އުރީދޫ ދިވެހި ޕްރިމިއާ ލީގުގައި މިއަދު ހަވީރު ސުޕަ ޔުނައިޓެޑް ސްޕޯޓްސް (ސަސް) 2-1 އިން ބަލިކޮށް، ޓީސީ ސްޕޯޓްސް ކްލަބް ލީގުގެ ތިން ވަނަ އަށް ޖެހިލައިފި އެވެ.
ޓީސީ ތިން ވަނަ އަށް އެރީ 12 މެޗުން 17 ޕޮއިންޓް ހޯދައިގެންނެވެ. ހަތަރެއްގައި އޮތް ސަސް އަށް ވަނީ 12 މެޗުން 14 ޕޮއިންޓް ލިބިފަ އެވެ. ޔުނައިޓެޑް ވިކްޓްރީ (ޔޫވީ) ފަސް ވަނައިގައި އޮތީ 11 މެޗުން 14 ޕޮއިންޓާ އެކު އެވެ. ޔުނައިޓެޑް ވިކްޓްރީ މާދަމާރޭ ކުޅޭނީ ދެ ވަނައިގައި އޮތް ކްލަބް އީގަލްސްއާ އެވެ.
ގަލޮޅު ދަނޑުގައި ކުޅުނު މިއަދުގެ މެޗުގައި ފުރަތަމަ ހަމަލާ ފޮނުވާލީ ޓީސީންނެވެ. މެޗުގެ ތިން ވަނަ މިނިޓްގައި ޓީސީގެ ކަނާތު ބެކް، އަބްދުލް ވާހިދު އިބްރާހިމް (ވާޑު) ނެގި ހުރަހަކުން އެ ޓީމުގެ މިސްރު ފޯވާޑް އޮމަރު ސަލާހު ބޮލުން ޖެހި ބޯޅަ އަމާޒުވީ ސަސްގެ ކީޕަރު މުހައްމަދު ޝަފީއު (ޗެކް) އަތަށެވެ.
ސަސްގެ ފުރަތަަމަ ހަމަލާ ފެނުނީ ނުވަ ވަނަ މިނިޓްގަ އެވެ. ސަސްގެ ކެޕްޓަން ޔަސްފާދު ހަބީބު (މުލަކޭ) ހުސްކޮށްލާފައި އެ ޓީމުގެ ރިހާމް އަބްދުލް ގަނީ (ބޮބީ) އަށް ދިން ބޯޅަ އޭރިއާތެރެއިން ފޮނުވާލި ނަމަވެސް ދިޔައީ ހުރަސްދަނޑިމަތިންނެވެ.
ޓީސީން ލީޑުނަގަން މެޗުގެ 15 ވަނަ މިނިޓްގައި ހަމްދޫން އަބްދުލް ލަތީފަށް ރަނުގެ ފުރުސަތެއް ލިބުނެވެ. ސަސްގެ ކީޕަރު ޝަފީއު ޖެހި ބޯޅައެއް ލިބުމުން، ހަމްދޫން ގޯލަށް ފޮނުވާލަން ޖެހި ބޯޅަ ދިޔައީ ހުރަސްދަނޑިމަތިންނެވެ.
އެކަމަކު، އޭގެ ހަތް މިނިޓް ފަހުން ޓީސީގެ ކުރިއަށް ކުޅޭ އައިހަމް ހަމްދޫން ވަނީ ލިބުނު ފުރުސަތުގެ ބޭނުންހިފައި ޓީސީ އަށް ލީޑުނަގައިދީފަ އެވެ. ކޯނަރަކުން ސަސް އޭރިއާތެރެއަށް ހުރަސްވި ބޯޅަ ކީޕަރު ޝަފީއު އަތުގައި ޖެހިފައި އޭރިއާތެރެއަށް ވެއްޓުމުން ހަމްދޫން ވަނީ ގޯލަށް ބޯޅަ ފޮނުވާލައިފަ އެވެ.
ޓީސީގެ އައިހަމް ހަމްދޫން ގޯލު ޖެހުމަށް ފަހު އުފާފާޅުކުރަނީ: މިއީ އުމުރުން 18 އަހަރުގެ އައިހަމް ފުރަތަމަ ޑިިވިޝަނުގައި ޖެހި ފުރަތަމަ ގޯލު.
ސަސް އިން ނަތީޖާ ހަމަހަމަކުރަން ކުރިއަށް ޖެހިގެން ކުޅެމުންދިޔައިރު، 32 ވަނަ މިނިޓްގައި އެ ޓީމުގެ މުހައްމަދު ސާމިރު ޖެހި ހިލޭޖެހުން ޓީސީގެ ސްރީ ލަންކާ ކީޕަރު ސުޖަން ޕެރޭރާ ވަނީ މަތަކޮށްފަ އެވެ.
