އައްޑު ސިޓީގައި އުމުރުން ހަ އަހަރުގެ ތުއްތު ކުއްޖަކަށް ޖިންސީ ގޯނާ ކުރިކަމަށް ތުހުމަތުކޮށް ހައްޔަރުކުރި އުމުރުން 59 އަހަރުގެ ސ. ހިތަދޫއަށް ނިސްބަތްވާ އަންހެން މީހާ ބަންދުން ދޫކޮށްލައިފި އެވެ.
އޭނާ ބަންދުން ދޫކޮށްލީ އެ މައްސަލައިގައި ފުލުހުން ކުރި ތަހުގީގު ނިންމައި ޕްރޮސެކިއުޓާ ޖެނެރަލްގެ އޮފީހަށް ފޮނުވުމުން އެކަށީގެންވާ މިންވަރަށް ހެކި ނެތް ކަމަށް މިއަދު އެ އޮފީހުން ނިންމުމުން ކަމަށް ފުލުހުން އެކަމާއި ގުޅިގެން ނެރުނު ބަޔާނެއްގައި ބުނެ އެވެ. އޭނާ ބަންދުން ދޫކޮށްލުމަށްފަހު މިހާރު ގެޔަށް ބަދަލުކުރުމުގެ މަސައްކަތް ކުރަމުންދާކަމަށް މި ނޫހަށް ވަނީ މައުލޫމާތު ލިބިފަ އެވެ.
އެކަމާއި ގުޅިގެން ފުލުހުން ނެރުނު ބަޔާނެއްގައި ބުނީ އެ މައްސަލައިގައި ޖިނާއީ ތަހުގީގެއް ކުރާނޭ މިންވަރަށް ހެކި ލިބިފައިނުވާ ކަމަށް ޕީޖީ އޮފީހުން މިއަދު ނިންމަވާފައިވާ ކަމަށެވެ. އަދި، އެ މައްސަލަ ސީރިއަސް އަދި އަވަސް މައްސަލައެއްގެ ގޮތުގައި ފުލުހުން ތަހުގީގުކޮށްފައިވާ ކަމަށެވެ. އެ މައްސަލައިގައި ހިމެނޭ އެންމެހާ ފަރާތްތަކާއި ސުވާލުކޮށް، ހެއްކާއި ގަރީނާ ހޯދައި މައްސަލައާ ގުޅުންހުރި ހުރިހާ ލިޔެކިޔުމެއް ފުލުހުން ހޯދައި ޕީޖީ އޮފީހަށް ފޮނުވިކަމަށް ވެސް ފުލުހުން ބުނެ އެވެ.
"މައްސަލައިގެ ތަހުގީގުގައި ހޯދާފައިވާ ހެއްކާއި ގަރީނާ ވަޒަންކުރުމަށްފަހު، ޖިނާއީ ދައުވާއެއް ކޮށްގެން ކުށް ސާބިތުކުރެވޭ މިންވަރަށް ހެއްކާއި ގަރީނާ ލިބިފައިނުވާކަމަށް ބަޔާންކުރައްވައި އޭޕްރިލް 21، 2022 ވަނަ ދުވަހު ޕްރޮސެކިއުޓާ ޖެނެރަލްގެ އޮފީހުން މައްސަލަ ވަނީ އަނބުރާ ފޮނުއްވާފަ އެވެ،" ފުލުހުން ނެރުނު ބަޔާނުގައި ބުނެ އެވެ.
ހަ އަހަރުގެ ކުޑަ ކުއްޖާއަށް ޖިންސީ ގޯނާކުރިކަމުގެ ތުހުމަތުގައި އޭނާ ހައްޔަރުކުރީ މިދިޔަ މަހުގެ 24 ވަނަ ދުވަހު އެވެ، އެ މައްސަލައިގައި އޭނާ ހައްޔަރު ކުރި ނަމަވެސް، އައްޑޫގެ ގިނަ އާންމުންގެ ބަޔަކު ޖިންސީ ގޯނާގެ ތުހުމަތު ކުރަނީ ހަ އަހަރުގެ ކުއްޖާގެ ކާފައަށެވެ.
އަދި، ހައްޔަރު ކުރީ ކަމާނުބެހޭ މީހެއް ކަމަށް ބުނެ އައްޑޫ ސިޓީގައި ވަނީ ސިލްސިލާ މުޒާހަރާތަކެއްކޮށް ޕެޓިޝަނެއް ވެސް ހަދައިފަ އެވެ. އެހެން ވިޔަސް ފުލުހުން ވަނީ ހައްޔަރު ކުރި މީހާގެ އިތުރުން އެހެން މީހެއްގެ މައްޗަށް ތުހުމަތު ކުރެވޭނެ ހެކިި މިހާތަނަށް ނެތް ކަމަށް މީގެ ކުރިން ބުނެފަ އެވެ. އަދި، މިއަދު ފުލުހުން ނެރުނު ބަޔާނުގައި ވެސް ވަނީ ހަމަ އެހެން ބުނެފަ އެވެ.
އައިމިނަދިޔެ ބަންދުކުރަން ހިތަދޫ މެޖިސްޓްރޭޓް ކޯޓުން ނިންމިއިރު، އެ މައްސަލައިގައި ހައި ކޯޓުން ވެސް ވަނީ އޭނާ ބަންދްުކުރީ ރަނގަޅަށްކަމަށް ނިންމައިފަ އެވެ. ހިއުމަން ރައިޓްސް ކޮމިޝަނުން ވެސް ވަނީ އެ މައްސަލަ ބަލަމުންދާކަމަށް މީގެ ކުރިން ބުނެފަ އެވެ.
