ލަންޑަން (އޭޕްރީލް 27) - ކޮވިޑް-19 އިން ރައްކާތެރިވާން ވެކްސިން ނުޖަހައި ތިބި ކުޅުންތެރިންނަށް ވެސް އިނގިރޭސިވިލާތުގައި ބާއްވާ ވިމްބަލްޑަން ޓެނިސް މުބާރާތުގައި ވާދަކުރެވޭނެ ކަމަށް މުބާރާތް އިންތިޒާމްކުރާ ފަރާތުން ބުނެފި އެވެ.
ކޮވިޑް ވެކްސިން ނުޖަހައި، އެ ކަމާބެހޭ މައުލޫމާތު ދޭން ދެކޮޅު ހެދުމުން މި އަހަރު ޖެނުއަރީ މަހު ކުރިއަށްދިޔަ އޮސްޓްރޭލިއަން އޯޕަން ޓެނިސް މުބާރާތުގައި ވާދަކުމުގެ ފުރުސަތު ދުނިޔޭގެ އެއް ވަނަ ޓެނިސް ކުޅުންތެރިޔާ ނޮވަކް ޖޮކޮވިޗަށް ނުދިނެވެ. ޖޮކޮވިޗް، އެ ފަހަރު އޮސްޓްރޭލިއާ އިން ޑީޕޯޓްކޮށްލީ އެވެ. އޭގެ ފަހުން އެމެރިކާގައި ކުރިއަށްދިޔަ މުބާރާތްތަކުގައި ވެސް ވެކްސިން މައްސަލައިގައި ޖޮކޮވިޗަށް ވާދަނުކުރެވުނެވެ.
އެކަމަކު، އަންނަ ޖޫން 27 އިން ޖުލައި 10 ވަނަ ދުވަހާ ހަމައަށް އިންގްލެންޑްގައި ކުރިއަށްދާ ވިމްބަލްޑަން ޓެނިސް މުބާރާތް އިންތިޒާމްކުރާ ކޮމިޓީން ބުނީ އިންގްލެންޑަށް އެތެރެ ވުމުގައި ކޮވިޑް ވެކްސިން ޖެހުމަކީ ލާޒިމު ކަމެއްގެ ގޮތުގައި ހިމަނާފައިނުވާތީ، ވިމްބަލްޑަންގައި ވެސް އަމަލުކުރާނީ އެ ގޮތަށް ކަމަށެވެ.
ވިމްބަލްޑަން އިންތިޒާމުކުރާ ފަރާތުގެ މި ނިންމުމާ އެކު، ހަ ފަހަރު ވިމްބަލްޑަން ތަށި އުފުލާލާފައިވާ، ސާބިއާގެ ޖޮކޮވިޗް މި ފަހަރުގެ މުބާރާތުގައި ފެންނާނެކަން ކަށަވަރުވީ އެވެ.
ވެކްސިން މައްސަލައިގައި މި އަހަރު ޖޮކޮވިޗަށް ގިނަ މުބާރާތްތަކެއް ގެއްލިދާނެ ކަމަށް ކުރިން ބެލެވުނު ނަމަވެސް ގައުމުތަކުން ކޮވިޑް ވެކްސިން ލާޒިމު ކުރުމުގައި ދެ ވަނަ ވިސްނުމަކަށް ދާން ފަށާފައިވާއިރު، މިއީ ޖޮކޮވިޗަށް ގިނަ މުބާރާތްތައް ކުޅެން ފުރުސަތު ލިބޭނެ ސަބަބެކެވެ. ޖޮކޮވިޗް ވަނީ މުބާރާތްތައް ކުޅުމުގެ ފުރުސަތު ނުލިބުނަސް މަޖުބޫރުވެގެން ވެކްސިން ނުޖަހާނެ ކަމަށް ބުނެފަ އެވެ.
ވިމްބަލްޑަން ޓެނިސް މުބާރާތުގައި ރަޝިއާ އާއި ބެލަރޫސް ކުޅުންތެރިންނަށް ނުކުޅެވޭނެ ކަމަށް ވަނީ މީގެ ކުރިން ނިންމައިފަ އެވެ.
ޓެނިހުގެ އެންމެ ޝަރަފްވެރި ހަތަރު މުބާރާތު (ގްރޭންޑް ސްލޭމް)ގެ ތެެރެއިން އެއް މުބާރާތް ކަމަށްވާ، ވިމްބަލްޑަން ގައި ރަޝިއާ އާއި ބެލަރޫސް ކުޅުންތެރިންނަށް ނުކުޅެވޭ ގޮތަށް މުބާރާތް އިންތިޒާމްކުރާ ފަރާތުން ހެދީ ރަޝިއާ އާއި ޔޫކްރެއިނާ ދެމެދު ކުރަމުން އަންނަ ހަނގުރާމައިގެ ތެރެއިން އެޅި ފިޔަވަޅެއްގެ ތެރެއިންނެެވެ.
ބެލަރޫސް ކުޅުންތެރިންނަށް ނުކުޅެވެނީ ރަޝިއާ އިން ޔޫކްރެއިނާ ދެކޮޅަށް ކުރާ ހަނގުރާމަ އަށް ބެލަރޫސް ސަރުކާރުން ތާއީދުކުރާތީ އެވެ.
ވިމްބަލްޑަންގެ މި ނިންމުމާ ހެދި ޓެނިހުގެ ރޭންކިންގެ މަތީ ފަންތީގައި ތިބި ކުޅުންތެރިންނަށް ވެސް އަސަރުކުރާނެ އެވެ. އެ ގޮތުން ފިރިހެން ރޭންކިން އެއް ވަނައިގައި ކުރިން އޮތް، އަދި މި ވަގުތު ދެ ވަނައިގައި އޮތް ރަޝިއާގެ ޑަނީލް މެޑްވެޑޭވް އާއި އަންހެން ރޭންކިން ހަތަރެއްގައި އޮތް ބެލަރޫސްގެ އަރީނާ ސަބަލެންކާ އަށް މި ފަހަރުގެ ވިމްބަލްޑަންގެ އިތުރުން، އިނގިރޭސި ކޯޓުތަކުގައި ކުޅޭ އެއްވެސް މުބާރާތެއްގައި ބައިވެރިވުމުގެ ފުރުސަތެއް ނެތެވެ.
