އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލުގެ ތަސައްވަރު ކިލަނބުކޮށް ވަކި ކެންޑިޑޭޓަށް "ފަހިވާ ގޮތަށް" ޝަކުވާ ކޮމިޓީން ނިންމުންތަކެއް ނިންމާފައިވާތީ އެ ނިންމުންތައް އިސްތިއުނާފް ކުރުމަށް ފައްޔާޒުގެ ކެމްޕޭނުން ނިންމައިފި އެވެ.
ފައްޔާޒާ އިދިކޮޅު ކެންޑިޑޭޓު އިމްތިޔާޒް ފަހުމީއަށް ތާއިދުކުރައްވާ ބައެއް ފަރާތްތަކަށް ދައުލަތުގެ އެކި މުއައްސަސާތަކުގައި ތިބި އެކި ފަރާތްތަކުން އެ މީސްމީހުންގެ މަގާމުގެ ނާޖާއިޒު ނުފޫޒު ބޭނުންކޮށްގެން މުވައްޒަފުންނަށް ބިރު ދައްކަމުން ގެންދާ ކަމަށް ބުނެ އޮތީ ޝަކުވާ ހުށަހަޅާފަ އެވެ.
އިންތިހާބާ ގުޅިގެން ހުށަހަޅާ ޝަކުވާ ބެލުމަށް އެކުލަވާލާފައިވާ ތިން މެމްބަރުންގެ ކޮމިޓީގައި ތިއްބަވަނީ ޑރ. މުސްތަފާ ލުތުފީ އާއި އަލީ ޝިޔާމްގެ އިތުރުން ފަރީޝާ އަބްދުﷲ އެވެ.
ޝަކުވާ ކޮމިޓީން އެ މައްސަލަ ނިންމާފައިވާއިރު ފައްޔާޒުގެ ކެމްޕޭނުން ބުނާ ގޮތުގައި އެއީ އެ ޕާޓީގެ އިންތިހާބާ ބެހޭ ގަވާއިދުގެ 46 ވަނަ މާއްދާ އާ ހިލާފަށް އެކުލަވާފައިވާ ކޮމިޓީއެއް ކަމަށެވެ.
titledesc
އޭގެ އިތުރުން ހަމަ އެ ގަވާއިދުގައި މައްސަލައެއް ހުށަހެޅިއްޖެނަމަ ގިނަވެގެން 48 ގަޑިއިރު ތެރޭ އެ މައްސަލައަކާ މެދު ގޮތެއް ނިންމައި މައްސަލަ ހުށަހެޅި ފަރާތަށް އަންގަވާނެ ކަމަށް ބަޔާންކޮށްފައިވެ އެވެ. އެހެން ނަމަވެސް، ޝަކުވާ ކޮމިޓީން އެ އަމަލުކޮށްފައި ވަނީ އެ މާއްދާ އާ ހިލާފަށް ކަމަށް ވެސް ފައްޔާޒުގެ ޓީމުން ބުނެފައިވެ އެވެ.
އެމްޑީޕީއަކީ "އަމަލުކުރަންޖެހޭ ގަވައިދުތައް ވަރަށް ސަރީހަކޮށް ލިޔެ އާއްމުކުރެވިފައިވާ ޕާޓީއެއް" ކަމަށް ވެސް ފައްޔާޒުގެ ޓީމުން ނެރުނު ބަޔާނުގައިވެ އެވެ.
"އެހެންކަމުން މި ދެންނެވި ގަވައިދުތަކާއި އުސޫލުތަކާ ހިލާފަށް އެކުލަވާލެވިފައިވާ ކޮމެޓީއަކުން މި ކެމްޕެއިންގެ ކެންޑިޑޭޓުގެ ހައްގުތަކެއް ގެއްލޭ އަދި ވާދަވެރި ކެންޑިޑޭޓަށް ފަހިވާ ގޮތަށް ނިންމާފައިވާ ނިންމުންތައް މި ކެމްޕެއިނުން ހަރުކަށި އިބާރާތުން ކުށްވެރިކޮށް އަދި އެ ނިންމުންތައް ބަލައި ނުގަންނަވާހަކަ ދަންނަވަން،" ފައްޔާޒުގެ ކެމްޕޭނުން ނެރުނު ބަޔާނުގައި ބުނެފައިވެ އެވެ.
އަދި، އެ ޝަކުވާތަކަކީ އިންތިހާބާ ގުޅޭ ޝަކުވާތަކެއް ކަމަށް ނުދެކޭ ކަމަށް ވެސް ފައްޔާޒުގެ ކެމްޕޭނުން ބުންޏެވެ.
"ޕާޓީގެ ގުނަންތަކުން މި އިންތިހާބަށް ނުފޫޒުފޯރުވާ އިންތިހާބުގެ ކަންކަމުގައި ވަކި ފަރާތަކަށް ފަހިވާގޮތަށް ހިންގާކަން ހާމަވާކަމެކެވެ. މި ކެމްޕެއިންގެ ފަރާތުން ޕާޓީގެ ގަވައިދުތަކާއި އުސޫލުތަކާއި ހިލާފަށް ނިންމާފައިވާ ނިންމުންތައް އިސްތިއުނާފަށް ހުށަހަޅާނެ ވާހަކަ ދެންނެވީމެވެ،" މިއަދު ނެރުނު ބަޔާނުގައި ފައްޔާޒުގެ ކެމްޕޭނުން ބުނެފައިވެ އެވެ.
