ފަލަސްތީނު މީހުންނާ ދެކޮޅަަށް މި ރޯދަމަހު އިޒްރޭލުން ދެމުންދާ އަނިޔާތަކާ މެދު ރާއްޖޭގެ ރައްޔިތުންގެ އޮތް ކަންބޮޑުވުން ރައްޔިތުންގެ މަޖިލީހުން ވެސް ހިއްސާކުރާ ކަމަށް އެ މަޖިލީހުން މިއަދު ބުނެފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހޯރަފުށި ދާއިރާގެ އެމްޑީޕީ މެމްބަރު އަހުމަދު ސަލީމް ވިދާޅުވީ އަލް ގުދުސްގައި ފަލަސްތީނުމީހުންނާ ދެކޮޅަށް އިޒްރޭލުން ދެމުން ގެންދާ އަނިޔާއަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށެވެ. އެ އަމަލުތައް އެންމެ ހަރުކަށި އިބާރާތުން ކުށްވެރިކުރާ ކަމަށް ވެސް އޭނާ ވިދާޅުވި އެވެ.
ސަލީމްގެ ވާހަކައަށް ފަހު ރިޔާސަތުން މަޖިލީހުގެ ރައީސް މުހައްމަދު ނަޝީދު ވިދާޅުވީ ފަލަސްތީނު ރައްޔިތުންނަށް ލިބޭ އަނިޔާ އާއި އަގުނުކުރެވޭ ވަރުގެ ގެއްލުމަކީ މި ރާއްޖޭގެ ހުރިހާ ރައްޔިތުން ވެސް އިންތިހާއަށް ކަންބޮޑުވާ ކަމެއް ކަމަށެވެ.
"އަޅުގަނޑުގެ އަމިއްލަ ނަމުގަޔާއި މި މަޖިލީހުގެ ހުރިހާ މެމްބަރުންގެ ނަމުގައި މިކަންބޮޑުވުން އަޅުގަނޑުމެން ހިއްސާކުރާކަން ފާހަގަކުރަން،" ނަޝީދު ވިދާޅުވި އެވެ.
ފަލަސްތީނު މީހުންނާ ދެކޮޅަށް އިޒްރޭލުން ހިންގާ އުދުވާން ކުށްވެރިކޮށް ސަރުކާރުން ވެސް މީގެ ކުރިން ބަޔާނެއް ނެރުނެވެ.
ހޮނިހިރު ދުވަހުގެ ރޭ ފޮރިން މިނިސްޓްރީން ނެރުނު ބަޔާނެއްގައި ބުނީ މާތްވެގެންވާ ރަމަޟާން މަހު އިޒްރޭލު ސިފައިން އަޤުސާ މިސްކިތަށް ވަދެ، ހަތިޔާރެއް ނެތް ފަލަސްތީނުމީހުންނަށް ދިން ހަމަލާ ދިވެހި ސަރުކާރުން ކުށްވެރިކުރާ ކަމަށެވެ. އަގުސާ މިސްކިތާއި ހިފާފައިވާ ފަލަސްތީނުގެ އެހެން ތަންތަނުގައި އިޒްރޭލުން ހިންގަމުންދާ އަމަލުތަކަކީ ބައިނަލް އަގުވާމީ ހުރިހާ ގާނޫނަކާއި އދ.ގެ ގަރާރުތަކާ ހިލާފުކަމެއް ކަމަށް ވެސް އެ ބަޔާނުގައި ބުންޏެވެ.
"އެފަދަ އަމަލުތަކަކީ ސަރަހައްދަށް ސުލްހަ ގެންނަން ކުރާ ހުރިހާ މަސައްކަތަކަށް ހުރަސް އަޅާ ކަންތައްތަކެކެވެ. ފަލަސްތީނު ރައްޔިތުންނަށް އަދި މިނިވަން މުސްތަގިއްލު ދައުލަތެއް ގާއިމްކުރަން އެމީހުން ކުރާ ހައްގު ޖިިހާދަށް ދިވެހިރާއްޖޭން ކުރާ ދެގޮތެއް ނުވާ ތާއީދު ތަކުރާރު ކުރަމެވެ،" ފޮރިން މިނިސްޓްރީން ނެރުނު ބަޔާނުގައި ބުންޏެވެ.
މެދުއިރުމައްޗަށް ދާއިމީ ސުލްހައެެއް އަންނަނީ 1967 ވަނަ އަހަރު އޮތް ސަރަހައްދީ ރޮނގާ އެއްގޮތަށް ދެދައުލަތް އޮންނާނެހެން، ފަލަސްތީނުމީހުންނަށް މިނިވަން މުސްތަގިއްލު ދައުލަތެއް ގާއިމްކޮށްދީގެން ކަމަށް ވެސް ސަރުކާރުގެ ބަޔާނުގައި ބުންޏެވެ.
