ހިޔާނާތްތައް ތަހުގީގު ކުރުމުގައި އެކަށީގެންވާ ނަތީޖާތަކެއް ސަރުކާރަށް ނެރެވިފައި ނުވާ ކަމަށް ބުނެ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ފާޑުވިދާޅުވުން އަމާޒުވެފައި ވަނިކޮށް އެއްވެސް ވަރަކަށް ހިޔާނާތްތެރިވުމަށް މި ސަރުކާރުން ޖާގަ ނުދޭނެ ކަމަށާއި މައްސަލަތައް ތަހުގީގު ކުރުމުގެ ފުރިހަމަ އިހުތިޔާރު މުއައްސަސާތަކަށް ދީފައިވާ ކަމަށް ރައީސުލްޖުމްހޫރިއްޔާގެ އޮފީހުން ރޭ ބުނެފި އެވެ.
އެމްޑީޕީގެ ސަރުކާރެއްގައި އެމްއެމްޕީއާރުސީގެ ފައިސާ ލިބުނު މީހުން ތިބި ކަމަށް ބުނެ ނަޝީދު ގެންދަވަނީ ސަރުކާރަށް ފާޑު ވިދާޅުވަމުންނެވެ. އަދި، އެ މައްސަލަ އާއި ވެންޓިލޭޓަރު މައްސަލައިގެ ތަހުގީގު އެންމެ ފުރިހަމައަށް ކުރިއަށް ގެންގޮސްފައިނުވާ ކަމަށް ވިދާޅުވެ ނަޝީދުގެ ނުރުހުން ސަރުކާރަށް ވަނީ އަމާޒުވެފަ އެވެ.
ރައީސް އޮފީހުގެ ޗީފް އޮފް ސްޓާފް އަލީ ޒާހިރު "އަދަދު"އަށް ވިދާޅުވީ މި ސަރުކާރުން އެއްވެސް މިންވަރަކަށް ހިޔާނާތްތެރިވުމުގެ ޖާގަ ނުދޭނެ ކަމަށެވެ. އަދި، އަނިޔާވެރިވެ ތަފާތުކުރުން ވެސް ނުގެންގުޅޭނެ ކަމަށް އޭނާ ވިދާޅުވި އެވެ.
"މި ސަރުކާރުން ހިޔާނާތްތެރިވުމަށް ޖާގައެއް ނުދޭނެ. އެއްވެސް މީހަކާ މެދު ތަފާތުކުރުން ނުގެންގުޅޭނެ. އެއްވެސް މީހަކަށް އަނިޔާވެރި ނުވާނެ އަދި އެއްވެސް މީހަކަށް އަނިޔާވެރިވުމަށް ފުރުސަތު ވެސް ނުދޭނެ،" އަލީ ޒާހިރު ވިދާޅުވި އެވެ.
މިފަދަ މައްސަލަތައް ތަހުގީގު ކުރުމުގެ ބާރު މުއައްސަސާތަކަށް ދީފައިވާ ކަމަށާއި ދައުލަތުގެ އެއްވެސް ބާރަކުން މައްސަލަތަކަށް ނުފޫޒު ނުފޯރުވުމަށް ސަރުކާރުން އެދޭ ކަމަށް އަލީ ޒާހިރު ވިދާޅުވި އެވެ.
"ކޮންމެ މީހަކާ މެދު ވެސް ހުށަހެޅޭ އަދި ތުހުމަތު ކުރެވޭ މައްސަލައެއް ފުރިހަމައަށް ބަލައި ތަހުގީގު ކުރުމުގެ ފުރިހަމަ އިހުތިޔާރު މުއައްސަސާތަކަށް ވަނީ ދެވިފައި. އެފަދަ ކަމަކަށް ސަރުކާރުން ނުފޫޒެއް ނުފޯރުވާނެ،" ނަޝީދުގެ ވާހަކަތަކާ ގުޅިގެން ސަރުކާރުގެ ބަހެއް ހޯދުމަށް"އަދަދު" އިން ކުރި ސުވާލަށް ޖަވާބު ދެއްވަމުން އަލީ ޒާހިރު ވިދާޅުވި އެވެ.
"ސަރުކާރުން އެދެނީ ދައުލަތުގެ އެއްވެސް ބާރަކުން އަދި މުއައްސަސާއަކުން ވެސް އެއްވެސް ފަރާތަކަށް ނުފޫޒު ނުފޯރުވުމަށް،"
އެމްޑީޕީގެ އެތެރޭގެ އިންތިހާބުގެ ފޯރިގަދަވެފައިވާއިރު އެ ޕާޓީގެ ތެރޭގައި ބަހުގެ ހަމަލާތައް އިތުރުވެ މެމްބަރުންގެ މެދުގައި ވަނީ ބޮޑެތި ހިޔާލުތަފާތުވުންތަކެއް އުފެދިފަ އެވެ.
އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން ނަޝީދު ހުންނެވީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) އާއެކު އެވެ. ރައީސް ސޯލިހު ހުންނެވީ އެމަނިކުފާނުގެ އިކޮނޮމިކް މިނިސްޓަރު ފައްޔާޒު އިސްމާއީލް އާއެކު އެވެ.
އިންތިއަށް ތާއީދުކުރައްވާ ނަޝީދުގެ އަރިސް މެމްބަރުން ގެންދަވަނީ އެމްޑީޕީގެ ބޮޑު ހިއްސާއެއް އޮތް ރައީސް ސޯލިހުގެ ސަރުކާރަށް ފާޑުކިޔުމާއި ބަހުގެ ހަމަލާތައް އަމާޒުކުރަމުންނެވެ.
ވަކިން ހާއްސަކޮށް ކޮރަޕްޝަންގެ މައްސަލަތައް ބެލުން ލަސްވެފައިވާތީ ސީދާ ނަޝީދު ވެސް އެމްޑީޕީގެ އެތެރޭގެ ޕްލެޓްފޯމްތަކާއި އެމަނިކުފާނުގެ އަމިއްލަ ސޯޝަލް މީޑިއާ އެކައުންޓުތައް މެދުވެރިކޮށް ގެންދަވަނީ ފާޑުވިދާޅުވަމުންނެވެ.
"އެމްޑީޕީ އާއި އަޅުގަނޑު ވެސް ބޭނުންވަނީ ވަރަށް އާދައިގެ ކަމެއް. އެއްވެސް ސަރުކާރަކުން ހިޔާނާތްތެރި ނުވުން. އެކަކާއި އަނެކަކު ތަފާތު ނުކުރުން. އަނިޔާވެރި ނުވުން. އެމްއެމްޕީއާރުސީ މައްސަލަ އާއި ވެންޓިލޭޓަރު މައްސަލަ ބެލުން އެއީ އިތުބާރު ލިބޭނެ ކަންކަން،" ނަޝީދު އިއްޔެ ކުރެއްވި ޓްވީޓެއްގައި ވެސް ވިދާޅުވި އެވެ.
ފައްޔާޒުގެ ފަޅީގައި ތިއްބެވި ސަރުކާރުގެ މެމްބަރުން ގެންދަވަނީ އެއީ އެމްޑީޕީގެ ސަރުކާރު ބަލިކަށިކޮށްލައި 2023 ވަނަ އަހަރުގެ ރިޔާސީ އިންތިހާބު ގެއްލުވާލަން ކުރައްވާ މަސައްކަތްތަކެއްގެ ގޮތުގައި ސިފަކުރައްވަމުންނެވެ.
