މިފްކޯގެ ބެލުމުގެ ދަށުގައިވާ ކަނޑުއޮތްގިރިން ބޮޑުކަންނެލި ގަންނަން މިއަދު ފަށައިފި އެވެ.
ކަނޑުއޮތްގިރިއަށް ބޮޑުކަންނެލި ގަންނަން ފެށުމުން ފިޝަރީޒް މިނިސްޓަރު އަހުމަދު ޝިޔާމް އާއި މިފްކޯގެ ސީއީއޯ ފަރުހަތު ޝަހީރު ވަނީ ކަނޑުއޮތްގިރީގައި މަސައްކަތް ކުރިއަށްދާ ގޮތް ބަލާފަ އެވެ.
ނޫސްވެރިންނަށް މައުލޫމާތު ދެއްވަމުން މިނިސްޓަރު ޝިޔާމް ވިދާޅުވީ ކަނޑުއޮތްގިރިން ބޮޑުކަންނެލި ކިލޯއެއް 25ރ. ގެ މަގުން މިއަދުން ފެށިގެން މިފްކޯއަށް ކިރަމުންދާނެ ކަމަށެވެ.
ކަނޑުއޮތްގިރި އަލުން އޮޕަރޭޝަނަށް ގެނައުމަށްފަހު ބޮޑުކަންނެލީގެ އިތުރުން ކަޅުބިލަމަސް ވެސް އެތަނަށް މިހާރު ވަނީ ގަންނަން ފަށާފަ އެވެ.
މިފްކޯއިން މަސް ފެކްޓްރީއެއް ހިންގަމުން ދިޔަ ކަނޑުއޮތްގިރި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އަށް ސަރުކާރުން އޯގަސްޓް 21، 2024، ގައި އިއުލާންކުރި އެވެ. ނަމަވެސް އެ ނިންމުން ބަދަލުކޮށް މިދިޔަ އަހަރުގެ ސެޕްޓެމްބަރު މަހު އަނެއްކާ ވެސް އެތަން މިފްކޯއަށް ދިނެވެ.
މިފްކޯއަށް ބޮޑު ކަންނެލި ގަތުމަކީ މި ސަރުކާރުގެ ރިޔާސީ ވައުދެކެވެ. މިގޮތުން އެ ވައުދު ފުއްދުމަށް ގޮވާލާ މިދިޔަ މަހު 10, ގައި ފާހަގަކުރި މަސްވެރިންގެ ދުވަހުގައި މާލެ ފަޅު ކައިރީގައި ގިނަ އަދަދެއްގެ މަސް ދޯނިތައް ބާއްވައިގެން އިހުތިޖާޖުކޮށްފަ އެވެ.
ހުޅުމާލޭގައި ބޮޑުކަންނެލި ފެކްޓްރީއެއް ގާއިމުކުރުމުގެ މަސައްކަތް މިދިޔަ އަހަރު ފަށާނެ ކަމަށް މުހައްމަދު މުއިއްޒު ކުރިން ވިދާޅުވެފައިވެ އެވެ. ނަމަވެސް މިހާތަނަށް ވެސް އެ މަސައްކަތް ނުފެށެ އެވެ.
މަސްދޯނިތަކުން މިފްކޯއަށް ކިރާ މަހަށް ބީއެމްއެލް މެދުވެރިކޮށް އަންނަނީ 48 ގަޑިއިރު ތެރޭގައި ފައިސާ ދޫކުރަމުންނެވެ.
