ރަސްމީކޮށް ނުހުޅުވި ނަމަވެސް ރާއްޖޭގައި ހުރި އެންމެ ބޮޑު މިސްކިތް ކަމަށްވާ ކިންގު ސަލްމާން މިސްކިތުގައި ނަމާދު ކުރަން ފަށައިފި އެވެ.
މިދިޔަ އަހަރު ރޯދައަށް ވަގުތީ ގޮތުން މިސްކިތް ހުޅުވަން ނިންމި ނަމަވެސް, ކޮވިޑްގެ ހާލަތު މާލޭގައި ގޯސްވެ މިސްކިތް ހުޅުވާފައެއް ނުވެ އެވެ.
ނަމަވެސް، މި ފެށޭ ރޯދަ މަހާ ދިމާކޮށް މިއަދުގެ ހުކުރު ނަމާދުން ފެށިގެން އެ މިސްކިތުގައި ނަމާދުކުރަން ވަނީ ފަށާފަ އެވެ. އަދި، އައްޝައިހް ނަސްރުﷲ އަލީ ވަނީ އެ މިސްކިތުގެ އިމާމެއްގެ ގޮތުގައި ހަމަޖައްސާފަ އެވެ.
ސަލްމާން މިސްކިތް ރަސްމީކޮށް ހުޅުވާނެ ތާރީހެއް ފަހުން ކަނޑައަޅާނެ ކަމަށް އިސްލާމިކް މިނިސްޓަރު މީގެކުރިން ވިދާޅުވެފައިވެ އެވެ.
މި މިސްކިތް ރަސްމީކޮށް ހުޅުވުމަށް ދެ މިލިއަން ޑޮލަރު ސައުދީން ދޭނެ ކަމަށް ރާއްޖޭގެ ފޮރިން މިނިސްޓްރީން ވެސް ބުނެފައިވެ އެވެ. އަދި، މިސްކިތް ހުޅުވުމުގެ ކަންކަމާ ގުޅޭގޮތުން މަޝްވަރާ ކުރުމަށް ސައުދީގެ ވަފްދެއް ވެސް މީގެކުރިން ރާއްޖެއަށް އައިސްފައިވެ އެވެ.
ކިންގް ސަލްމާން މިސްކިތަކީ ސައޫދީ ރަސްގެފާނުގެ އެހީގައި އިމާރާތްކޮށްފައިވާ މިސްކިތެކެވެ.
އެ މިސްކިތުގެ މަސައްކަތް ކުރަން ހަވާލުކުރީ ތުރުކީގެ ޓާމެކްސް ކުންފުންޏާ އެވެ. އެ ކުންފުންޏާއެކު ކުރީގެ ސަރުކާރުން އެއްބަސްވުމުގައި ސޮއިކުރީ ފެބްރުއަރީ 28، 2017ގަ އެވެ.
ރައީސް ޔާމީންގެ ދައުރުގައި 2018 ވަނަ އަހަރު އަޅަން ފެށި ކިންގް ސަލްމާން މިސްކިތަކީ 25 މިލިއަން ޑޮލަރުގެ މަޝްރޫއެކެވެ. އޭގެ ތެރެއިން 14 މިލިއަން ޑޮލަރަކީ ސައުދީގެ ހިލޭ އެހީ އެވެ. ބާކީ ހަރަދުކުރީ ދިވެހި ސަރުކާރުންނެވެ.
އެ މިސްކިތުގައި އަރާފޭބުމަށް ލިފުޓު ހަރުކޮށްފައިވާއިރު އެއްފަހަރާ 10،000 މީހުންނަށް ނަމާދުކުރެވޭނެ އެވެ. ލައިބްރަރީއަކާއި ކްލާސްރޫމްތަކުގެ އިތުރުން ސެމިނާ ރޫމްތައް ވެސް މި މިސްކިތުގައި ހުންނާނެ އެވެ.
