ރޯދަ މަހުގައި އަލް އަގްސާ މިސްކިތުގެ ގޯތިތެރެ އާއި ހުޅަނގު އައްސޭރީގައި ފަލަސްތީނުގެ ރައްޔިތުން މަރައި، ޒަހަމްކުރަމުން ދިޔުމަކީ "ވަރަށް ހިތްހަމަނުޖެހޭ" ކަމެއް ކަމަށް ވިދާޅުވެ ތުރުކީގެ ރައީސް ތައްޔިބް އުރުދުގާން، އިޒްރޭލުގެ ރައީސް އިސްހާގް ހެރްޒޮގްއަށް ފޯނުން ގުޅުއްވައި އިންޒާރު ދެއްވައިފި އެވެ.
މިދިޔަ ހުކުރު ދުވަހުން ފެށިގެން އަލް އަގްސާ މިސްކިތުގެ ގޯތި ތެރޭގައި ދަނީ ހަމަނުޖެހުން ހިނގަމުންނެވެ. މިދިޔަ އަހަރުގެ ރޯދަ މަހު ވެސް އެ ތަނުގައި އުފެދުނު ހަމަނުޖެހުން ގޯސްވެ، އިޒްރޭލާއި ފަލަސްތީނުގެ ގާޒާގައި ވެރިކަން ކުރާ ހަމާސްއާ ދެމެދު 11 ދުވަހުގެ ހަނގުރާމައެއް ކުރި އެވެ.
ހުކުރު ދުވަހު އިޒްރޭލް ފުލުހުން މިސްކިތުގެ ގޯތި ތެރެއަށް ވަދެ ހިންގި ހަމަނުޖެހުމުގައި ފަލަސްތީނުގެ 152 މީހުންނަށް އަނިޔާވި އެވެ.
އުރުދުގާން ކުރެއްވި ޓްވީޓެއްގައި ވިދާޅުވީ އިޒްރޭލުގެ ރައީސަށް ގުޅުއްވައި "އިޒްރޭލުގެ ބައެއް ހަރުކަށި ގްރޫޕުތަކާއި ސަލާމަތީ ފައުޖުން" ހިންގާ ހަމަނުޖެހުމާ ގުޅޭ މަޝްވަރާ ކުރެއްވި ކަމަށެވެ. ހަމަނުޖެހުން ގާޒާއާ ހަމައަށް ފޯރުމާ މެދު "ވަރަށް ހިތްހަމަނުޖެހޭ" ކަމަށް އުރުދުގާން، ހެރްޒޮގްއަށް ވިދާޅުވި އެވެ.
އޭގެ އިތުރުން އަލް އަގްސާ މިސްކިތުގެ ޒަމާންވީ ހާލަތާއި އުސޫލުތަކަށް ބަދަލު އަންނަ ފަދަ އެއްވެސް ކަމަކަށް ފުރުސަތު ނުދިނުމަށް އިޒްރޭލަށް ގޮވާލެއްވި އެވެ. މި ދުވަސްވަރު އިޒްރޭލުން ދަނީ ޔަހޫދީންނަށް އަގްސާ މިސްކިތުގެ ގޯތި ތެރެއަށް ވަނުމުގެ ހުއްދަ ދޫކުރަމުންނެވެ.
ޔަހޫދީންނަށް މިސްކިތުގެ ގޯތި ތެރެއަށް ވަދެވުނު ނަމަވެސް، އަޅުކަން ކުރުން މަނަ އެވެ. ނަމަވެސް ނަސާރާއިންގެ އެންމެ ބޮޑު ފާދިރީ ޕޯޕް ފްރޭންސިސް ދާދި ފަހުން ވަނީ އެކަން ނިމުމަކަށް ގެނެސް، އަޅުކަން ކުރުމުގެ ހުއްދަ ދޭން ގޮވާލާފަ އެވެ.
