ސިޓީ ކައުންސިލް މެންބަރު ނަހުލާ ޕީޕީއެމްއިން ވަކިކުރަން ނިންމައިފި

މާލޭ ސިޓީ ކައުންސިލްގެ ވިލިމާލެ ދާއިރާގެ މެންބަރު ނަހުލާ އަލީ ޕީޕީއެމްއިން ވަކިކުރަން އެ ޕާޓީގެ ސުލޫކީ ކޮމިޓީން މިރޭ ނިންމައިފި އެވެ.

ނަހުލާ އަދި އޭނާގެ މަންމަ ލީލާއާ ގުޅޭ ގޮތުން ޕީޕީއެމްއިން ސުލޫކީ މައްސަލައެއް ބަލައި, މިރޭ ބޭއްވި ބައްދަލުވުމުގައި އެ މައްސަލާގެ ރިޕޯޓް ވަނީ ފާސްކޮށްފަ އެވެ. މި ނޫހަށް ކަށަވަރުވެފައިވާ ގޮތުގައި, ބައްދަލުވުމުގައި ނިންމާފައިވަނީ ނަހުލާ ޕާޓީން ވަކިކުރުމަށެވެ.

ނަމަވެސް, މިކަމާ ގުޅޭ ގޮތުން ޕީޕީއެމްއިން ރަސްމީކޮށް އަދި އެއްޗެއް ނުބުނެ އެވެ. ނަހުލާ މި ނޫހަށް ވިދާޅުވި ގޮތުގައި, އޭނާއަށް މިހާތަނަށް އެކަން އަންގާފައިނުވެ އެވެ.

ޕީޕީއެމްއިން ކުރިމް ނެރުނު ނޫސް ބަޔާނެއްގައި ބުނީ ނަހުލާ އޭނާގެ ސޯޝަލް މީޑިއާ އެކައުންޓްތަކުގައި ޕާޓީ އާއި ޕާޓީ ލީޑާޝިޕާއި ގުޅޭގޮތުން ބަދުނާމްވާގޮތަށް ހަގީގަތާ ހިލާފް ވާހަކަތަކެއް ދައްކާފައިވާ ކަމަށެވެ.

ޕީޕީއެމްއިން ބުނީ ނަހުލާ އެ ޒާތަށް ވާހަކަދައްކާފައިވަނީ ވިލިމަލެ ދާއިރާގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ޕީޕީއެމްއިން ނެރުނު ކެންޑިޑޭޓާ ދެކޮޅަށް އެންޓި ކެމްޕޭންކޮށް އިދިކޮޅު ކެންޑިޑޭޓަށް ތާއިދު ހޯދަން މަސައްކަތްކުރާ ކަމުގެ މައުލޫމާތު ޕާޓީއަށް ލިބުނު ފަހުން ކަމަށެވެ.

"މީގެ އިތުރުން ވެސް، މި ޕާޓީގެ ރައީސްގެ ނަންފުޅު ބޭނުންކޮށް، ދޮގު ވާހަކަތައް ދައްކައި މެމްބަރުންގެ މެދުގައި ނުތަނަވަސްކަން އުފައްދައި، ފިތުނަ އުފެދޭ ވާހަކަތައް (ނަހުލާ) ދައްކަމުން ގެންދާކަން ވެސް ފާހަގަކުރަން،" ޕީޕީއެމްއިން ނެރުނު ބަޔާނުގައި ބުނެ އެވެ.

ނަހުލާއާ ގުޅޭ ސުލޫކީ މައްސަލައެއް ބަލަން ފެށުމުން އޭނާ ވަނީ ސޯޝަލް މީޑިއާގައި ކުރެވޭވ ތުހުމަތުތައް ދޮގު ކުރައްވާފަ އެވެ. އަދި, މާލޭ ސިޓީ ކައުންސިލްގެ ހުޅުމާލެ ދާއިރާގެ މެންބަރު އިބްރާހިމް ޝުޖާއު, އޭނާއަށް އިންޒާރުދީ ޕާޓީން ވަކިކުރަން މަސައްކަތް ކުރަމުންދާ ކަމަށް ނަހުލާ ވިދާޅުވެފައިވެ އެވެ.

އޭނާ ތުހުމަތު ކުރައްވާ ގޮތުގައި, ސިޓީ ކައުންސިލްގެ ތެރޭން ޝުޖާއު ގެންދަވަނީ އޭނާއަށް އެކި ކަހަލަ އިންޒާރުތައް ދެމުންނެވެ. އަދި, ޝުޖާއު މަސައްކަތް ކުރައްވަނީ ރައީސް އަބްދުالله ޔާމީން ނޫން އެހެން ބޭފުޅަކު, ރައީސް ކަމަށް ގެންނަން ކަމަށް ވެސް ނަހުލާ ވަނީ ތުހުމަތު ކުރައްވާފަ އެވެ.

ލޯކަލް ކައުންސިލް އިންތިހާބުގައި ކާމިޔާބު ހޯދައި, ކައުންސިލް މެންބަރު ކަމަށް ނަހުލާ އިންތިހާބުވުމާ ހަމައިން ވެސް ދޭތެރެ ދޭތެރޭން ޕީޕީއެމްގެ އިސް ބައެއް ބޭފުޅުންނާ އޭނާއާ މައްސަލަ އެކި ފަހަރު މަތިން ޖެހިފައިވެ އެވެ. ކައުންސިލްގެ ޑެޕިއުޓީ މޭޔަރު ހޮވި ދުވަސްވަރު ވެސް އެ ހިޔާލު ތަފާތުވުންތައް ބޮޑުވެގެން ދިޔަ އެވެ.