ޒިކުރާ މިސްކިތް ހުރި ބިމުގައި 10 ބުރީގެ ޒަމާނީ އިސްލާމިކް ސެންޓަރެއް އެޅުމުގެ ޕްރޮޖެކްޓު ހަވާލު ކުރުމުގައި ކޮރަޕްޝަންގެ މައްސަލަތަކެއް ހުރި ކަމަށް ބުނެ ކުރީގެ އިސްލާމިކް މިނިސްޓަރު. ޑރ. އަހުމަދު ޒިޔާދު ބާގިރުގެ މައްޗަށް ކުރި ޖިނާއީ ދައުވާ ސާބިތުނުވާ ކަމަށް ކްރިމިނަލް ކޯޓުން ކުރި ހުކުމް ދައުލަތުގެ ފަރާތުން ހައި ކޯޓުގައި އިސްތިއުނާފް ކުރި މައްސަލަ މާދަމާ ފަށަން ނިންމައިފި އެވެ.
ޒިޔާދުގެ މައްޗަށް އުފުލާފައިވާ ރަސްމީ ހައިސިއްޔަތު ނަހަމަ ގޮތުގައި ގޮތުގައި ބޭނުން ކުރުމުގެ ކުށުގެ ދައުވާ ދަށު ކޯޓުގައި ސާބިތު ނުވުމުން ހައި ކޯޓުގައި އިސްތިއުނާފް ކޮށްފައިވާ މައްސަލަ ތާވަލުކޮށްފައި ވަނީ މާދަމާ ހެނދުނު 9:45 އަށެވެ.
އޭނާގެ މައްޗަށް ދައުވާ ކުރީ އިސްލާމިކް މިނިސްޓަރުގެ މަގާމުގައި ހުންނެވި އިރު ޒިކުރާ މިސްކިތް ހުރި ބިމުގައި 10 ބުރީގެ އިމާރާތެއް އެޅުމަށް އެސް.ޖޭ ކޮންސްޓްރަކްޝަން އިން ހުށަހެޅި ޕްރޮޕޯސަލްއާ ހިލާފަށް ދައުލަތަށް ގެއްލުންވާ ގޮތަށް އެއްބަސްވުން ގާއިމުކޮށްފައިވާ ކަމަށް ބުނެ އެވެ.
ޒިޔާދުގެ މައްޗަށް ދައުވާ ކުރީ ކީއްވެ؟
ޖުމްލަ އަގު 130 މިލިއަން ރުފިޔާއަށް އަރާ އެ ޕްރޮޖެކްޓު އެސްޖޭ ކޮންސްޓްރަކްޝަންއާ ހަވާލުކުރީ އޯޕަން ބިޑިން މަރުހަލާއެއް ނެތި ސަރުކާރުން ޕްރޮޖެކްޓް އެވޯޑު ކުރާ ގޮތަށެވެ. ޖުމްލަ ތިން ބިޑުގެ ތެރެއިން އެސްޖޭއަށް މަސައްކަތް އެވޯޑް ކުރުމަށް ފެންނަ ކަމަށް ފިނޭންސް މިނިސްޓްރީން އޮތީ ބުނެފަ އެވެ. އަދި، އެ މިނިސްޓްރީގެ އެންގުމާ އެއްގޮތަށް ކުރިއަށް ދިޔުމަށް ރައީސް އޮފީހުން އޮތީ އިސްލާމިކް މިނިސްޓްރީއަށް އަންގައިފަ އެވެ.
އެ މަސައްކަތް އެވޯޑު ކުރުމުގައި ސަރުކާރުގެ ވިސްނުން ހުރީ އިމާރާތް ކުރާ ފަރާތަށް އިމާރާތުގެ ތިން ބުރި އަދި ސަރުކާރަށް ހަތް ބުރި ނެގުމަށެވެ. ނަމަވެސް، ޖުލައި 2018، ގައި ދެފަރާތުން އެއްބަސްވުމުގައި ސޮއިކުރިއިރު އޮތީ، އެސްޖޭއަށް އިމާރާތުން ހަތަރު ބުރި އަދި ސަރުކާރަށް ހަ ބުރި ލިބޭ ގޮތަށެވެ. އެއީ ޒިޔާދުގެ މައްޗަށް ދައުވާ އުފުލި މައިގަނޑު ސަބަބެވެ.
