މިދިޔަ އަހަރުގެ މޭ މަހުގެ ހަވަނަ ދުވަހު ރައްޔިތުންގެ މަޖިލިސް ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން މަޖިލީހުން ހެދި އިންކުއަރީ ރިޕޯޓުގައިވާ އެއްވެސް ކަމެއް ފުރިހަމައަށް ތަންފީޒުވަމުންނުދާ ކަމަށް އެ މަޖިލިހުގެ ނައިބު ރައީސް އީވާ އަބްދުﷲ ވިދާޅުވެއްޖެ ވިދާޅުވެއްޖެ އެވެ.
ނަޝީދަށް ދިން ހަމަލާއަށް އަހަރެއް ފުރުމާ ދިމާކޮށް މަޖިލީހުގެ ނައިބު ރައީސްގެ ހައިސިއްޔަތުން އީވާ މިއަދު އިނގިރޭސި ބަހުން ނެރުއްވި ބަޔާނެއްގައި ވިދާޅުވީ އިންކުއަރީގެ ލަފާތައް ތަންފީޒު ނުކުރުމަކީ ބަލައިނުގަނެވޭނެ ކަމަށެވެ.
އަމާންކަމާއެކު ސިޔާސީ ލީޑަރުންނަށް ރައްޔިތުންނަށް ފަސޭހައިން ބައްދަލުކުރެވޭނެ މާހައުލެއް ގާއިމުވެފަ އޮތުމަކީ ޑިމޮކްރެސީގެ އަސާސެއްކަމަށް އީވާގެ ބަޔާނުގައި ވިދާޅުވެފައިވެ އެވެ.
އީވާ ވަނީ ހަމަލާގެ ތަހުގީގާއި އެ ހަމަލާ ދިނުމުގައި ހިމެނޭ މީހުން ޝަރީއަތްތައް ލަސްވުމުގެ ސަބަބުން ރާއްޖޭގެ އެންމެ ބޮޑު ސިޔާސީ ޕާޓީގެ ލީޑަރުގެ ހައިސިއްޔަތުން ނަޝީދަށް އެމަނިކުފާނު އެންމެ ގަޔާވާ މަސައްކަތް ކަމުގައިވާ، ރައްޔިތުންނާ ބައްދަލުވެ އުޅުމަށް ހުރަސްއެޅި، ސެކިއުރިޓީ ކޯޑަންއެއްގެ ފަހަތުގައި ދިރިއުޅެން މަޖުބޫރުވެފައިވާކަމަށް ވިދާޅުވެފަ އެވެ.
އަދި މަޖިލިސް ރައީސްގެ ހައިސިއްޔަތުން ވެސް އަދާކުރައްވަން ޖެހޭ ޒިންމާތަކަށް އެކަމުގެ ސަބަބުން އަސަރުކުރާކަމަށް އީވާ އެ ބަޔާނުގައި ވިދާޅުވި އެވެ. އީވާ އިތުރަށް ވިދާޅުވީ، ތަހުގީގާއި ޝަރީއަތްތަކުގައި ހުރި މައްސަލަތަކުގެ ސަބަބުން ހަމަލާގައި ދެން ހިމެނޭ މީހުންނަށް ފިލަން ފަސޭހަވެ ނުވަތަ ބިރަކާ ނުލާ މުޖުތަމައުގައި ދިރިއުޅެން ވެސް ފުރުސަތު ލިބިގެންދާކަމަށެވެ.
އޭގެ އިތުރުން ވެސް އީވާ ވަނީ ހަމަލާދިނުމުގައި އަމަލީ ގޮތުން ބައިވެރިވި މީހުން ހައްޔަރުކޮށްފައިވީ ނަމަވެސް ހަމަލާ ދޭން ސްޕޮންސާކުރި ނުވަތަ ފައިސާ ދީ ފަންޑުކުރި މީހުން، ހަމަލާދޭން ވިސްނުވައިދިން މީހުން އަދި އެހެން ގޮތްގޮތުން ވެސް އެހީތެރިވެދިން މީހުން ހޯދިފައި ނުވާތީ އެކަމާ ކަންބޮޑުވުން ފާޅުކޮށްފަ އެވެ. ހަމަލާއަށް ފަންޑުކުރި މީހުން ނުހޯދޭތީ ނަޝީދުގެ އާއިލާއިން ވެސް ވަނީ ކަންބޮޑުވުން ފާޅުކޮށްފަ އެވެ.
އެ ބަޔާނުގައި އީވާ ކަމާބެހޭ ފަރާތްތަކަށް ގޮވާލެއްވީ ހަމަލާގެ ކަންކަމަށް ފުރިހަމަ ތަހުގީގެއްކޮށް، އެ ހަމަލާގައި ހިމެނޭ އެންމެން އަވަހަށް އިންސާފުގެ ކުރިމައްޗަށް ގެނައުމަށް ގޮވާލައްވާފަ އެވެ.
