އޭޝިއާގެ މަތީ ފަންތީގެ ކުޅުންތެރިން ވާދަކުރާ މުބާރާތް، ސްމާޓް ބެޑްމިންޓަން އޭޝިއާ ޗެމްޕިއަންޝިޕް 2022ގެ ސިންގަލްސް ކެޓަގަރީން ލިބުނު ތަޖުރިބާގެ އަލީގައި ޑަބަލްސް ދެ އިވެންޓްގައި ނަތީޖާ ރަނގަޅުކުރަން ރާއްޖޭގެ ކުޅުންތެރިން އަމާޒުހިފައިފި އެވެ.
ފިލިޕީންސްގައި ކުރިއަށްދާ މި ފަހަރުގެ ބެޑްމިންޓަން އޭޝިއާ ޗެމްޕިއަންޝިޕްގައި ވާދަކުރަނީ އައިމިނަތު ނަބީހާ އާއި ފާތިމަތު ނަބާހާގެ އިތުރުން ރިވައިވަލް ސްޕޯޓްސް ކްލަބްގެ ޒަޔާން ޒަކީ އެވެ. މިއަދު ކުޅުނު ސިންގަލްސް މެޗުތަކުގައި، ޒަޔާން ފިރިހެން ސިންގަލްސް ކޮލިފައިންގައި ވާދަކުރިއިރު، ނަބާހާ ވަނީ އަންހެން ސިންގަލްސްގައި ކުޅެފަ އެވެ.
މިއަދު ކުޅުނު ފިރިހެން ސިންގަލްސްގައި ޗައިނާގެ ވޮން ޒެން ހަން އަތުން ޒަޔާން ބަލިވީ 21-11، 21-09 އިންނެވެ. އަދި މިޔަންމާގެ ފޯން ޕަޔެ ނިއާންގް އަތުން ޒަޔާން ބަލިވީ 21-13، 21-08 އިންނެވެ. އަންހެން ސިންގަލްސް ކޮލިފައިންގައި ނަބާހާ ފުރަތަމަ ވާދަކުރީ އިންޑޮނީޝިއާގެ ސްޓެފަނީ ވިޑްޔާޔާއާ ދެކޮޅަށެވެ. އެ މެޗުން ބަލިވީ 21-04، 21-08 އިންނެވެ. ދެ ވަނަ މެޗުގައި ނަބާހާގެ މައްޗަށް ފިލިޕީންސްގެ ޖަނެލް އޭން އަންދްރެސް ކުރިހޯދީ 21-17، 21-07 އިންނެވެ.
ސިންގަލްސް ކޮލިފައިން މެޗުތަކާ ބެހޭގޮތުން ޒަޔާން، "އަދަދު" އަށް ބުނީ ފުރަތަމަ މެޗުގައި ޗައިނާގެ ވޮންއާ ދެކޮޅަށް ރަނގަޅު ކުޅުމެއް ދެއްކުނު ކަމަށާއި އޭނާ އަކީ ދާދި ފަހުން ކޮރެއާ މާސްޓާސް ޗެމްޕިއަންކަން ހޯދާފައިވާތީ ފެނުނީ ވަރަށް ފޯމު ރަނގަޅުކޮށް ކަމަށެވެ.
"ދެ ވަނަ މެޗުގައި ފްރެޝްކޮށް ހުރިނަމަ ވަރަށް ރަނގަޅުވިސް. އެކަމަކު، ރޯދަ ވަރުބަލިކަމާ އެކުގައި ވަރުގަދަ ދެ މެޗު ކައިރިކައިރީގައި އެންމެ ރަނގަޅަށް ނުކުޅެވުނީ. ޗައިނާ މެޗުގައި ލީޑެއް ވެސް ނެގިފައި އަތުން ދިޔައީ،" ޒަޔާން ބުންޏެވެ.
މެއިން ޑްރޯގައި ރާއްޖޭން ވާދަކުރަނީ އަންހެން ޑަބަލްސް އާއި މިކްސް ޑަބަލްސްގަ އެވެ. އެ މެޗުތައް އޮތީ ކުރިއަށް އޮތް ދެ ދުވަހުގަ އެވެ. އަންހެން ޑަބަލްސްގައި މާދަމާ، ނަބާހާ އާއި ނަބީހާގެ ޕެއާ ކުޅެން ޖެހިފައިވަނީ ދެ ވަނަ އަށް ސީޑްކޮށްފައިވާ ދެކުނު ކޮރެއާގެ ލީ ސޮހީ އާއި ޝިން ސުއެންޝަންގެ ޕެއާއާ އެވެ.
މިކްސް ޑަބަލްސް ބައިގައި ޒަޔާން އާއި ނަބާހާގެ ޕެއާ އިން ޖަޕާނުގެ ހިރޯކީ މިޑޮރިކާވާ އާއި ނަޓްސޫ ސައިޓޯގެ ޕެއާއާ ކުޅެން އޮތް މެޗަށް ޖަޕާނުގެ ޕެއާ ހާޒިރުނުވާތީ، ޒަޔާން އާއި ނަބާހާ ވަނީ ގަދަ 16 ބުރަށް ދަތުރުކޮށްފަ އެވެ. ގަދަ 16 ބުރުގެ މެޗު އޮތީ ބުރާސްފަތި ދުވަހު އެވެ.
ގަދަ 16 ބުރުގައި ޒަޔާން އާއި ނަބާހާގެ ޕެއާ ކުޅެން ޖެހޭ ޕެއާ އެއް ކަނޑައެޅޭނީ މާދަމާ، އިންޑޮނީޝިއާގެ ރިނޯވް ރިވާލްޑީ އާއި ޕިތާ ހަނިންތިޔާސް މެންތާރީގެ ޕެއާ އާއި ހޮންކޮންގްގެ ޓަން ޗުން މަން އާއި ސޭ ޔިންގް ސުއޭގެ ޕެއާ ކުޅެގެން މޮޅުވާ ޓީމަކާ އެވެ.
ސްމާޓް ބެޑްމިންޓަން އޭޝިއާ ޗެމްޕިއަންޝިޕްގައި ވާދަކޮށްލުުމުގެ ފުރުސަތަކީ ދިވެހި ކުޅުންތެރިން ރޭންކިން މައްޗަށް ޖައްސާލަން ބޭނުންހިފޭނެ ފުރުސަތެކެވެ. އަދި މި އަހަރު ކުރިއަށް އޮތް ބައިނަލްއަގުވާމީ މުބާރާތްތަކުގެ ތެރެއިން ކުޅެލަން ލިބޭނެ މަތީ ފަންތީގެ ރަނގަޅު މެޗެކެެވެ.
