ލަންޑަން (5 އޭޕްރީލް) - ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި މިރޭ މެންޗެސްޓާ ސިޓީއާ ދެކޮޅަށް އެތުލެޓިކޯ މެޑްރިޑާ ދެކޮޅަށް ނުކުންނައިރު، ސިޓީ އަކީ ފޭވަރިޓެވެ. މިކަމާ ދެބަސްވުމެއް ނެތެވެ. އެތުލެޓިކޯގެ ކޯޗު ޑިއޭގޯ ސިމިއޯނީ ވެސް މިކަން ގަބޫލްކުރެ އެވެ. އެކަމަކު، ޗެމްޕިއަންސް ލީގުގެ މާޒީން، ފެންނަން އޮތީ ސިމިއޯނީގެ އުންމީދު އާވާ ފަދަ މަންޒަރުތަކެކެވެ. މޮޅެތި ކުޅުންތެރިން ތިބުމަކީ، މެޗަކުން މޮޅުވާނެކަމުގެ ޔަގީންކަމެއް ނޫން ކަމެވެ.
ސިޓީގެ ދަނޑުގައި މިރޭ ކުޅޭ މެޗުގެ ކުރިން ނޫސްވެރިންނާ ވާހަކަދައްކަމުން، ސިމިއޯނީ ބުނީ ކުޅުންތެރިންނަށް ބަލާއިރު، ޗެމްޕިއަންސް ލީގުގެ "ފޭވަރިޓުންނަކީ ބަޔާނާއި ސިޓީ" ކަމަށެވެ. އެކަމަކު، އެތުލެޓިކޯ އޮތީ ވަރުގަދަ އުންމީދަކާ އެކު ކަމަށް ސިމިއޯނީ ބުނެފައިވެ އެވެ. އޭގެ އެއް ސަބަބަކީ މިދިޔަ ސީޒަންގެ ޗެމްޕިއަންސް ލީގުގެ ތަށި ޗެލްސީން ހޯދުމެވެ.
"އެއްވެސް މީހަކު ހިޔެއް ނުކުރޭ މިދިޔަ ސީޒަންގައި ޗެލްސީން ތަށި އުފުލާލާނެ ކަމަށް. އެކަމަކު، ޗެލްސީން މެޗަކަށް ފަހު މެޗެއް ކުޅުން ރަނގަޅުކޮށް. ޓީމެއްގެ ގޮތުގައި ކާމިޔާބު ހޯދީ،" ސިމިއޯނީ ބުންޏެވެ.
ސިމިއޯނީ ބުނީ ސިޓީގެ ފަރާތުން ފެންނަނީ ވަރަށް މޮޅު ފުޓްބޯޅައެއް ކަމަށެވެ. އެކަމަކު، އެ ޓީމުގެ ކާމިޔާބީގެ ފަހަތުގައި އޮތީ ކޮންމެ މެޗެއްގައި ވެސް ކުޅުންތެރިން ކުރާ މަސައްކަތް ކަމަށެވެ.
"ސިޓީގެ ކުޅުންތެރިންގެ ފަރާތުން ފެންނަ ވޯކް ރޭޓް ކޮންމެ ކޯޗެއް ވެސް ބޭނުންވާނެ އޭނާގެ ކުޅުންތެރިންގެ ފަރާތުން ފެންނަން،" ސިމިއޯނީ ބުންޏެވެ.
ސިޓީގެ ކޯޗު ޕެޕް ގާޑިއޯލާ ވަނީ އަބަދުވެސް ޗެމްޕިއަންސް ލީގުގެ މެޗުތަކަށް ކުރިމަތިލާން ޖެހެނީ އާންމު މެޗަކަށް ވުރެ ދެ ގުނަ ވިސްނުމަށް ފަހު ކަމަށެވެ. ސިޓީން އަބަދު އެއް ސްޓައިލެއްގެ ފުޓްބޯޅަ ކުޅޭތީ ގިނަ ޓީމުތަކަށް ސިޓީއާ ކުޅެން ފަސޭހަވާތީ ކުރިއަށް ހުރި މެޗުތަކުގައި ސިޓީ ކުޅޭ ގޮތް ބަދަލުކުރަން ބޭނުންވާ ކަމަށް ގާޑިއޯލާ ބުންޏެވެ.
ސިޓީ ދަނޑުގައި މިރޭ އެތުލެޓިކޯއާ ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.