ސަސް އިން އެއްވަރުކުރީ މެޗުގެ 42 ވަނަ މިނިޓްގައި މުލަކޭ އެވެ. ސަސްގެ މުހައްމަދު ސަހާއު (ބޭލް) ޓީސީގެ ޑިފެންސް ފަހަތަށް ހުސްކޮށްލާފައި ކުޅުނު ބޯޅަ ހިފައިގެން ވަދެ، މުލަކޭ ފޮނުވާލި ޝޮޓް ބްލޮކްވެފައި ރީބައުންސް ބޯޅަ ވެއްޓުނީ ގޯލު ކުރިމައްޗަށެވެ. ހުސްކޮށް އޮތް ގޯލަށް ބޯޅަ ވައްދާލައި، މުލަކޭ ސަސް އަށް އެއްވަރުކޮށްދިނެވެ.
ނަތީޖާ ހަމަހަމަކުރިތާ ތިން މިނިޓް ފަހުން ސަސް އަށް ލީޑުނަގައިދޭން މުލަކޭ އަށް މުޅިން ހުސްކޮށް ލިބުނު ފުރުސަތެއްގައި ޓީމު އެހެން ކުުޅުންތެރިއަކަށް ނުދީ ޖަހަން އުޅުމުން އެ ބޯޅަ ގެއްލުނީ އެވެ. މުލަކޭއާ އެކު ގޯލަށް ބޯޅަ ފޮނުވާލަން އެރި ސަސްގެ އަލީ ނަސޫހު ރަޝީދު (ޕިލާ)ގެ ބޭނުންހިފިނަމަ އެ ފުރުސަތުގައި ގޯލެއް ޖެހޭނެ ޖާގައޮތެވެ.
ދެ ވަނަ ހާފްގެ ކުޅުން ފަށައިގެން މާގިނައިރެއްނުވެ ސަސްގެ ޕިލާ އަށް ލިބުނު ހުސް ފުރުސަތުން ޖެހި ބޯޅަ ދިޔައީ ގޯލު ކުރިމަތިން ހުރަސްވެގެންނެވެ. މެޗުގެ 63 ވަނަ މިނިޓްގައި ސަސްގެ އޮފްސައިޑް މަޅިން ސަލާމަތްވެ، ޓީސީގެ އައިހަމް ޖެހި ބޯޅަ ކީޕަރު ޝަފީއު ވަނީ ކޯނަރަކަށް ބޭރުކޮށްލައިފަ އެވެ. އެ ކޯނަރު ނެގުމުގެ ކުރިން އައިހަމް ހަމްދޫން ބަދަލުގައި މުހައްމަދު މުސްލިހު (މުއްޓި) ވަނީ ކުޅެން އަރުވައިފަ އެވެ. އެ ކޯނަރުން މުއްޓި ވަނީ ގޯލު ޖަހައިފަ އެވެ. ކުޅެން އެރި ގޮތަށް ލިބުނު ފުރަތަމަ ފުރުސަތުން ބޮލުން ގޯލަށް ބޯޅަ ފޮނުވާލައި، ޓީސީ އަށް އަލުން ލީޑުނަގައިދިނެވެ.
ލީޑުފުޅާކުރަން ޓީސީގެ މުއްޓި އަށް ލިބުނު ފުރުސަތުން އޭނާ ޖެހި ބޯޅަ ސަސްގެ ޑިފެންޑަރުން ބްލޮކްކުރިއިރު، އޮމަރު ޖެހި ބޯޅަ ސަސްގެ ކީޕަރު ޝަފީއު ވަނީ ހުއްޓުވައިފަ އެވެ.
ސަސް އިން ނަތީޖާ ހަމަހަމަކުރަން ކުރިއަށް ޖެހިގެން ކުޅުނު ވަގުތު ދެ ޕެނަލްޓީއެއް ހޯދަން އެޕީލްކުރި ނަމަވެސް ރެފްރީ ރައޫފް ރައީފް ނިންމީ ޕެނަލްޓީ ދޭން ނުޖެހޭ ކަމަށެވެ. ރެފްރީގެ ނިންމުންތަކަށް މެޗަށް ފަހު ސަސްގެ ކުޅުންތެރިންނާއި އޮފިޝަލުން ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފަ އެވެ.
ލީގުގައި މިރޭ ކުޅޭނީ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ކްލަބް ގްރީން ސްޓްރީޓްސް އެވެ. މެޗު ފަށާނީ 9 ޖަހާއިރު އެވެ.
