ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓެއްގައި ތިބެގެން މަސްތުވާތަކެތީގެ ވިޔަފާރި ކުރަމުން ދިޔަ ފަސް މީހަކު އަތުލައިގަނެ މިދިޔަ ބުރާސްފަތު ކޯޓުން ބަންދުގެ މުއްދަތެއް ޖަހައިފި އެވެ.
ކްރިމިނަލް ކޯޓުން މިދިޔަ ބުރާސްފަތި ދުވަހު ނެރުނު ކޯޓު އަމުރުގައިވާ ގޮތުން ހިޔާ ފްލެޓަކުން ހައްޔަރު ކުރި ފަސް މީހުންގެ ބަންދުގެ މުއްދަތަށް ޖަހާފައި ވަނީ 15 ދުވަހުގެ މުއްދަތެކެވެ.
ހައްޔަރު ކުރީ 19 އަހަރުގެ ފިރިހެނަކާއި، 21 އަހަރުގެ ފިރިހެނަކާއި، 26 އަހަރުގެ ފިރިހެނަކާއި، 24 އަހަރުގެ ދެ ފިރިހެނުންނެވެ.
އަމުރުގައިވާ ގޮތުން، ފުލުހުން އެ ތަނަށް ގޮސް ބަލައިފާސްކުރިއިރު ޓީވީ ރެކްގެ ދަމާވަތްގަނޑު ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެހި ހުރި ހަ ރަބަރު ޕެކެޓު ވަނީ ފެނިފަ އެވެ.
އެ ކަބަޑު ތެރެއިންނާއި، ސިޓިން ރޫމުގެ ސޯފާ ތެރެއިންނާއި އެޕާޓްމަންޓްގެ ދެ ކޮޓަރިން ޖުމުލަ 50،300ރ. އާއި މަސްތުވާތަކެތި ބަންދުކުރަން ބޭނުން ކުރާ އާލާތް ވެސް ފެނިފައިވާ ކަމަށް ފުލުހުން ބުންޏެވެ.
ހައްޔަރު ކުރި ފަސް މީހުންގެ ތެރެއިން ތިން މީހުންނަކީ މީގެ ކުރިން ވެސް މިފަދަ މައްސަލައެއްގައި ހައްޔަރުކޮށް ރިހެބް ފުރިހަމަ ކޮށްފައިވާ ފަރާތްތަކެއް ކަން ކޯޓު އަމުރުތަކުން އެނގެ އެވެ.
އެކަމަކު އޭގެ ތެރެއިން އެކަކު ކޯޓުގައި ބުނެފައި ވަނީ އޭނާއަކީ މަސްތުވާތަކެތި ބޭނުން ކުރާ މީހެއް ނޫން ކަމުގަ އެވެ. އަދި ފެނުނު ފައިސާއަކީ އޭނާ ވަޒީފާ އަދާ ކުރާ ތަނުން ލިބުނު ފައިސާ ކަމަށް ބުނެފައިވެ އެވެ. ދެން ތިބި މީހުން މަސްތުވާތަކެތި ބޭނުން ކުރާ ކަމެއް އަދި ނުކުރާ ކަމެއް ވެސް ނޭނގޭ ކަމަށް ބުންޏެވެ.
