ކުޑަ ދެކުއްޖަކަށް ޖިންސީ ގޯނާކުރިކަމުގެ ތުހުމަތަށް ހައްޔަރުކޮށްފައި ހުރި މީހެއްގެ ބަންދުގެ މުއްދަތު އިތުރު ނުކޮށް އިއްޔެ އޭނާ ދޫކޮށްލީ ބަންދުގެ މުއްދަތު އިތުރުކުރަން ހުށަހެޅި އިރު ގާނޫނީ ގޮތުން ފުރިހަމަކުރަން ޖެހޭ އިޖުއާއަތްތައް ފުރިހަމަކޮށްފައި ނުވާތީ ކަމަށް އޭނާ އަލުން ހައްޔަރުކުރަން ނެރުނު އަމުރުގައި ބުނެފި އެވެ.
ކުޑަ ދެކުއްޖަކަށް ޖިންސީ ގޯނާކުރިކަމުގެ ތުހުމަތަށް، 55 އަހަރުގެ އެ ފިރިހެން މީހާ ހައްޔަރުކުރީ އޭޕްރިލް ނުވައެއްގަ އެވެ. އޭރު އޭނާގެ ބަންދަށް ކްރިމިނަކް ކޯޓުން 30 ދުވަސް ދިނެވެ. އޭނާގެ ބަންދުގެ މުއްދަތު ހަމަވުމުން އިއްޔެ ފުލުހުން އަލުން ކޯޓަށް ދިއުމުން ކޯޓުން ނިންމީ އޭނާގެ ބަންދުގެ މުއްދަތު އިތުރުކޮށް ނުދިނުމަށެވެ.
އޭނާ އަލުން ހައްޔަރުކުރަން އެކޯޓުން މިއަދު ނެރުނު އަމުރުގައި ބުނީ 30 ދުވަސް ހަމަވުމަށް ފަހު އަލުން ބަންދަށް އެދުނު އިރު ގާނޫނީ ގޮތުން ފުރިހަމަކުރަން ޖެހޭ ބައެއް ކަންކަން ފުރިހަމަކުރެވިފައި ނުވާ ކަމަށެވެ. އެހެންވެ އޭނާ ދޫކޮށްލީ އެކަންކަން ފުރިހަމަ ކުރުމަށް ފަހު އަލުން ބަންދުކުރުމަށް މަގުފަހިކުރަން ކަމަށް ދެކޭ ކަމަށް ވެސް އެ އަމުރުގައި ވެ އެވެ.
އޭނާ އަލުން ބަންދުކުރަން ދިން އަމުރުގައިވާ ގޮތުން ފުލުހުން ވަނީ އޭނާއާ ދެކޮޅަށް އާ ހެކިތައް ކޯޓަށް ހުށަހަޅައިފަ އެވެ. އަލުން ބަންދުކުރަން އަމުރުދިނީ އެހެންވެ އެވެ.