އޭގެ އިތުރުން، އިކުއިޓީގެ ގޮތުގައި 30 މިލިއަން ރުފިޔާ އެސްޖޭއަށް އިސްލާމިކް މިނިސްޓްރީން ދިން ނަމަވެސް އިސްލާމިކް ސެންޓަރުގެ މަސައްކަތް ކުރިއަށް ގޮސްފައިނުވުމަކީ ވެސް ޒިޔާދުގެ މައްޗަށް ދައުވާ އުފުލި ސަބަބެކެވެ.
ޝަރީއަތުގެ އަޑުއެހުންތަކަށް ކަޅިއެއް
މި މައްސަލައިގައި ޒިޔާދުގެ ފަރާތުން ކްރިމިނަލް ކޯޓުގައި ބުނެފައި ވަނީ އޭނާ އެއްބަސްވުމުގައި ސޮއިކުރިއިރު އެސްޖޭއަށް އިމާރާތުން ހަތަރު ބުރި އަދި ސަރުކާރަށް ހަ ބުރި ލިބޭ ގޮތަށް އެގްރިމެންޓުގައި ލިޔެފައި އޮތީ އޮޅުމަކުން ކަމަށެވެ. އަދި، އޮޅުން އިސްލާހު ކުރުމަށް މިނިސްޓްރީ މެދުވެރިކޮށް މަސައްކަތްކޮށްފައިވާނެ ކަމަށް ވެސް ޒިޔާދު ވިދާޅުވެފައިވެ އެވެ.
އެގްރިމެންޓުގައި އޮތް ކުށް އިސްލާހު ކުރުމަށްޓަކައި އެސްޖޭ ކޮންސްޓްރަކްޝަން އެ މިނިސްޓްރީއަށް ހާޒިރުވުމަށް އެންގި ކަމަށް ޑރ. ޒިޔާދު އޮތީ ޝަރީއަތުގައި ވިދާޅުވެފަ އެވެ. އަދި، އެ އީމެއިލް ފޮނުވި މުވައްޒަފު ވެސް ކޯޓަށް ހާޒިރުވެ އެ މައްސަލައިގައި ވަނީ ހެކިބަސް ދީފަ އެވެ.
އިސްލާމިކް މިނިސްޓްރީގެ ފަރާތުން އެސްޖޭއަށް އިކުއިޓީގެ ގޮތުގައި 30 މިލިއަން ރުފިޔާ ދިން މައްސަލައިގައި ޒިޔާދުގެ ފަރާތުން ވިދާޅުވެފައި ވަނީ އެ ފައިސާ އިމާރާތް ކުރަން ހަވާލު ކުރި ކުންފުންޏަށް ދޫކުރީ އެގްރިމެންޓުގެ ދަށުން އެ ފައިސާ ދޫކުރަންޖެހޭތީ ކަމަށެވެ.
އެ ނުކުތާގައި ކޯޓުން ނިންމީ އެ 30 މިލިއަން ރުފިޔާއަކީ ޖާއިޒު ނޫން ގޮތެއްގައި ދިން ފައިސާއެއްކަން އެނގެން ނެތް ކަމަށެވެ. އަދި އެއީ އެސްޖޭ ކޮންސްޓްރަކްޝަނުން ހުށަހެޅި ޕްރޮޕޯސަލްގައި ވެސް އޮތް ފައިސާއެއް ކަމަށާއި އެއީ އެންމެ ރަނގަޅު ޕްރޮޕޯސަލްކަން ފައިނޭންސް މިނިސްޓްރީން ބުނެފައިވާ ކަމަށް ވެސް ގާޒީ ފާހަގަ ކުރެއްވި އެވެ.
