އުރީދޫ ދިވެހި ޕްރިމިއާ ލީގުގައި މިރޭ ކުޅުނު މެޗުގައި ސުޕަ ޔުނައިޓެޑް ސްޕޯޓްސް (ސަސް) އާއި ޔުނައިޓެޑް ވިކްޓްރީ (ޔޫވީ) ކުޅުނު މެޗު ލަނޑެއް ނުޖެހި 0-0 އިން އެއްވަރުވެއްޖެ އެވެ.
ލީގުގެ ފުރަތަމަ ބުރުގައި ސަސް އާއި ޔުނައިޓެޑް ވިކްޓްރީގެ މެޗު ނިމުނީ 2-2 އިން އެއްވަރުވެގެންނެވެ. މިރޭގެ މެޗު އެއްވަރުވުމުން ކިރިޔާ ވެސް ފަރުޖައްސާލެވޭނެ ޓީމަކީ ޔުނައިޓެޑް ވިކްޓްރީ އެވެ. އެ ޓީމަށް މޮޅުވެގެން ހަތަރު ވަނަ އަށް އެރުމުގެ ފުރުސަތު އޮތް ނަމަވެސް ބަލިނުވެ ސަލާމަތްވުމުން ވަނީ ފަސް ވަނަ މި ވަގުތަށް ދިފާއުކުރެވިފަ އެވެ.
ހަތަރެއްގައި އޮތް ޓީސީ ސްޕޯޓްސް ކްލަބަށް އަށް މެޗުން 11 ޕޮއިންޓް ލިބިފައިވާއިރު، ފަސް ވަނައިގައި ޔުނައިޓެޑް ވިކްޓްރީ އޮތީ އަށް މެޗުން 10 ޕޮއިންޓް ހޯދައިގެންނެވެ. ސަސް، ހަ ވަނައިގައި އޮތީ އަށް މެޗުން އަށް ޕޮއިންޓް ހޯދައިގެންނެވެ.
ފުރަތަމަ އެގާރަ އަށް ބަލާއިރު، ޔުނައިޓެޑް ވިކްޓްރީން ވަނީ އަނިޔާ އަށް ފަހު އެނބުރި އައި އަލީ ޝަމާލް އަބްދުﷲ ހިމަނައިފަ އެވެ. އެކަމަކު، އަދިވެސް ޔުނައިޓެޑް ވިކްޓްރީގެ އެއް ވަނަ ކީޕަރު ނާޖިހު އަލީ (ނާޖީ) އަނިޔާގައި ހުރުުމުން، މި މެޗުގައި ވެސް އެ ޓީމުގެ ގޯލު ބެލެހެއްޓީ އަހުމަދު އަނަފް ޒަރިޔަންދު އެވެ. ސަސްގެ ފުރަތަމަ އެގާރައިގައި ވަނީ ފުރަތަމަ ބުުރުގެ ފަހު މެޗުތަކުގައި އަނިޔާގެ ސަބަބުން ނުފެނުނު، މުހައްމަދު އައްޒާމް ހިމަނައިފަ އެވެ.
މެޗުގެ ފުރަތަމަ ހަމަލާ ފޮނުވާލީ ޔުނައިޓެޑް ވިކްޓްރީންނެވެ. ތިން ވަނަ މިނިޓްގައި އެ ޓީމުގެ ކެޕްޓަން އަލީ ހަމްދާން (އައްޔަ) އޭރިއާބޭރުން ޖެހި ބޯޅަ ސަސްގެ ކީޕަރު މުހައްމަދު ޝަފީއު (ޗެކް) ވަނީ މަތަކޮށްފަ އެވެ.
ސަސް އަށް ލީޑުނަގައިދޭން މެޗުގެ 13 ވަނަ މިނިޓްގައި އަލީ ނަސޫހު ރަޝީދު (ޕިލާ) އަށް ހުސް ފުރުސަތެއް ލިބުނެވެ. ޔަސްފާދު ހަބީބު (މުލަކޭ) ހުސްކޮށްލާފައި ނެގި ބޯޅަ އޭރިއާތެރޭގައި ހުރެފައި ޕިލާ ވޮލީއަކުން ފޮނުވާލިއިރު، ދިޔައީ ހުރަސްދަނޑިމަތިންނެވެ. މެޗުގެ 25 ވަނަ މިނިޓްގައި ޔުނައިޓެޑް ވިކްޓްރީގެ ޑިފެންޑަރުން ހެދި ގޯހެއްގެ ފައިދާނަގައި ޕިލާ އަށް އޭރިއާތެެރެއިން ލިބުނު ބޯޅައެއް ގޯލަށް ފޮނުވާލުމުން ކީޕަރު އަނަފް ވަނީ މަތަކޮށްފަ އެވެ.
