އަތޮޅު ތެރޭގައި ގެދޮރު އިމާރާތްކުރަން ބޭނުންވާ ފަރާތްތަކަށް ސަރުކާރުން ތައާރަފުކޮށްފައިވާ "ގެދޮރުވެރިޔާ" ލޯނަށް އެދި ހުށަހެޅި ފަރާތްތަކުގެ ތެރެއިން 158 ފަރާތެއްގެ އެޕްލިކޭޝަން ބަލައިގަނެ ލޯނު ދޫކޮށްފައިވާނެ ކަމަށް ހައުސިން ޑިވެލޮޕްމަންޓް ފައިނޭންޝަލް ކޯޕަރޭޝަން (އެޗްޑީއެފްސީ) އިން މިއަދު ބުނެފި އެވެ.

އެޗްޑީއެފްސީން "އަދަދު"އަށް ހިއްސާކުރި ތަފާސްހިސާބުތަކުގައިވާ ގޮތުން މިހާތަނަށް 381 މީހަކު އެ ލޯނު ސްކީމަށް ހުށަހަޅާފައިވެ އެވެ. އޭގެ އަގު ޖުމުލަ 236,650,822 (236.7 މިލިއަން) ރުފިޔާއަށް އަރަ އެވެ.

އޭގެ ތެރެއިން މިހާތަނަށް އެޕްރޫވް ކޮށްފައިވާ 158 އެޕްލިކޭޝަނެވެ. އެއީ, ޖުމުލަ 84,671,990 ރުފިޔާ އެވެ. އެ ފައިސާ ދޫކޮށްފައިވާ ކަމަށް އެޗްޑީއެފްސީން ބުނެ އެވެ.

މި ލޯނުގެ ތެރެއިން އެއް ފަރުދަކަށް އެންމެ ގިނަވެގެން ދޫކުރަނީ ހަތް ލައްކަ ރުފިޔާ އެވެ.

މީގެ ތެރެއިން އެންމެ ގިނަ ހުށަހެޅުމެއް ލިބިފައި ވަނީ ގއ. އަތޮޅުން ކަމަށް އެޗްޑީއެފްސީން ބުންޏެވެ. އެނގިފައިވާ ގޮތުގައި ގއ. ވިލިނގިލިން ގިނަ އަދަދެއްގެ ބަޔަކު ވަނީ ލޯނަށް އެޕްލައި ކޮށްފަ އެވެ.

ގެދޮރުވެރިޔާ ލޯނުގެ ތަފްސީލް

ލޯން ދޫކުރާނީ އަމިއްލަ ގޯތީގައި އަލަށް ގެއެއް އަޅަން ނުވަތަ ނުނިމި ހުރި މަސައްކަތްތައް ކުރަން.

• ހަދަން ފަށާފައި ނުނިމި ހުރި އިމާރާތަށް ބައެއް އިތުރުކުރަން ވެސް ލޯނަށް އެދެވިދާނެ.
• އެކަކަށް އެންމެ ގިނައިން ދޫކުރަން ނިންމާފައި ވަނީ 700,000ރ.
• 15 އަހަރަށް ބަހާލުމުން މަހަކު ދައްކަން ޖެހޭނީ 5,907ރ.
• 16 އަހަރަށް ބަހާލުމުން މަހަކު ދައްކަން ޖެހޭނީ 5,680ރ.
• 17 އަހަރަށް ބަހާލުމުން މަހަކު ޖެހޭނީ 5,485ރ.
• 18 އަހަރަށް ބަހާލުމުން މަހަކު ދައްކަން ޖެހޭނީ 5,307ރ.
• 19 އަހަރަށް ބަހާލުމުން މަހަކު ދައްކަން ޖެހޭނީ 5,153ރ.
• 20 އަހަރަށް ބަހާލުމުން މަހަކު ދައްކަން ޖެހޭނީ 5,015ރ.

މި ލޯނަށް އެދޭ މީހާގެ ނަންމަތީގައި އަމިއްލަ ބިމެއް ރަޖިސްޓްރީވެފައި އޮންނަން ޖެހެ އެވެ. އަދި އެ ބިން ލިބިފައިވާ ރަށުގެ ރަށްވެއްސަކަށް ވުމާއި އެ ރަށުގައި އާއިލާއެކު ދިރިއުޅޭތާ މަދުވެގެން ތިން އަހަރު ވެފައިވާން ޖެހެ އެވެ.

އޭގެ އިތުރުން އެޕްލިކޭޝަން ހުށަހެޅުމުގައި ގޯތީގެ ވެރިފަރާތުގެ އިތުރުން ޝަރުއީ ގޮތުން ވާރުތަވާ މަދުވެގެން އެކަކު ކޯއެޕްލިކަންޓެއްގެ ގޮތުގައި ބައިވެރިވާން ޖެހެ އެވެ.

މިދިޔަ އަހަރުގެ ޖޫން މަހުގެ 14 ވަނަ ދުވަހު، ހައުސިން މިނިސްޓްރީ އާއި އެޗްޑީއެފްސީ ގުޅިގެން ތައާރަފް ކުރި މި ލޯން ސްކީމަކީ ހަ ޕަސެންޓްގެ އިންޓްރެސްޓް ރޭޓުގައި މަހަކު ކުޑަ އިންސްޓޯލްމަންޓެއް ދައްކައިގެން 20 އަހަރު ދުވަހުން އަދާ ކުރަން ޖެހޭ ލޯނެކެވެ.

މިއީ މިހާރު ރާއްޖޭގައި ހުރި ކޮމާޝަލް ބޭންކުތަކާއި މާލީ އިދާރާތަކުން ދޫކުރާ ހައުސިން ލޯނުތަކުގެ އިންޓްރެސްޓް ރޭޓަށް ވުރެ ގާތްގަނޑަކަށް ދެބައިކުޅަ އެއްބައި ކުޑަ އަދަދެކެވެ.

ނަމަވެސް، ހަތް ލައްކަ ރުފިޔާއަކީ ގެދޮރު އިމާރާތްކުރަން އެކަށީގެންވާ އަދަދެއް ނޫން ކަމަށް ބުނެ ގިނަ ބަޔަކު ދަނީ ޝަކުވާ ކުރަމުންނެވެ. އެއާއެކު އެ އަދަދު އިތުރުކުރަން ވިސްނަމުންދާކަމަށް ރައީސް އިބްރާހިމް މުހައްމަދު ސޯލިހު ދާދި ފަހުން ވަނީ ވިދާޅުވެފަ އެވެ.