މާފުށީގައި ރޭ ދިވެއްސަކަށް ވަޅިން ހަމަލާ ދޭން އުޅުނު ކަމުގެ ތުހުމަތުގައި ދެ މީހަކު މިއަދު ހެނދުނު މާލެއިން ހައްޔަރުކޮށްފި އެވެ.
ފުލުހުން ބުނީ ހައްޔަރުކޮށްފައި ވަނީ 20 އަހަރުގެ މީހަކާއި 21 އަހަރުގެ މީހެކެވެ. އެ ދެ މީހުންނަކީ ވެސް ދިވެހި ދެ ފިރިހެނުންނެވެ. އެ ދެ މީހުން ހައްޔަރު ކުރީ މިއަދު ވަރަށް ހެނދުނު މާލެ އައި ތަނުންނެވެ.
އެ މީހުން ތޫނު އެއްޗަކުން ހަމަލާ ދޭން އުޅުނު މައްސަލަ މާފުށީ ޕޮލިސް ސްޓޭޝަނަށް ހުށަހެޅީ ރޭގައި ކަމަށް ފުލުހުން ބުންޏެވެ.
މި ނޫހަށް އެނގިފައިވާ ގޮތުގައި ހައްޔަރުކުރި ދެ މީހުން ހަމަލާ ދޭން އުޅުނު މީހާގެ ސަލާމަތްވީ ދުވަމުން ގޮސް މާފުށީ ޕޮލިސް ސްޓޭޝަނަށް ވަނުމުންނެވެ. މައްސަލަ ހުށަހެޅީ އެ ވަގުތު ކަމަށް އެނގިފައިވެ އެވެ.
މި މައްސަލަ ތަހުގީގު ކުރަމުން އަންނަ އިރު، ހައްޔަރުކުރި ދެ މީހުންގެ ބަންދަށް ކްރިމިނަލް ކޯޓުން 15 ދުވަސް ޖަހައިދީފައިވާ ކަމަށް ފުލުހުން ބުންޏެވެ.
