ފްރާންސްގެ ރައީސް ކަމަށް ދެ ވަނަ ދައުރަކަށް އިމޭނުއެލް މެކްރޯން އިންތިހާބުވެފައިވާ ކަމަށް ދައްކައިފި އެވެ.
އާދީއްތަ ދުވަހުގެ ވޯޓުލުމަށް ފަހު އިޕްސޯސް ޕޯލިން އިންސްޓިޓިއުޓުން ބުނީ 58.2 ޕަސެންޓު ވޯޓު މެކްރޯންއަށް ލިބިވަޑައިގެންނެވި ކަމަށެވެ. އިދިކޮޅު ކެންޑިޑޭޓް، ކަނާއަތު ފިޔައިގެ މަރީން ލެ ޕެންއަށް ލިބިވަޑައިގެންނެވީ 41.8 ޕަސެންޓް ވޯޓެވެ.
މެކްރޯން ކުރި ހޯއްދަވާފައި ވަނީ ކުރިން ލަފާ ކުރި ވަރަށް ވުރެ ބޮޑު ތަފާތަކުންނެވެ. ނަމަވެސް މިއީ 2017 ވަނަ އަހަރާ އަޅާ ބަލާއިރު ކުޑަ ތަފާތެކެވެ. އެ ފަހަރު ވޯޓުގެ 66.1 ޕަސެންޓް މެކްރޯންއަށް ލިބިވަޑައިގެންނެވި އެވެ. އަދި ލެ ޕެންއަށް ލިބިވަޑައިގެންނެވީ 33.9 ޕަސެންޓް ވޯޓެވެ.
އިންތިހާބުގައި ވޯޓުލާފައި ވަނީ ޝަރުތު ހަމަވާ މީހުންގެ ތެރެއިން 63.2 ޕަސެންޓު މީހުން ކަމަށް ފްރާންސްގެ އިންޓީރިއާ މިނިސްޓްރީން ބުންޏެވެ.
ފްރާންސްގެ ރައީސް އާއި ބޮޑު ވަޒީރު ތަފާތު ދެ ޕާޓީއަކަށް ނިސްބަތްވާ ނަމަ، ފަހުގެ ތާރީހުގައި ރައްޔިތުން އަބަދުވެސް ނިންމަނީ ވޯޓުން ރައީސް ބަދަލު ކުރުމަށެވެ. އެހެންކަމުން މެކްރޯން ވެވަޑައިގަންނަވާނީ ފަހުގެ ތާރީހެއްގައި އެފަދަ ގޮތަކަށް ދެ ވަނަ ދައުރަކަށް އިންތިހާބުވި ފުރަތަމަ ރައީސް އަށެވެ.
އިންތިހާބުގެ ފުރަތަމަ ބުރުގައި 12 ކެންޑިޑޭޓުން ވާދަކުރި ނަމަވެސް، 10 ޕަސެންޓަށް ވުރެ ގިނަ ވޯޓު ޔަގީންވީ ތިން ކެންޑިޑޭޓުންނަށެވެ. މެކްރޯންއަށް ލިބިވަޑައިގެންނެވީ 27.6 ޕަސެންޓް ވޯޓެވެ. އަދި ލެ ޕެންއަށް ލިބިވަޑައިގެންނެވީ 23.41 ޕަސެންޓެވެ. ތިން ވަނައަށް އެންމެ ތާއީދު ބޮޑު ކެންޑިޑޭޓް ޖޯން ލުކް މެލެންޗޯންއަށް ލިބިވަޑައިގެންނެވީ 21.95 ޕަސެންޓެވެ.
އިންތިހާބުގެ ވޯޓުލުމުގެ ދެ ވަނަ ބުރު އޮތީ އެންމެ ގިނަ ވޯޓު ލިބިވަޑައިގެންނެވި ދެ ކެންޑިޑޭޓުންގެ މެދުގަ އެވެ. ނަތީޖާ އިއުލާން ކުރުމާ އެކު ލެ ޕެން ބަލި ގަބޫލު ކުރެއްވުމަށް ފަހު ވިދާޅުވީ މިއީ އެކަމަނާގެ ޕާޓީއަށް ލިބުނު ކާމިޔާބެއް ކަމަށެވެ.
