މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ވިއްކާ ޑީސެލްގެ އަގު ވަރަށް ބޮޑަށް ބޮޑުކޮށްފި އެވެ.
މިއަދު އަގުތައް މުރާޖާކޮށްފައިވާއިރު މަސްކިރާ މަސްވެރިންނަށް މިފްކޯއިން ޑީސަލް ލީޓަރެއް ވިއްކާނީ 27.24ރ. އަށެވެ. އަދި އާންމު ފަރާތްކަށް ވިއްކާނީ 28.54ރ. އަށެވެ.
މިދިޔަ އަހަރުގެ މަސްވެރިންގެ ދުވަހު ރައީސް މުހައްމަދު މުއިއްޒު އިއުލާން ކުރެއްވި ގޮތުގައި މަސްވެރިންނަށް 13.90ރ. އަދި ތިން ޓަނަށްވުރެ ގިނައިން މަސްކިރާ މަސްވެރިންނަށް 13.72ރ. އަށް ލީޓަރެއް ވިއްކާނެ އެވެ. އަދި އާންމު ފަރާތްތަކަށް ލީޓަރެއް ވިއްކަން ފެށީ 14.43ރ. އެވެ.
އެހެންކަމުން، ގާތްގަނޑަކަށް މަސްވެރިންނަށް ޑީސެލް ލިބެމުންދިޔަ އަގު ވަނީ ލީޓަރަކުން 13.34ރ. އުފުލިފަ އެވެ. އަދި އާންމުންނަށް ވިއްކާ ޑީސަލް ލީޓަރަކުން ވަނީ 14.11ރ. އުފުލިފި އެވެ.
މިފްކޯއިން މަސްވެރިންނަށް ވިއްކާ ޑީސެލްގެ އަގު އެންމެ ބޮޑުކުރި އެއްފަހަރަކީ ޖޫން 2022، އެވެ. އޭރު އަގު ބޮޑުކުރީ ޔޫކްރެއިން ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު ހިފެހެއްޓުނެއް ނެތި އުފުލެމުން ދިޔުމުންނެވެ.
މަސް ދޯނިތަކަށް އެ ކުންފުނިން ޑީސަލް ލީޓަރެއް އޭރު ވިއްކީ 17.63ރ. އަށެވެ. އަދި އާންމުންނަށް ޑީސަލް ލީޓަރެއް ވިއްކީ 22.66ރ. އަށެވެ. އޭގެ ފަހުން ދުނިޔޭގެ ބާޒާރުގައި ތެލުގެ އަގުތައް ދަށްވުމުން މިފްކޯއިން ވެސް އަގުތައް ދަށްކުރި އެވެ.
