އޭޝިއާގެ މަތީ ފަންތީ މުބާރާތެއް ކަމަށްވާ، ސްމާޓް ބެޑްމިންޓަން އޭޝިއާ ޗެމްޕިއަންޝިޕް 2022 ގައި ރާއްޖޭގެ ދެބެން ކަމަށްވާ އައިމިނަތު ނަބީހާ އާއި ފާތިމަތު ނަބާހާ އަދި ޒަޔާން ޒަކީ ވާދަކުރަން ނިންމައިފި އެވެ.
ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) ގްރޭޑް ޓޫ، މުބާރާތެއް ކަމަށްވާ ބެޑްމިންޓަން އޭޝިއާ ޗެމްޕިއަންޝިޕް ކުރިއަށްދަނީ ފިލިޕީންސްގައި މި މަހު 26 އިން އަންނަ މަހު އެއް ވަނަ ދުވަހުގެ ނިޔަލަށެވެ. މުބާރާތުގައި ޖާގަތަށް ދީފައިވާ ގޮތަށް ބަލާއިރު، ކޮންމެ އިވެންޓެއްގެ މެއިން ޑްރޯގައި ހިމެނެނީ 28 ކުޅުންތެރިން ނޫނީ ޕެއާ އެވެ. ކޮލިފައިން ބުރުގައި 12 ކުޅުންތެރިން ނޫނީ ޕެއާ ވާދަކޮށްގެން މެއިން ޑްރޯ އަށް އާދެވޭނީ ހަތަރު ކުޅުންތެރިން ނޫނީ ޕެއާ އަށެވެ.
މުބާރާތަށް ކުޅުންތެރިން ހޮވާއިރު، ބަލާ ކްރައިޓީރިއާގެ ތެރެއިން ބީޑަބްލިއުއެފް ރޭންކިން އަށް ބަލާނެ އެވެ. ރޭންކިން ރަނގަޅުނަމަ މެއިން ޑްރޯ އިން ފުރުސަތު ލިބޭއިރު، އެ ވަރުގެ ރޭންކިން އެއް ނެތްނަމަ ދެން ފުރުސަތެއް އޮންނާނީ ކޮލިފައިން ބުރުންނެވެ. އެއީ ވެސް ހާއްސަ މިންގަނޑަކަށް ބަލައިފަ އެވެ.
ރާއްޖޭން ވާދަކުރަނީ، ފިރިހެން ސިންގަލްސްގެ ކޮލިފައިންގައި ޒަޔާން އާއި އަންހެން ސިންގަލްސްގެ ކޮލިފައިންގައި ނަބާހާ އެވެ. ނަބާހާ ކޮލިފައިންގައި ހިމެނެނީ ފިލިޕީންސްގެ ޖަނެލް އޭން އަންދްރެސް އާއި އިންޑޮނީޝިއާގެ ސްޓެފަނީ ވިޑްޔާޔާ އެކު ކޮލިފައިން ގްރޫޕް ބީގަ އެވެ. ޒަޔާން ހިމެނެނީ ޗައިނާގެ ވެން ހޮން ޔަން އާއި މިޔަންމާގެ ފޯން ޕަޔެ ނިއާންއާ އެކު ކޮލިފައިން ގްރޫޕް ބީގަ އެވެ.
މެއިން ޑްރޯގައި ރާއްޖޭން ވާދަކުރަނީ އަންހެން ޑަބަލްސް އާއި މިކްސް ޑަބަލްސްގަ އެވެ. އެ ގޮތުން އަންހެން ޑަބަލްސްގައި ނަބާހާ އާއި ނަބީހާގެ ޕެއާ ކުޅެން ޖެހިފައިވަނީ ދެ ވަނަ އަށް ސީޑްކޮށްފައިވާ ދެކުނު ކޮރެއާގެ ލީ ސޮހީ އާއި ޝިން ސުއެންޝަންގެ ޕެއާއާ އެވެ. މިކްސް ޑަބަލްސް ބައިގައި ޒަޔާން އާއި ނަބާހާގެ ޕެއާ ނުކުންނާނީ ޖަޕާނުގެ ހިރޯކީ މިޑޮރިކާވާ އާއި ނަޓްސޫ ސައިޓޯގެ ޕެއާއާ އެވެ.
ސްމާޓް ބެޑްމިންޓަން އޭޝިއާ ޗެމްޕިއަންޝިޕްގައި ވާދަކޮށްލުުމުގެ ފުރުސަތަކީ ދިވެހި ކުޅުންތެރިން ރޭންކިން މައްޗަށް ޖައްސާލަން ބޭނުންހިފޭނެ ފުރުސަތެކެވެ. މި މުބާރާތުގައި އޭޝިއާ ބައްރުގެ އެކި ގައުމުތަކަށް ނިސްބަތްވާ ފެންވަރު ރަނގަޅު ކުޅުންތެރިން ވާދަކުރެ އެވެ.
