ވެލާނާ އެއާޕޯޓު (ވީއައިއޭ) ތަރައްގީކުރުމުގެ މަސައްކަތުގެ ތެރެއިން އަޅަން ނިންމާފައިވާ އާ ޕެސެންޖާ ޓާމިނަލްގެ ކުރެހުންތަކެއް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން އާންމުކޮށްފި އެވެ.
ވީއައިއޭގެ އާ ޕެސެންޖާ ޓާމިނަލަކީ ކުރީގެ ރައީސް އަބްދުﷲ ޔާމީން ފެއްޓެވި ވެލޭނާ އެއާޕޯޓުގެ އެކްސްޕޭންޝަން ޕްރޮޖެކްޓުގެ ދަށުން ކުރެވޭ މަސައްކަތެކެވެ.
ޕެސެންޖާ ޓާމިނަލް ހިމެނޭގޮތަށް މިހާރު ކުރިޔަށްދާ ވެލާނާ އިންޓަނޭޝަނަލް އެއާޕޯޓުގެ އެކްސްޕެންޝަން ޕްރޮޖެކްޓް އެއްކޮށް ނިމުމުން، އެއާޕޯޓުގެ ކެޕޭސިޓީ ދެ ގުނައަށް ވުރެ އިތުރުވެ، އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭ ފެންވަރަށް ވަސީލަތްތައް ތަރައްގީ ވެގެން ދާނެ އެވެ.
އެމްއޭސީއެލް އިން އާންމުކޮށްފައިވާ ކުރެހުންތަކަށް ބަލާއިރު، އާ ޓާމިނަލްގެ ބޭރު ވެސް ފަރުމާކޮށްފައި ވަނީ މި ޕްރޮޖެކްޓުގެ ދަށުން މިހާރު ތަރައްގީކޮށް ނިމިފައިވާ ވީއައިޕީ/ސީއައިޕީ ޓާމިނަލާއި ވިޔަފާރި އައުޓްލެޓްތައް ހުންނަ އިމާރާތުގެ ބޭރުގައި ހުންނަ ގޮތަށް ހުދުކުލައިގެ ސްޓްރަކްޗާތަކެއް ބޭނުންކޮށްގެންނެވެ. ދުރުން ބަލާއިރު މިތަންތަން ސިފަވަނީ ރާޅު ބާނިތަކެއް ގޮތަށެވެ.
ދެ ފަންގިފިލާއަށް ހުންނަ މި ޒަމާނީ ފެންވަރުގެ މި ޓާމިނަލްގައި 78،000 އަކަމީޓަރުގެ ޖާގަ ހުންނާނެ އެވެ. މިއާއެކީ މިހާރުގެ ޓާމިނަލަށް ދިމާވެފައިވާ ޖާގައިގެ ދަތިކަމުގެ މައްސަލަ ހައްލު ވެގެން ދާނެ އެވެ. އޭގެ އިތުރުން އެއިރޯ ބޯޑިން ބްރިޖުތަކާއި "ސްޓޭޓް-އޮފް-ދި-އާޓް" ބެޖޭޖް ހޭންޑްލިން ސިސްޓަމްތަކާއި، އެފްއެންބީ އައުޓްލެޓްތަކުގެ އިިތުރުން ލޯންޖުތަކާއި އެހެނިހެން ހިދުމަތްތައް ހުންނާނެ އެވެ.
ލަސްވެފައިވާ މަޝްރޫއެއް، އެކަމަކު މި އަހަރުގެ ނިޔަލަށް ނިމޭނެ
ބިލިއަން ޑޮލަރު ހަރަދުކޮށްގެން ހިންގާ ވީއައިއޭ އެކްސްޕޭންޝަންގެ ތެރޭގައި އާ ޓާމިނަލްގެ އިތުރުން ހިމެނެނީ އާ ރަންވޭއަކާއި، ކާގޯ ކޮމްޕްލެކްސްއަކާއި، ސީޕްލޭން ޓާމިނަލެއްގެ އިތުރުން ވީއައިޕީ/ސީއައިޕީ ޓާމިނަލަކާއި ފިއުލް ފާމެއް ހިމެނެ އެވެ.
މީގެ ތެރެއިން މިހާތަނަށް އެއްކޮށް ނިމުނީ އާ ރަންވޭ އާއި ސީޕްލޭން ޓާމިނަލާއި ވީއައިޕީ ޓާމިނަލުގެ އެވެ. ބާކީ ތަންތަނުުގެ އިމާރާތްކުރުުމުގެ މަސައްކަތް ކުރިޔަށް ދިޔަ ނަމަވެސް އަދި ނުނިމެ އެވެ. އެންމެ މަސައްކަތް ނުހިނގާ ތަނަކަށް ފާހަގަވީ ޕަސިންޖާ ޓާމިނަލެވެ.
އެ މަސައްކަތް ހަވާލުކުރި ސައުދީ ބިން ލާދިން ގްރޫޕުން ޓާމިނަލްގެ ބައެއް މަސައްކަތްތައް ކުރުމަށް ފަހު، މަސައްކަތް ހުއްޓާލީ 2018 ގަ އެވެ. ސީދާ ސަބަބެއް މިހާތަނަށް ސާފެއް ނުވެ އެވެ. އެކަމަކު ފަންޑިންއާ ގުޅޭ މައްސަލަތަކެއް ދިމާވި ކަމަށް އަޑުފެތުރުނެވެ.
ގާތްގަނޑަކަށް 350 މިލިއަން ޑޮލަރު (5 ބިިލިއަން ރުފިޔާ) ހަރަދުވާނެ ކަމަށް ލަފާކުރެވޭ މި ޕްރޮޖެކްޓަށް ފަންޑުކުރަނީ ސައުދީ އާއި ކުވެއިތު ފަންޑުންނެވެ. ފަހުން މި ސަރުކާރުން ވަނީ މި ގައުމުތަކުގެ ސަރުކާރުތަކާ ވާހަކަދެއްކުމަށް ފަހު ފަންޑިން މައްސަލަ ހައްލުކޮށް، ސަރުކާރުން ބޭނުންވާ ބައެއް ބަދަލުތަކާއެކީ މަޝްރޫއު ފެށޭނެ މަގުފަހިކޮށްފަ އެވެ.
މިހާރު އެމްއޭސީއެލް އިން ބުނަނީ މި އަހަރުގެ ފަހު ކޮޅު އާ ޓާމިނަލް އިމާރާތްކުރުމުގެ މަސައްކަތްތައް ނިމި، އަންނަ އަހަރުގެ ތެރޭގައި ފަސިންޖަރުންނަށް ހިދުމަތް ދޭން ފެށޭނެ ކަމަށެވެ.
