ދުނިޔޭގައި ހުރި އެންމެ އުމުރުން ދުވަސްވީ މީހާ 119 އަހަރުގައި މަރުވެއްޖެ އެވެ. މަރުވީ ކާނޭ ޓަނަކާ ނަމަކަށް ކިޔާ ޖަޕާނުގެ އަންހެނެކެވެ.
ޓަނަކާއަކީ ދުނިޔޭގެ ގަދަ ބާރެއްގެ ގޮތުގައި ޖަޕާނު ކުރިއަރަމުން އައި އިރު، 1903 ވަނަ އަހަރު އުފަންވި އަންހެނެކެވެ.
އޭނާ ކައިވެންޏެއް ކުރީ މީގެ 100 އަހަރު ކުރިންނެވެ. އެ ކައިވެންޏަށް ހަތަރު ދަރިން ލިބިފައިވެ އެވެ. އޭނާގެ އުމުރުގެ އެންމެ ފަހު ދުވަސްތައް ހޭދަ ކުރީ މުސްކުޅިންނަށް ހާއްސަ ގެޔެއްގަ އެވެ.
ޓަނަކާ ބުނެފައިވާ ގޮތުގައި އޭނާގެ ފިރިމީހާ ލޮލަށް ފެނުނީ ވެސް އުމުރުން 19 އަހަރުގައި ކައިވެނި ކުރި ދުވަހު އެވެ. އޭގެ ކުރިން އެ ދެ މީހުން ބައްދަލުވެފައެއް ނުވެ އެވެ.
ކައިވެނީގެ ފަހުން ގިނަ ވިޔަފާރިތަކެއް ހިންގުމުގައި ޓަނަކާ އުޅުނެވެ. އޭނާގެ ފިރިމީހާ ވަނީ 1937 ވަނަ އަހަރު ޗައިނާ އާއި ޖަޕާނާ ދެމެދު ކުރި ހަނގުރާމައިގައި ބައިވެރިވެފަ އެވެ.
ޓަނަކާގެ ފިރިހެން ދަރިފުޅު ވަނީ ދެ ވަނަ ބޮޑު ހަނގުރާމައިގައި ބައިވެރިވެފަ އެވެ. ރަޝިއާއިން ހައްޔަރު ކުރި ޖަޕާން ސިފައިންގެ ތެރޭގައި އޭނާގެ ފިރިހެން ދަރިފުޅު ހިމެނެ އެވެ.
ޓަނަކާގެ މަރާ އެކު މިހާރު ދުނިޔޭގައި ހުރި އެންމެ އުމުރުން ދުވަސްވީ މީހާއަކީ 118 އަހަރުގެ ފްރާންސް މީހެކެވެ. ލުސީލް ރެންޑޮން ނަމަކަށް ކިޔާ އެ އަންހެން މީހާއަކީ ނަސާރާ ދީނުގެ ފައްޅިއެއްގައި އުޅޭ މީހެކެވެ.
ލުސީލް ރެންޑޯން.
ދުނިޔޭގެ އެންމެ މުސްކުޅިން ގިނަ ގައުމަކީ ޖަޕާނެވެ. އެ ގައުމުގެ އާބާދީގެ 25 ޕަސެންޓަށް ވުރެ ގިނައީ އުމުރުން 65 އަހަރުން މަތީގެ މީހުނެވެ.
ޖަޕާނު މީހުންގެ އުމުރު ދިގުވާ ސަބަބުތަކުގެ ތެރޭގައި ރަނގަޅު ކެއުމެއް ގެންގުޅުމާއި، ސިއްހީ ފަރުވާ އާއި މުސްކުޅިވުމުން ވެސް މަސައްކަތުގައި ދެމި ތިބުން ފާހަގަކޮށްފައިވެ އެވެ.
