ހުޅުމާލޭގައި ދެ މާރާމާރީއެއް ހިންގައި ބަޔަކު ޒަހަމްކޮށްލައިފި އެވެ.
ފުލުހުން މައުލޫމާތު ދިން ގޮތުގައި ފުރަތަމަ މާރާމާރީ ހިންގާފައިވަނީ މިރޭ 9:17 ހާއިރު ކެފޭ ލަޔާ ރެސްޓޯރެންޓް ކައިރީގަ އެވެ. ދެވަނަ މާރާމާރީ ހިންގާފައިވަނީ އޭގެ އިރުކޮޅެއް ފަހުން, 9:32 ހާއޮރު ފޭސްޓޫ ބްރިޖު ކައިރީގަ އެވެ.
މި ދެ މާރާމާރީގައި ދެ މީހަކަށް އަނިޔާވެފައިވާ ކަމަށް ފުލުހުން ބުންޏެވެ. އެމީހުންނަށް ހުޅުމާލޭ ހޮސްޕިޓަލްގައި ދަނީ ފަރުވާދެމުންނެވެ.
ދެ މާރާމާރީ ފުލުހުން ތަހުގީގު ކުރަމުންދާއިރު, އީދު ދުވަހުގެ ފަތިހު ވެސް މާލޭގައި ދެ މާރާމާރީއެއް ވަނީ ހިންގާފަ އެވެ. ހެންވޭރު އަދި މާފަންނު, މާވެޔޮ މިސްކިތް ކައިރީގައި ހިންގި އެ ދެ މާރާމާރީގައި ވެސް ބަޔަކަށް އަނިޔާވި އެވެ.
މި މާރާމާރީތަކުގައި ގުޅުމެއްވާ ކަމެއް މިހާތަނަށް ފުލުހުން ހާމަކޮށްފައެއް ނުވެ އެވެ. ނަމަވެސް, މިފަދަ ގިނަ މާރާމާރީތަކަކީ ބަދަލު ހިފުމުގެ ގޮތުން ހިންގާ ކަންކަން ފާހަގަކޮށްލެވެ އެވެ.
ވަޅި ޖަހައި, މިގޮތަށް ހިންގި އެކިއެކި މާރާމާރީތަކުގައި މީހުން މަރުވެފައިވެސްވެ އެވެ.
