ގަވާއިދާ ހިލާފަށް ހުއްދަ ނުނަގައި ހއ. ކެލާއިން ރުއްގަސް ކަނޑައި، އެރަށުން ބޭރުކުރާކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތައް އެރަށު ކައުންސިލުން ދޮގުކޮށްފި އެވެ،
ކެލާއިން ރުއްގަސްތަކެއް ކަނޑައި، ރަށުން ބޭރުކުރަމުންދާތަން ދައްކުވައިދޭ ފޮޓޯތަކެއް ތިމާވެށި ހިމާޔަތްކުރަން މަސައްކަތްކުރާ ބްލޫޕީސް ޖަމިއްޔާއިން ވަނީ މިދިޔަ އާދިއްތަ ދުވަހު ސޯޝަލް މީޑިއާގައި އާންމުކޮށްފަ އެވެ. ބްލޫޕީސް ޖަމިއްޔާއިން ބުނީ އެ ރުއްގަސްތަކަކީ ރިސޯޓު ތަރައްގީކުރަމުންދާ ރަށްރަށުގައި އިންދުމަށް ކެލާއިން ނަގާ ރުއްގަސްތަކެއް ކަމަށެވެ. އެ މައްސަލަ މިހާރު އެންވަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ދަނީ ބަލަމުންނެވެ.
އެ މައްސަލަ މިހާރު އީޕީއޭގެ ސަމާލުކަމަށް އައިސްފައިވާއިރު، ކެލާ ކައުންސިލުން ވަނީ އެރަށުން ރުއްގަސްތަކެއް ކަނޑައި ބޭރުކުރަމުންދަނީ އެރަށުގައި ހިންގާ އެކި މަޝްރޫއުތަކަށްޓަކައި ބިން ސާފުކުރުމުގެ ގޮތުން ނަގަން ޖެހެ ހުއްދަތަކާއެކުގައި ކަމަށް ބުނެފަ އެވެ.
ކެލާ ކައުންސިލް ރައީސް އަބްދުﷲ އިންފާޒް މި ނޫހަށް ވިދާޅުވީ އެރަށުން ބޭރުކުރަމުންދާ ކަމަށް ބުނާ ރުއްގަސްތަކަކީ ރަށުގެ ދަނޑުބިންތަކާއި އަލަށް އިމާރާތްކުރާ ޕޮލިސް ސްޓޭޝަން ހުންނަ ސަރަހައްދުގައި ހުރި ރުއްގަސްތަކެއް ކަމަށެވެ.
"އެއީ އެތަންތަން ސާފުކުރުމަށް ހަމަ އެގްރިމެންޓު ކުރެވިގެން. ޕޮލިސް ސްޓޭޝަން ބިމާއި ދަނޑުތައް ވަށައި ހުންނަ ސަރަހައްދުގައި ހުރި ރުއްތަކެއް. ދެން ގިނަ މީހުންނަށް ނޭނގޭ އެކަމެއް. އެގްރިމެންޓްގައި އިންނަ ގޮތުން އެ މަސައްކަތްކުރާ މީހުންނަށް އެ ރުއްގަސްތައް ބޭނުމިއްޔާ ރަށުން ގެންދެވޭނެ،" އިންފާޒް ވިދާޅުވި އެވެ.
އޭނާ ވިދާޅުވީ އެ ސަރަހައްދުތަކުން ސާފުކުރާ ރުއްގަސްތަކުގެ އަދަދު ގިނަ ވިޔަސް ބަދަލުގައި އެހެން ސަރަހައްދުތަކުގައި ރުއްގަސް އިންދާނެ ކަމަށެވެ.
ކެލާއިން ރުއްގަސް ބޭރުކުރާ މައްސަލައާ ގުޅިގެން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް "އަދަދު"އަށް ވިދާޅުވީ، ކެލާއިން ރުއްގަސްތަކެއް ބޭރުކުރާކަމުގެ މައްސަލައެއް ސޯޝަލް މީޑިއާގައި ދައުރުވާކަން އެ އެޖެންސީގެ ސަމާލު ކަމަށް އައިސްފައިވާ ކަމަށެވެ. ނަމަވެސް އެ މައްސަލަ އީޕީއޭއަށް އަދި ރިޕޯޓު ކޮށްފައިނުވާ ކަމަށް ނައީމް ވިދާޅުވި އެވެ.
"އަޅުގަނޑުމެން އެކަމަކު ވެސް މިދަނީ ބަލަމުން، އެއީ ކިހިނެތް ހިނގައިދިޔަ ކަމެއްތޯ. އެއީ މިހާތަނަށް ލިބޭ މައުލޫމާތަށް ބަލާއިރު ކެލާގައި ހިންގަމުންދާ އެކި ކަހަލަ މަޝްރޫއުތަކަށް އެރަށުން ސާފުކުރުމަށް ހުއްދަ ދެވިފަައިވާ ރުއްގަސްތަކެއް ކަމަށް މައުލޫމާތު ލިބެނީ،" ނައީމް ވިދާޅުވި އެވެ.
