މޮނާކޯ، ފްރާންސް (އޭޕްރީލް 12) - މޮންޓެ ކާލޯ މާސްޓާސްގެ ދެ ވަނަ ބުރުން ކަޓައި، ދުނިޔޭގެ ރޭންކިންގެ އެއް ވަނައިގައި އޮތް ސާބިއާގެ ނޮވަކް ޖޮކޮވިޗް އިތުރު ޕްރެޝަރަކަށް ވެއްޓިއްޖެ އެވެ.
މި އަހަރުގެ ޖެނުއަރީ މަހު އޮސްޓްރޭލިއަން އޯޕަން އަށް ދިޔައިރު، ކޮވިޑް-19 ވެކްސިން ނުޖަހައި ހުރި މައްސަލައިގައި ޖޮކޮވިޗަށް ކުރިމަތިވި ކަންތައްތައްތަކަށް ފަހު އޭނާ ވަނީ މުބާރާތުން ވަކިކޮށް، އޮސްޓްރޭލިއާ އިން ޑީޕޯޓްކޮށްލައިފަ އެވެ. އޭގެ ފަހުން ފެބްރުއަރީ މަހު ދުބާއީގައި ބޭއްވި މުބާރާތުގައި ވާދަކޮށް، ކުއާޓާ ފައިނަލުން ޖޮކޮވިޗް ކެޓީ އެވެ. ވެކްސިން މައްސަލައިގައި ޖޮކޮވިޗަށް ޖެހުނީ އެމެރިކާގައި ކުރިއަށްދިޔަ އިންޑިއަން ވެލްސް އާއި މިއާމީ އޯޕަން ވެސް ނުކުޅެ މަޑުކުރާށެވެ.
މިދިޔަ މަހު ކުރު މުއްދަތަކަށް ޖޮކޮވިޗް އަތުން ދުނިޔޭގެ ރޭންކިން އެއް ވަނަ ގެއްލުނު ނަމަވެސް އޭނާ އަށް ވަނީ އަލުން ކުރީގެ މަގާމު ލިބިފަ އެވެ. ޖޮކޮވިޗަށް އަލުން އެއް ވަނަ ލިބުނީ ރޭންކިން ކުރިއަށް އެރި ރަޝިއާގެ ޑަނީލް މެޑްވެޑޭވަށް މަގާމު ދިފާއުކުރުމުގައި ކާމިޔާބު ނުލިބުމުންނެވެ.
ޖޮކޮވިޗް، ރޭންކިން އެއް ވަނަ އަށް އަރައި، މަގާމު ދިފާއުކުރަން މޮންޓެ ކާލޯ މާސްޓާސް މުބާރާތަށް ނުކުމެ، މިއަދު މި ވަނީ ފުރަތަމަ މެޗުން ބަލިވެ، މުބާރާތުން ކަޓައިފަ އެވެ. ދެ މަސް ދުވަސް ފަހުން ވާދަވެރި ޓެނިސް މެޗަކަށް ނުކުމެ ނާކާމިޔާބީއަކާ ކުރިމަތިލާން ޖެހުނީ އެވެ.
މޮންޓެ ކާލޯ މާސްޓާސްގެ ދެ ވަނަ ބުރުގައި ޖޮކޮވިޗް އަތުން މޮޅުވީ ދުނިޔޭގެ 46 ވަނައިގައި އޮތް ސްޕެއިނުގެ އަލެހަންދްރޯ ޑަވިޑޮވިޗް ފޯކީނާ، 22، އެވެ. ޖޮކޮވިޗް އަތުން ގިނަ ގޯސްތަކެއް ހެދުނު މި މެޗުގެ ސެޓުތައް ދިޔައީ 6-3 6-7 (5-7) 6-1 އިންނެވެ. މި ނާކާމިޔާބީއާ އެކު ޖޮކޮވިޗް މި ވަނީ ހަތަރު އަހަރަށް ފަހު މުބާރާތެއްގައި އޭނާ ކުޅުނު ފުރަތަމަ މެޗުން ބަލިވެފަ އެވެ. އެންމެ ފަހުން ޖޮކޮވިޗް މުބާރާތެއްގައި ކުޅުނު ފުރަތަމަ މެޗުން ބަލިވީ މީގެ ހަތަރު އަހަރު ކުރިން ބާސެލޯނާގަ އެވެ.
މީގެ ކުރިން އަލެހަންދްރޯއާ ދެކޮޅަށް ޖޮކޮވިޗް ނުކުތް ދެ ފަހަރު ވެސް ވަނީ ފަސޭހައިން މޮޅުވެފަ އެވެ. އެއީ މިދިޔަ އަހަރުގެ އޮލިމްޕިކްސް އާއި އިޓަލީގެ ރޯމް މުބާރާތުގަ އެވެ. އެކަމަކު، މި ފަހަރު ޖޮކޮވިޗަށް ގިނަ ގޯސްތަކެއް ހެދި އަހެންދްރޯ އަށް މެޗު ކާމިޔާބުކުރަން ފަސޭހަވީ އެވެ.
މި އަހަރު ފެށި ފަހުން ވާދަވެރި މުބާރާތްތަކުގައި ޖޮކޮވިޗް ކުޅެފައިވަނީ ޖުމްލަ ހަތަރު މެޗުގަ އެވެ. ޖޮކޮވިޗް ބުނީ މެޗުތަކުގައި ނުކުޅެ ހުންނަން ޖެހުމުން ހަމައެކަނި އަސަރުކުރަނީ މެޗު ފިޓްނަސް އަށް އެކަނި ނޫން ކަމަށާއި މެންޓަލީ ވެސް އުނދަގޫތަކެއް ތަހައްމަލުކުރަން ޖެހޭ ކަމަށެވެ.
