މި ފެށޭ ރޯދަ މަހުގެ ފުރަތަމަ ދުވަހުން ފެށިގެން ފިތުރު ޒަކާތް ދެއްކޭނެ ގޮތްތަކާއި ދައްކަން ޖެހޭ އަދަދުތައް އިސްލާމިކް މިނިސްޓްރީން މިއަދު އާންމުކޮށްފި އެވެ.
ރޯދަ މަހުގެ ފުރަތަމަ ދުވަހުން ފެށިގެން އެންމެ ފަހު ދުވަހާ ހަމައަށް ޒަކާތް ބަލައިގަންނާނެ އެވެ. ޒަކާތުގެ ނިސާބު ވެސް މިއަދު ވަނީ އާންމުކޮށްފަ އެވެ.
titledesc
އުރީދު އާއި ދިރާގު އަދި މޯލްޑިވްްސް އިސްލާމިކް ބޭންކް އަދި ފަހިޕޭ އެޕްލިކޭޝަންތަކުން ޒަކާތް ދެއްކޭނެ އެވެ. އޭގެ އިތުރުން ބެންކު އޮފް މޯލްޑިވްސް އާއި ފިނޭންސް މިނިސްޓްރީގެ ބަނޑޭރި ޕޯޓަލް އިން ވެސް ޒަކާތް ދެއްކޭނެ ކަމަށް އިސްލާމިކް މިނިސްޓްރީން ބުނެ އެވެ.
އޮންލައިންކޮށް ނުދެއްކޭ ފަރާތްތަކަށް އަންނަ އާދިއްތަ ދުވަހުން ފެށިގެން އިސްލާމީ މަރުކަޒުގެ ހޯލުން ޒަކާތް ދެއްކޭނެ އިންޒާމު ހަމަޖައްސާފައި ވާނެ ކަމަށް މިނިސްޓްރީން ބުނެ އެވެ. ރަސްމީ ކޮންމެ ދުވަހެއްގެ ހެނދުނު 10:00 އިން 13:00 އަށް މިނިސްޓްރީން ޒަކާތް ބަލައިގަންނާނެ އެވެ.
ރަށްރަށުގައި ޒަކާތް ބަލައިގަންނާނީ އެ ރަށެއްގެ ކައުންސިލުންނެވެ. ޒަކާތް ބަލައިގަންނަން ހަމަޖެހިފައިވަނީ މިނިސްޓްރީން ކަނޑައަޅާފައިވާ ގޮވާމުގެ ބާވަތްތަކުގެ 2.4 ކިލޯގެ އަގަށްވާ ފައިސާއިންނެވެ.
ފިތުރު ޒަކާތް ގޮވާމުން ބަލައިގަންނާނީ ރޯދަމަހުގެ ފަހު ދިހައިން ފެށިގެންނެވެ. ހަމައެއާއެކު، މި އަހަރު ފިތުރު ޒަކާތް ހުރިހާ ރަށަކުން ވެސް ނަގަން ހަމަޖެހިފައި ވަނީ އެއް ރޭޓަކުންނެވެ.
އެހެން އަހަރުތަކާއި ކުޑަކޮށް ތަފާތުކޮށް، މިފަހަރު ފިތުރު ޒަކާތް ދައްކާ މީހާއަށް އެމީހަކު ބޭނުންވާ ރަށަކަށް ފިތުރު ޒަކާތް ދެއްކޭނެ އިންތިޒާމުތަކެއް ރާވަމުންދާ ކަމަށް މީގެ ކުރިން އިސްލާމިކް މިނިސްޓަރު ހާމަކުރައްވާފައިވެ އެވެ. ނަމަވެސް، އަދި އެ އިންތިޒާމުތަކާ ގުޅޭ އިތުރު މައުލޫމާތެއް ހާމަކޮށްފައެއް ނުވެ އެވެ.
ރާއްޖޭގައި ފިތުރު ޒަކާތް ހައްގުވާ ފަގީރުންގެ ދަފްތަރުގައި 9،041 މީހުން ރެޖިސްޓްރީ ކޮށްފައިވެ އެވެ.
