އިންޑިއާއިން އިސްވެ ދުނިޔޭގެ އެކި ގައުމުތަކުގައި ފަށާފާއިވާ އިއާދަކުރަނިވި ހަކަތަ ގާއިމް ކުރުމުގެ މަޝްރޫއު "ގްރީން ގްރިޑް" ގައި ރާއްޖެ ހިމަނައި، ރާއްޖޭގައި އިއާދަކުރަނި ހަކަތަ އިތުރު ކުރަން އިންޑިއާގެ ޝައުގުވެރިކަން އެންވަޔަރަމެންޓް މިނިސްޓަރު އާމިނަތު ޝައުނާއާ ހިއްސާ ކޮށްފި އެވެ.
އިންޑިއާ ސަރުކާރާއި އޮބްޒާވާ ރިސާޗު ފައުންޑޭޝަން (އޯބީއެފް) ގެ ފަރާތުން މިދިޔަ ހޯމަ ދުވަހުން ފެށިގެން މިއަދުގެ ނިޔަލަށް ކުރިއަށް ގެންދިޔަ ރައިޒީނާ ޑައިލޮގްގައި ބައިވެރިވެވަޑައިގަންނަވަން އިންޑިއާގެ ބައެއް ވަޒީރުން ރާއްޖެ ވަޑައިގެންނެވި އެވެ.
މި ގޮތުން އިންޑިއާގެ ކޮމިއުނިކޭޝަންސް އެންޑް އިލެކްޓްރޯނިކްސް މިނިސްޓަރު އަޝްވިނީ ވައިޝްނަވާއި އާއި، އެންވަޔަރަމެންޓް މިނިސްޓަރު ބުޕެންޑާ ޔަވަޑްއާއި، ރިނިއުވަބަލް އެނާޖީ މިނިސްޓަރު ރާޖް ކުމާރު ސިންގް ވަނީ ވަކިވަކިން ޝައުނާއާ ބައްދަލު ކުރައްވައިފަ އެވެ.
އެންވަޔަރަމެންޓް މިނިސްޓްރީން ބުނީ އިންޑިއާގެ އެނާޖީ މިނިސްޓަރާއި ޝައުނާ އާއެކު ބޭއްވި ބައްދަލުވުމުގައި، ރާއްޖޭގައި އިއާދަކުރަނިވި ހަތަކަ ބޭނުން ކުރެވޭ މިންވަރު އިތުރު ކުރުމަށާއި، އިންޑިއާއިން ކުރިއަށް ގެންދަން މަސައްކަތް ކުރާ "ގްރީން ގްރިޑް" މަޝްރޫއުގައި ރާއްޖެ ހިމަނަން އިންޑިއާއިން ޝައުގުވެރިކަން ފާޅު ކުރެއްވި ކަމަށެވެ.
އިންޑިއާ ސަރުކާރުގެ ފަރާތުން ރާއްޖޭގައި ބޭއްވި ރައިޒީނާ ޑައިލޮގް - ފޮޓޯ: އެންވަޔަރަމެންޓް މިނިސްޓްރީ
އިންޑިއާގެ ކޮމިއުނިކޭޝަން މިނިސްޓަރު އަޝްވިނީ ވައިޝްނަވާއި ކުރެއްވި ބައްދަލުވުމުގައި، ރާއްޖޭގެ ޑިޖިޓަލް އައިޑީ އުފެއްދުމަށާއި، އިންޑިއާގެ ޑިޖިޓަލް ސިސްޓަމެއް ގާއިމްވެފައި އޮތް ގޮތާ ގުޅޭ ގޮތުން މައުލޫމާތު ބަދަލުކުރުމަށާއި، މި މަސައްކަތަށް ބޭނުންވާ ޓެކްނިކަލް ސަޕޯޓް ރާއްޖެއަށް ފޯރުކޮށްދިނުމާ ގުޅޭގޮތުން މަޝްވަރާ ކުރައްވާފައިވާ ކަމަށް އެންވަޔަރަމެންޓް މިނިސްޓްރީން ބުންޏެވެ.
އިންޑިއާގެ އެންވަޔަރަމެންޓް މިނިސްޓަރު ބުޕެންޑަރު ޔަޑަވް ޝައުނާއާ ބައްދަލުކުރައްވައި މައިގަނޑު ގޮތެއްގައި މަޝްވަރާ ކުރެއްވީ މުސޫމީ ބަދަލުތަކުގެ މުއާހަދާ ކޮޕްގައި ދެކެވިފައިވާ ވާހަކަތަކަށެވެ.
މިގޮތުން، "ކޮޕް 26" އަށްފަހު އައި ކުރިއެރުންތަކާ ގުޅޭ ގޮތުންނާއި "ކޮޕް 27" އާއި ހަމައަށް ދާއިރު ކުރެވޭނެ މަސައްކަތްތަކާ ގުޅޭ ގޮތުން ދެ ބޭފުޅުން މަޝްވަރާ ކުރެއްވި ކަމަށް މިނިސްޓްރީން ބުންޏެވެ.
