭ މެމްބަރުންގެ އަދަދު 90،000 އަށް ވުރެ އިތުރެވެ. ނަމަވެސް މީގެ ކުރީގެ އިންތިހާބުތަކުގައި ވޯޓު ދީފައި ވަނީ ހައްގު ލިބޭ މީހުންނާ އަޅާބަލާއިރު އެވްރެޖްކޮށް މަދުންނެވެ.
