ސަރުކާރުގެ މަސް ކުންފުނި މިފްކޯގެ އާ ބޯޓު "ޖަޒީރާ ރީފާ" އިން ދިވެހިރާއްޖެއިން ބޭރަށް މަސް އެކްސްޕޯޓުކުރަން ފަށައިފި އެވެ.
މިފްކޯއިން ބުނީ 2،500 ޓަނުގެ އެ ބޯޓު އިއްޔެ މަސް އެކްސްޕޯޓް ކުރުމަށް ތައިލޭންޑަށް ފުރާފައިވާ ކަމަށެވެ. މިފްކޯއިން ބުނީ އާ ބޯޓު މެދުވެރިކޮށް އެކްސްޕޯޓުކުރަން ފެށުމަކީ މަސްވެރިކަމަށް ލިބޭނެ ކުރިއެރުމެއް ކަމަށެވެ. އަދި އެއީ މަސް ގަތުމުގެ އޮޕަރޭޝަން ތަރައްގީކުރަން އެ ކުންފުނިން ކުރި އިންވެސްޓްމެންޓެއް ކަމަށް ވެސް އެ ކުންފުނިން ބުނެ އެވެ.
މިފްކޯއިން ބުނީ މިއަހަރުގެ މިހާތަނަށް އެ ކުންފުނިން 24،500 ޓަނުގެ މަސް ގަނެފައިވާ ކަމަށެވެ. އަދި މަސް އެކްސްޕޯޓުކުރަން މިއަހަރު އެކަނި ވެސް ހަތް ރީފާ ބޯޓު ޗާޓަރުކޮށްގެން އެ ކުންފުނިން ގެނެސްފައިވާ ކަމަށް މިފްކޯއިން ބުނެ އެވެ.
އަލަށް ގެނައި ޖަޒީރާ ރީފާއާއެކު އެ ކުންފުނީގެ އެކްސްޕޯޓުކުރުމުގެ މަސައްކަތްތައް ހަލުވިވެގެންދާނެއިރު، އިތުރު މާކެޓުތަކަށް ވެސް އެ ކުންފުނިން މަސް އެކްސްޕޯޓުކުރަން ފުރުސަތު ހުޅުވާލެވިގެންދާނެ ކަމަށް މިފްކޯއިން ބުނެ އެވެ.
މިފްކޯއިން އާ ބޯޓެއް ގެނެސް އެކްސްޕޯޓުކުރަން ފަށާފައިވަނީ މިދިޔަ ތިން މަހެއްހާ ދުވަހު ރާއްޖޭގެ މަސްވެރިކަން އިންތިހާއަށް ރަނގަޅުވެފައިވާ ދުވަސްވަރެއްގަ އެވެ.
ރާއްޖޭގެ ދެކުނަށް އަދިވެސް މަސްވެރިކަން ރަނގަޅުއިރު، މިފްކޯގެ ދެކުނު ހަބު ކޫއްޑޫއަށް މަސް ކިރުމުގައި މި ދޭތެރެއިން މައްސަލަތަކެއް ވަނީ ކުރިމަތިވެފަ އެވެ. ނަމަވެސް މިހާރު އެ މައްސަލަތައް ވެސް ވަނީ ހައްލުކޮށްފަ އެވެ.
މިފްކޯއިން މަސް އެކްސްޕޯޓުކުރުމަށް އާ ބޯޓެއް ގެނައިއިރު، ރާއްޖެއިން އެކްސްޕޯޓުކުރާ މުދަލުގެ ބޮޑު ހިއްސާއެއް އެކުލެވެނީ މަހުގެ ބަވަތްތަކުގައި ކަން ފާހަގަކުރެވެ އެވެ. އަދި ރާއްޖެއިން އެންމެ ގިނައިން މުދާ ބޭރުކުރާ ގައުމަކީ ވެސް ތައިލޭންޑެވެ.