މެޗުގެ 37 ވަނަ މިނިޓްގައި ކައުންޓަ އެޓޭކުގައި ސަސްގެ މުހައްމަދު ސަހާއު (ބޭލް) ވެސް ރަނގަޅު ހަމަލާއެއް އުފެއްދި އެވެ. އޭރިއާތެރެއިން، ސަހާއު ގޯލުގެ ކައިރީ ކަނަށް ފޮނުވާލަން ޖެހި ބޯޅަ އަމާޒުވީ އަރިމަތީ ދާގަނޑެށެވެ.
ސަސް އިން ވަނީ ދެ ވަނަ ހާފްގެ ކުޅުން ފެށިގެން 10 މިނިޓް ވެސް ނުވަނިސް އަޔާޒް އަހުމަދު (އަޔާ) ކުޅެން އަރުވައިފަ އެވެ. މިއީ ސަސް ޖޯޒީގައި ލީގުގައި އަޔާގެ ފުރަތަމަ މެޗެވެ.
މެޗުގެ 57 ވަނަ މިނިޓްގައި ޔުނައިޓެޑް ވިކްޓްރީގެ ބެލަރޫސް ފޯވާޑް، އިވާން ވެރާސް އަށް ވަނީ ރަނގަޅު ފުރުސަތެއް ލިބިފަ އެވެ. އޭރިއާތެެރެއަށް ހުރަސްވި ބޯޅައެއްގައި، ކީޕަރު ޝަފީއު އާއި ޔުނައިޓެޑް ވިކްޓްރީގެ ކިރްގިސްތާން މިޑްފީލްޑަރު އަނަޓޯލީ ވްލަޝީޗޭފް (ޓޯނީ) އެރި ބޯޅައެއްގައި ކީޕަރު ޝަފީއު އަތުގައި ޖެހިފައި ލިބުނީ އިވާން އަށެެވެ. އިވާން ޖެހި ބޯޅަ ކީޕަރު ޝަފީއު ވަނީ މަތަކޮށްފަ އެވެ.
ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި ހާފުގައި ދެ ކޮޅަށް ވެސް ގޯލު ޖަހަން ފުރުސަތުތައް ދިޔައީ ލިބެމުންނެވެ. މެޗުގެ 66 ވަނަ މިނިޓްގައި ޔުނައިޓެޑް ވިކްޓްރީގެ މޫސާ އަޒީމް ހަސަން ނެގި ހުރަހެއް ދިފާއުކުރަން ސަސްގެ ކެޕްޓަން އަބްދުﷲ ހަނީފް (ބެންޖޯ) ޖައްސާލި ބޯޅަ މިސްރާބު ބަދަލުވެ، ދިޔައީ އެ ޓީމުގެ ގޯލު ދަނޑިކައިރިން ކިރިޔާ ބޭރުންނެވެ.
މެޗުގެ 84 ވަނަ މިނިޓްގައި ޔުނައިޓެޑް ވިކްޓްރީގެ އޭރިއާ ރޮނގުކައިރިން ލިބުނު ހިލޭ ޖެހުމަކުން ބެންޖޯ ފޮނުވާލި ބޯޅަ އަމާޒުވީ ޔުނައިޓެޑް ވިކްޓްރީން އަތުރާލި ދިފާއީ ފާރަށެވެ. މެޗުގެ ފަހު ކޮޅުގައި ޔުނައިޓެޑް ވިކްޓްރީން ވަނީ މެޗުގެ ރެފްރީ ރައޫފް ރައީފްގެ ނިންމުންތަކާ މެދު ހިތްހަމަނުޖެހުން ފާޅުކޮށްފަ އެވެ. އިތުުރު ވަގުތަށް ތިން މިނިޓް ދެއްކުމަށް ފަހު މާ އަވަހަށް ނިންމާލުމުން ދެ ޓީމުގެ ބެންޗުން ވެސް ވަނީ އެކަމާ ހިތްހަމަނުޖެހުން ފާޅުކޮށްފަ އެވެ.
