ށ. ފޯކައިދޫން މާލެއަށް ދަތުރުކުރަމުން ދިޔަ ބޯޓެއް ޅ. ފެލިވަރު ފަރަށް އެރުމާ ގުޅިގެން އެ ސަރަހައްދުގައި ފުލުހުން ހަރަކާތްތެރިވާން ފަށައިފި އެވެ.
ފުލުހުން ހިއްސާކުރި މެސެޖެއްގައި ބުނި ގޮތުގައި މި ބޯޓު ފަރަށް އެރި އިރު އަންހެނުންނާއި ކުޑަކުދިން ހިމެނޭހެން 130 މީހުން ދަތުރުކުރަމުން ދިޔަ އެވެ.
އެ ހާދިސާގެ ރިޕޯޓު ފުލުހުންނަށް ލިބުނީ ރޭގަނޑު 8:31 ގަ އެވެ. މިހާރު އެ ސަރަހައްދުގައި ފުލުހުންގެ ލޯންޗުތައް ދަނީ ހަރަކާތްތެރިވަމުން ދިޔަ ނަމަވެސް ހާދިސާއާ ގުޅޭ އިތުރު މައުލޫމާތެއް ފުލުހުން ނުދެ އެވެ.
"ފުރާގު-2" ބޯޓު ފަރަށް އެރި ޖީޕީއެސް ލޮކޭޝަން: މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ މައުލޫމާތު އަދި ނުލިބޭ.
މި ނޫހަށް މައުލޫމާތު ލިބިފައިވާ ގޮތުގައި ފަރަށް އެރި ބޯޓަކީ "ފުރާގު-2" ނަމަކަށް ކިޔާ ބޯޓެކެވެ. ފަރަށް އެރީ ރޭގަނޑު 8:30 ހާއިރު އެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާ ކަމަށް މައުލޫމާތު ލިބެ އެވެ.
