ރައީސް އަބްދުﷲ ޔާމީނަށް މަނީ ލޯންޑާ ކުރަން މަގުފަހިކޮށްދިންކަމުގެ ތުހުމަތުގައި އޭރުގެ ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝުކޫރުގެ މައްޗަށް އުފުލި ދައުވާ ކްރިމިނަލް ކޯޓުން ބޭރުކޮށްލުމުން ހައި ކޯޓުގައި އިސްތިއުނާފް ކުރި ޝަރީއަތުގައި ވެސް އާޒިމާގެ ވަކީލު އަދި ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިޔާހަތަށް ވަކާލާތު ނުކުރެވޭ ކަމުގެ އިއުތިރާޒް ދައުލަތުން ހުށަހަޅައިފި އެވެ.
މިއީ ކްރިމިނަލް ކޯޓުގައި ވެސް މީގެ ކުރިން ދައުލަތުން ހުށަހެޅި އިއުތިރާޒެކެވެ. ނަމަވެސް އާޒިމާގެ މައްސަލައިގައި ޕްރޮސެކިއުޓާ ޖެނެރަލް (ޕީޖީ) އޮފީހުގައި ނިހާޔަތު ކުރި މަސައްކަތެއް ދައުލަތަށް ބުނެދެވިފައިނުވާތީ ކްރިމިނަލް ކޯޓުން އެ އިއުތިރާޒް ބަލައިނުގަނެ ނިހާޔަތަށް ބައިވެރިވެވޭ ގޮތަށް މައްސަލަ ކުރިއަށް ގެންދިޔަ އެވެ.
ކްރިމިނަލް ކޯޓުން އާޒިމާގެ މައްސަލަ މަދަނީ މިންގަނޑުން ކުރިއަށް ގެންދެވޭނެ ކަމަށް ނިންމުމުން އޭނާގެ ފަރާތުން ހައި ކޯޓުގައި އިސްތިއުނާފް ކޮށްފައިވާ މައްސަލައިގައި ބޭއްވި ފުރަތަމަ އަޑުއެހުމުގައި ވެސް ދައުލަތުން އަލުން ވަނީ އެ އިއުތިރާޒް ހުށަހަޅުއްވައިފަ އެވެ.
ދައުލަތުގެ ނުކުތާއަކީ، ދައުވާ ކުރި މައްސަލާގައި ބައިވެރިވި އިދާރާގެ މުވައްޒަފަކަށްވާ ނަމަ މަސްލަހަތު ފުށު އަރާނެތީ، އެ މައްސަލާގައި ދައުވާ ރައްދުވާ ބައެއްގެ ވަކީލަކަށް ނުހުރެވޭނެ ކަމަށް ޖިނާއީ އިޖުރާއަތުގެ ގާނޫނުގައި ބަޔާން ކޮށްފައި އޮންނަ މާއްދާ އެވެ.
ދައުލަތުގެ އެ ނުކުތާއަށް ރައްދު ދެއްވަމުން ނިހާޔަތު ވިދާޅުވީ، ދަށު ކޯޓާއި ހައި ކޯޓުގައި ވެސް ދައުލަތަކަށް އާޒިމާއަށް ދައުވާ އުފުލުމުގައި ނިހާޔަތުގެ ބައިވެރިވުމެއް އޮތް ގޮތެއް ކިޔައިދެވިފައި ނުވާ ކަމަށެވެ. ޕީޖީ އޮފީހުގައި ކިތަންމެ މަތީ މަގާމެއްގައި އޭރު ހުރި ނަމަވެސް އާޒިމާއަށް ދައުވާ ކުރަން ފޮނުވި މައްސަލައިގެ އެއްވެސް މައުލުމާތަކަށް އެކްސެސް ވުމުގެ ބާރެއް އޭނާއަށް ލިބިފައި ނެތް ކަމަށް ވިދާޅުވި އެވެ.
މައްސަލަ ބައްލަވާ ފަނޑިޔާރު ފާތިމަތު ފަރްހީޒާ ވަނީ ދައުލަތުގެ ނުކުތާއާއި ގުޅިގެން ގިނަ ސުވާލުތަކެއް އަމާޒު ކުރައްވައިފަ އެވެ. މި ގޮތުން ސުޕްރީމް ކޯޓުގައި މިހާރު ކުރިއަށްދާ މަރުގެ މައްސަލައެއްގެ ހުކުމް ތަންފީޒު ކުރަމުންދާ ހ. ބައިކަނޑިގޭ, މަރިޔަމް ނަޒާހާގެ ވަކީލާކަށް ހުންނެވުމުން އެ ކޯޓުން ނިންމާފައިވާ ހުކުމާއި ގުޅޭ ގޮތުން ވެސް ފަނޑިޔާރު ސުވާލު ކުރެއްވި އެވެ.
ފަނޑިޔާރުގެ ސުވާލުގެ ޖަވާބުގައި ދައުލަތުގެ ވަކީލު، ޕަބްލިކް ޕްރޮސެކިއުޓަރު އައިޝަތު މުހައްމަދު ވިދާޅުވީ އާޒިމާގެ މައްސަލައާއި ނަޒާހާގެ މައްސަލައާ ވަރަށް ތަފާތު ކަމަށެވެ. ނަޒާހާގެ މައްސަލަ ސުޕްރީމް ކޯޓުގައި ފެށީ ވެސް މާ ފަހުގެ ތާރީޚެއްގައި ކަމަށް ދައުލަތުން ވިދާޅުވި އެވެ. ދައުލަތުން ގަބޫލު ކުރައްވާ ގޮތުގައި، މައްސަލައިގައި ސީދާ ބައިވެރިވުމެއް ނެތަސް ޕީޖީ އޮފީހުގައި އުޅުއްވާފައިވާތީ ފުށު އެރުން އޮންނާނެ އެވެ.
މިއަދުގެ އަޑުއެހުމުގައި މަދަނީ މިންގަނޑުން މައްސަލަ ކުރިއަށް ގެންދިއުމާ ގުޅޭ ގޮތުން އެއްވެސް ވާހަކައެއް ނުދެއްކުނެވެ. ފަނޑިޔާރު ވިދާޅުވީ ދެން އޮންނަ އަޑުއެހުމެއްގައި އެންމެ ފުރަތަމަ ވެސް ދައުލަތުން ހުށަހެޅުއްވި އިއުތިރާޒާއި ގުޅޭ ގޮތުން ގޮތެއް ނިންމަވާނެ ކަމުގަ އެވެ.
އޮންލައިންކޮށް ކުރިއަށް ގެންދިޔަ އެ އަޑުއެހުމުގައި އާޒިމާއާއި އޭނާގެ ވަކީލުން ތިއްބެވި ތަނުން އިންޓަނެޓް ކަނެކްޓް ވުމުގައި މައްސަލަތަކެއް ދިމާވި އެވެ. އޭގެ ސަބަބުން ވެސް ޝަރީއަތުގެ ގިނަ ވަގުތުތަކެއް ގެއްލިގެން ދިޔަ ކަމަށާއި އެހެންވެ މާދަމާ ހާޒިރުވެގެން ކުރިއަށް ގެންދާ ގޮތަށް އަޑުއެހުމެއް ތާވަލު ކުރައްވާނެ ކަމަށް ފަނޑިޔާރު ވިދާޅުވި އެވެ.
